Dawki zwyšene
Dlěje hač dwaceći lět běchu sadźby za ležownostny dawk A a B w měsće Budyšinje konstantne. Na swojim posedźenju zawčerawšim su měšćanscy radźićeljo rozsudźili je zwyšić.
Budyšin (SN/MWj). Sadźby za ležownostny dawk A a B w městach a gmejnach njesłuži jenož tomu, zo bychu komuny dawkowe dochody měli. Po tychle sadźbach so tohorunja wobliči, kelko klučowych připokazanjow wone dóstanu. Za to rozsudne su tak mjenowane niwelěrowanske sadźby. Su-li sadźby města niše, so město wěsteje sumy klučowych připokazanjow wzda. W Budyšinje je to lětsa něhdźe 251 000 eurow. Tohodla je měšćanska rada na swojim srjedownym posedźenju wobzamknyła, sadźbu za ležownostny dawk A wot 300 na 310 procentow zběhnyć, sadźbu za ležownostny dawk B pak wot tuchwilu 380 na 420 procentow. Wobě sadźbje matej wot 1. januara 2018 płaćiwej być.
Zmije pušćeć a plincy jěsć
Smječkecy. Wšitke swójby z dźěćimi přeproša Smječkečanski wjesny klub njedźelu, 1. oktobra, na zhromadne zmijepušćenje. Zajimcy zetkaja so w 15 hodź. na łuce za Bjeńšec twarskim zawodom, potajkim ze Serbskopazličanskeho směra na prawym boku. Jako chłóšćenku wjesne žony plincy napjeku.
Poslednje wodźenje
Wojerecy. Pod hesłom „Z hrabju Hoyerom so wšitko započa“ wotměje so njedźelu, 1. oktobra, w 10 hodź. lětuše poslednje wodźenje po historiskim centrumje Wojerec. Start budźe při hrodźe. Wobdźělenje płaći pjeć eurow, potuńšene tři. Přizjewjenje trěbne njeje.
Wo serbskich wosebitostkach
Janšojce. Z wosebitostkami serbskeje Delnjeje Łužicy zaběra so přednošk 5. oktobra w 19 hodź. w Janšojskim Serbsko-němskim domizniskim muzeju.
při twarnišću
Wobchod wojuje wo přežiwjenje
Nowy móst nad Klóšterskej wodu a wutwar statneje dróhi S 100 w Pančicach-Kukowje stej tuchwilu z wotstawkom najwjetše nadróžne twarnišćo w dwurěčnych gmejnach. Z tejle seriju twarnišćo přewodźamy a wobswětlamy starosće tamnišich wobydlerjow.
Čas wulkeje hary na twarnišću wosrjedź Pančic-Kukowa, jako za tamniši nowy móst hłuboke dźěry točachu, je mjeztym dawno nimo. Hara je so tež za Elku Noack pominyła. Wona pak ma cyle hinaše starosće, a to hižo wot wšeho spočatka twarnišća. Elke Noack wjedźe w swójskim domje na Róžeńčanskim puću, dobre sto metrow wot twarnišća zdalene, kwětkowy wobchod. Mjeztym wobsteji tón 20 lět. Ale jubilej je sej wobchodnica zawěrno hinak předstajiła. „Twarnišćo so woprawdźe jara zlě wuskutkuje. Přerěznje mam jenož połojcu toho wobrota, kaž bě wón do toho, a tendenca je woteběraca“, Kukowčanka rozłožuje. Po jeje słowach móže wona tónle wupad poł lěta kompensować, potom pak budźe ćežko.
Na Radworskej nawsy twarscy dźěłaćerjo tuchwilu ze swojej ćežkej ...
Krótkopowěsće (29.09.17)
Za wokrjes w Euroregionje
Budyšin. W sobustawskej zhromadźiznje Euroregiona Nysa z.t. zastupuja wokrjesni radźićeljo Wolfgang Zettwitz (CDU), Sven Gabriel (FDP) a Hajko Kozel (Lěwica) dale Budyski wokrjes. Wokrjesny sejmik jich wobkrući a pomjenowaše zdobom třoch zastupjerjow-radźićelow Patrica Junga, Normana Retzlaffa (wobaj CDU) a Ralpha Büchnera (Lěwica).
5 000 šulerjow wjace
Drježdźany. Sakske statne ministerstwo za kultus njemóže narunać dotal pobrachowacych wučerjow. Přičina je zwyšenje ličby šulerjow. W šulskim lěće 2017/2018 chodźi po cyłej Sakskej 5 000 šulerjow wjace do šule hač lěto před tym. Za tutych šulerjow je trjeba něhdźe 200 rjadownjow a 200 přidatnych wučerjow, zdźěli kubłanskopolitiska rěčnica frakcije Lěwicy Cornelia Falken.
Młodym ćěkancam pomhać
Budyšin. Budyski wokrjes a město Budyšin chcetaj so sylnišo za kubłanje ćěkancow zasadźić. Tuž stej wobě zarjadnišći podpisałoj kooperaciske dorěčenje z Němskej załožbu za dźěći a młodźinu. Mjez druhim chcedźa młodych ćěkancow sčasom wo přechodźe ze šule do wukubłanja informować a jich přewodźeć.
