Krótkopowěsće (14.08.18)
Kedźbu! Šulscy nowačcy po puću
Pirna. Sakske ministerstwo za nutřkowne naležnosće zahaji dźensa rano kampanju k škitej šulskich nowačkow. Pod hesłom „Šula je so započała“ je nimo policije tež Krajny zwjazk sakskeho wobchadneho přemysła wobdźěleny. Tak su wot dźensnišeho mjez druhim wjacore policajske jězdźidła a busy, z mjenowanym hesłom nastupajo start noweho šulskeho lěta polěpjene, po puću.
Poćežowanja na A 4
Porchow. Na awtodróze A 4 mjez Porchowom a Hornim Wujězdom su dźensa wjacore dnjowe twarnišća zarjadowali. Přičina je horcoty a poćežowanja wobchada Lkw-jow dla skóncowana jězdnja. Kaž krajny zarjad za dróhotwar a wobchad informuje, dyrbja dróhotwarcy škałbu mjez jězdnjomaj po wjacorych kilometrach A 4 zwuporjedźeć. Hač do pjatka chcedźa najwjetše škody wotstronić.
Keltiski wodowód namakali
Policija (13.08.18)
Haruja a myla nócny měr
Budyšin. Hižo wot spočatka lětnich prózdnin so w Budyšinje na naměsće před Němsko-Serbskim ludowym dźiwadłom wšědnje wjetše skupiny ludźi zhromadźuja a tam haruja. W nocomaj na minjenej pjatk a sobotu zwěsćichu tam stajnje něhdźe 40 wosobow, kotřiž nócny měr bliskich wobydlerjow z haru a hudźbu mylachu. Přiwołana policija zwěsći identitu zwjetša młodych ludźi. Pola někotrych z nich namakachu snadne mnóstwo drogow. Tohodla kaž tež njedodźerženja nócneho měra dla změja so woni nětko disciplinarisce zamołwić. Hakle wokoło třećeje hodźiny zaćahny na naměsće před NSLDź zaso měr. Wróćo wostachu rozbite bleše a dalše partyjowe wotpadki. Za wobydlerjow bliskich bydlenskich domow woznamjenjeja nócne hejsowanja přiběrace poćeženje, čehoždla woni wobstajnje policiju informuja.
Dawno wo nowu syć so prócowali
Poskića šulerski kalender
Budyšin (SN). W Budyskim wólbnym běrowje zapósłanca Sakskeho krajneho sejma Marka Šimana (CDU) na Wysokej 16 móža sej zajimcy šulerski kalender krajneho sejma za šulske lěto 2018/2019 wotewzać. Kalender je robustny tydźenski planowar za sakskich šulerjow a młodostnych. Běrow Šimana je wot póndźele do pjatka wot 9 do 17 hodź. přistupny.
Wulki zajim za rjemjesło
Rěčicy (SN). Wšitke hornčerske dźěłarnički běchu w lětnich prózdninach na Rěčičanskim Erlichtec dworje wuknihowane. Tež plećenje košow holcy a hólcy rady přiwzachu. Mnozy zajimcy běchu ze starych zwjazkowych krajow k swojim dźědam a wowkam na wopyt přijěli. Woni mějachu wulke wjeselo, sej starodawne rjemjesło zbližić, a móžachu sej na kóncu swój wudźěłk, kaž keramisku wazu, sobu domoj wzać.
Łazowske pišćele budu ponowjene
Łaz (AK/SN). Srjedź septembra móža Ladegastowo-Rühlmannowe pišćele z lěta 1872 we Łazowskej cyrkwi saněrować započeć. Tole podšmórny Günter Wjenk na njedawnym posedźenju wosadneje cyrkwinskeje rady. „Zrěčenja z wobdźělenymi fachowymi firmami, kotrež přiražku za nadawki dóstachu, su nětko wotzamknjene“, Wjenk na posedźenju rady rjekny. Pišćeletwarska firma Eule z Budyšina dźěła na pišćelach wukonja. Nadawk za molerske dźěła na pišćelach a w cyrkwi přepodachu zawodej Belger z Łaza. Firma Zschiesche z Rakec přewjedźe trěbne elektrodźěła.