Wjesela so na camp
Budyšin. Lětuši prózdninski camp Rěčneho centruma WITAJ za šulerjow 3. a 4. lětnika dwurěčnych rjadownjow wotměje so wot 3. oktobra wječor hač do 6. oktobra w Budyskej młodowni. Dohromady 18 dźěći ze zakładnych šulow Radwor, Pančicy-Kukow, Chrósćicy, Worklecy, Ralbicy, Kulow a Slepo móže so na rjane dožiwjenja při pućowanju, paslenju, hraću a kupanju kaž tež na wopyt Krabatoweho młyna w Čornym Chołmcu wjeselić.
Poskitk za prózdniny
Kamjenc. Sakralny muzej Kamjenca přeproša dźěći w starobje sydom do 14 lět na prózdninsku akciju. Wutoru, 10. oktobra, wot 10 do 12.30 hodź. chcedźa sej tam zhromadnje wšelake wuměłske twórby wotkryć a so na hódančkowu rallye podać. Wo tym zhotowja wobdźělnicy pohladnicy, kotrež móža přećelam a znatym pósłać. K zakónčenju zalězu wšitcy na wěžu Kamjenskeje Marineje cyrkwje, zwotkelž změja rjany wuhlad na město. Wobdźělenje płaći tři eura na wosobu. Zajimcy njech přizjewja so pod telefonowym čisłom 03578/ 379 111.
Na rozmołwu z filmom
Chcedźa psyče powostanki rumować
Wučer za psy Torsten Kurz z Hornjeje Hórki namołwja 3. oktobra k wosebitej akciji we Wojerecach. Tam měli wobsedźerjo psow a wšitcy dalši zajimowani na zelenišćach a zjawnych naměstach psyče howna rumować. Silke Richter je so z 50lětnym wo tym rozmołwjała.
Knježe Kurzo, čehodla Was myli, zo ludźo howna swojich psow njerumuja?
T. Kurz: To mje jenož njemyli, ale jara hněwa, dokelž njerozumju, čehodla wobydlerjo swoje města/wsy čiste njedźerža. Wšako w nich bydla, a powostanki psow pohubjeńšeja bydlensku kulturu.
Njeje móžno psej přiwučić howno jenož na wěstych městnach njepušćić, hdźež to nikoho njemyli? To by tola tež zmysłapołne było hladajo na diskusiju wo přiběracych plastikowych wotpadkowych titach.
T. Kurz: Zasadnje móžeš psej tajke zadźerženje přiwučić. To je samo poměrnje jednore. Hdyž pak so pos na přikład na kromje puća wolóži, potom maja wodźerjo awtow tele zawostajenstwo we wobruči. A nimo toho: Čehodla měł pos lěnjosć jeho wobsedźerja kompensować.
Mnozy wobsedźerjo psow skorža, zo je we Wojerecach přemało wotpadkowych sudobjow za hownjace titki.
Policija (28.09.17)
Kable roztřihali
Miłoraz. Na terenje Wochožanskeje brunicoweje jamy pola Miłoraza chcychu wutoru wječor njeznaći kable kradnyć. Woni wotrěznychu wjacore milinowody po cyłkownej dołhosći 200 metrow, roztřihachu je do mjeńšich kuskow a sej je za pozdźiši transport přihotowachu. Sobudźěłaćerjo pak to pytnychu, tak zo k padustwu hižo njedóńdźe. Přiwšěm nasta wěcna škoda, kotruž trochuje firma na něhdźe 3 000 eurow.
Zawod najprjedy njepowjetša
Wjele informacijow na posedźenju Malešanskeje gmejnskeje rady
Malešecy (CS/SN). Swój hospodarski plan za lěto 2017 je Malešanska gmejnska rada na swojim posedźenju zawčerawšim wobzamknyła. Přičina toho, zo móžachu to hakle nětko činić, je, zo bě jedna ze sobudźěłaćerkow gmejnskeho zarjadnistwa wjacore měsacy wupadnyła. Wona měješe wotewrjensku bilancu za nowy zličbowanski system doppik sobu zestajeć. W małym zarjadnistwje, tak wjesnjanosta Matthias Seidel (CDU) rjekny, móžeš tajkile wupad jeno ćežko narunać. Etat Malešanskeje gmejny wopřijima lětsa něhdźe sydom milionow eurow. Z toho je milion eurow za inwesticije předwidźany. Dróhi w Přiwćicach, na Delnjohórčanskim přemysłownišću a w Rakojdach za dohromady wjac hač 800 000 eurow su najwjetše projekty, kotrež zdźěla hižo zwoprawdźeja.
Južnoamerisku domiznu předstajił
Budyšin (SK/SN). Južnoameriski kraj Peru spřistupni rodźeny Peručan Yuri Lévano García zajimcam na derje wopytanym přednošku, organizowanym wot Budyskeho kluba wuchowarjow rěče, w tudyšej měšćanskej bibliotece zawčerawšim jako krajinowu, rěčnu a kulturnu mnohotnosć. Yuri Lévano, wot najnowšeho městopředsyda Europskeho kluba Budyšin, wobknježi sydom rěčow, mjez nimi perfektnje hornjoserbšćinu, a je nimo toho dobry znajer stawiznow južnoameriskeho kraja. Něhdźe połsta hosći wječora dožiwi we wobłuku Mjezykulturelneju tydźenjow napjate pućowanje do zdaleneho kraja. Peru ma ze swojimi 31,5 milionami wobydlerjow na trójce tak wulkim teritoriju kaž Němska nimo španišćiny 65 rěčow a 77 wšelakich etnijow.