Na Boršći swójbna seklowa čara
Kamjenc hotuje so na lětušu tradicionalnu Boršć, kotraž so tam přichodny pjatk zahaji a 23. awgusta zakónči. Měrćin Weclich je so w tym zwisku w zarjadnistwje Lessingoweho města naprašował a so z nowinskim rěčnikom Thomasom Käpplerom rozmołwjał.
Kajki je staw přihotow Boršće?
T. Käppler: Tónkróć so něhdźe 1 400 šulerjow na póndźelnym wućahu wobdźěli. To je wjele a zaleži na tym, zo je to w šulskim času. Ze stawom přihotow smy jara spokojom. Wězo stej rekordna ličba wobdźělnikow na swjedźenskim ćahu a tuchwilne wjedro zahrodkarjam a kwětkarnjam města wulke wužadanje. Wšitcy pak so najebać napjatu situaciju prócuja, naprašowanjam za kwětkowej pychu wotpowědować.
Što na hosći noweho čaka?
Porjedźenka
Krótkopowěsće (13.08.18)
Žně kórkow hižo nimo
Lubin. Jara zahe kónča so tele dny žně kórkow w Błótach. Minjene lěta su tule zeleninu hač do kónca awgusta šćipali, kaž Błótowske towarstwo w Lubinje zdźěli. Trajnych wysokich temperaturow dla běchu kórki spěšnje rostli, tak zo su je hižo w juniju žnjeć započeli. Zdźěla su problemy při konserwowanju za mnóstwo zeleniny trěbne škleńcy dóstać.
Šěsć kandidatow namjetowali
Huštań (Wüstenhain). Delnjoserbske towarstwo Pónaschemu je šěsć kandidatow za wólby Serbskeho sejma namjetowało. Kaž cyłk nětko informuje, su wobdźělnicy hłowneje zhromadźizny 21. julija w Hustanju Ilonu Urban z Berlina, Siegberta Budischina z Bórkowow, Sandru Wilhelm z Huštanja, Stefanie Kositz z Wětošowa, Lauru Grönert z Dubjeho a Uda Nickuscha z Cerska wobkrućili.
Dźěła wospjet kontrolować
Jabłuka při dróhach nješćipać
W krajnoradnym zarjedźe za spadany sad žadyn wužitk nimaja
Budyšin (SN/mwe). Přistajeni brěčkownjow a móštownjow maja tele dny ruce połnej dźěła. Najebać wulku horcotu a ekstremnu suchotu jim ludźo sad woža, zo bychu jón na brěčki a nektary předźěłali. Za to móža sej kupcy z wulkeho wuběra napojownistwa brěčki kaž z kisałych wišni, jabłukow, brěškow a z wjele dalšich družin sobu domoj wzać.
Kaž Mario Schäplitz z móštownje w rozmołwje ze Serbskimi Nowinami praji, móhli ludźo při dróhach spadane jabłuka abo krušwy zezběrać a w jeho móštowni w Reichenbachu kaž něhdy w měchach wotedać a na brěčki zaměnić.
Policija (10.08.18)
W prózdnej kupnicy so paliło
Wojerecy. Na Hasy měra we Wojerecach dyrbjachu wčera kameradojo tamnišeje powołanskeje wohnjoweje wobory něhdźe w 17 hodź. w prózdnej kupnicy wosrjedź města woheń hašeć. Hižo před tydźenjomaj bě so tam paliło. Byrnjež so z twarjenja chětro kuriło a płomjenja sapali, móžachu je wobornicy w běhu dweju hodźin zhašeć. Po zdaću je woheń něchtó zamiškrił.
Do kontejnera so zadobyli
Njebjelčicy. W Njebjelčicach su njeznaći zawčerawšim w nocy z twarskeho kontejnera rjećazowe piły a njebozowe mašiny w hódnoće 2 000 eurow pokradnyli.
