Krótkopowěsće (26.09.17)
Wjace politiskeho kubłanja
Drježdźany. Sakska chce politiske kubłanje na šulach dale polěpšić. Gremij ekspertow je w nadawku statneje ministerki za kultus Brunhild Kurth (CDU) 31 poručenjow zdźěłało. Za to dyrbja so wučerjo, njewotwisnje wot fachoweje kombinacije, a socialni dźěłaćerjo dale kubłać. Šulerjo maja dóstać wjace prawow sobupostajowanja.
„Skupina 47“ online
Waischenfeld. Němsku literaturu w druhej połojcy 20. lětstotka rozsudnje wobwliwowaca „Skupina 47“ je nětko ze swojim nowym online-poskitkom prezentna. We wobłuku 50. róčnicy poslednjeho zeńdźenja originalneje skupiny wuhotuje město Waischenfeld jubilejny swjedźeń, na kotrymž so wšitcy hišće žiwi awtorojo wobdźěla. W duchu załožerja Hansa-Wernera Richtera chce literarny dorost přichodnje spěchować.
Škodowki tež z Němskeje?
Rozprawja wo Peruwje
Budyšin. Přichodne zarjadowanje Budyskeho kluba wuchowarjow rěče wotměje so jutře, wutoru, w 19 hodź. we wobłuku Mjezykulturneju tydźenjow w Budyskej měšćanskej bibliotece. Tam předstaji Yuri Lévano García w hudźbnje wobrubjenym přednošku swoju domiznu Peru kaž tež jeho krajinowu, rěčnu a kulturnu mnohostronskosć. Wšitcy zajimcy su na zarjadowanje wutrobnje přeprošeni. Zastup je darmotny.
Přednošuje wo młynach
Budyšin. Młyny w Budyskim sprjewinym dole wot 14. do 20. lětstotka steja w srjedźišću přednoška jutře, wutoru, w 19 hodź. w Muzeju Budyšin. Muzeologa Hagen Schulz rozprawja wo najwšelakorišich wódnych młynach, kotrež su dołhi čas wobraz sprjewineho doła postajeli. Dohromady hodźi so 28 připrawow dopokazać, kotrež buchu wot wódnych kołow ćěrjene. W swojim přednošku zaběra so Schulz tež z prašenjom, kotry wuznam mějachu młyny za hospodarske wuwiće města.
Pancate wjedro klubu činiło
Wužitne dźěło wukonjała
Młodostna Monika Bulankec z Prawoćic widźeše po politiskej změnje jako w Lipsku wukubłana chorobna sotra wobšěrniše nadawki. Wulka nuza bě w dźěsćownjach w sobu najchudšim kraju Europy, mjenujcy w Rumunskej. Wo tym rozprawješe wona tele dny skupinje Budyskich katolskich serbskich seniorow.
Tež hdyž běchu diasowe wobrazy mjeztym chětro njejasne, zawostaji rozprawa wudateje Moniki Süßoweje, kotraž bydli ze swójbu we Wopakej a dźěła po pedagogiskim studiju pola Serbskeho šulskeho towarstwa w Budyšinje, w připosłucharjach hłuboki zaćišć. Z towaršku wjedźeše ju puć do městačka Cristuru Secuiesc w Sedmihródskej. Tež hdyž su Madźarojo w Rumunskej narodna mjeńšina, w tymle regionje tworja woni zdawna wjetšinu, mjenuja městačko Székelykeresztúr, němsce pak Szeklerkreuz.
Zběrnikej přećiwo wulkej wodźe přihłosowali
Kubšicy (CS/SN). Hnydom we wjacorych dypkach dnjoweho porjada zaběrachu so Kubšiscy gmejnscy radźićeljo na swojim zašłym posedźenju z problemami wulkeje wody. Tak woni přihłosowachu, zdźěłać studiju wo wulkim zběrniku w Jenkecach. Tón dyrbjał hoberske dimensije měć, zo móhł Jenkecy, Malešecy kaž tež dźěle Budyšina před wulkej wodu Albrechtowki škitać. Kóšty bychu wobdźělene komuny podźělnje zwjesć měli. Za twar móhli 90 procentow spěchowanskich srědkow dóstać.
Wobydler so prašeše, hač eksistuje za gmejnu Kubšicy tak mjenowana rizikowa karta sylneho dešća. K tomu wjesnjanosta Olaf Reichert (njestronjan) zdźěli, zo je krajnoradny zarjad zdźěłał přepławjensku kartu za Wuježčansku wodu, a te wopřijima tež dźěle Bukečanskeje gmejny. Tale karta ma so bórze zjawnje wupołožić.
Dale radźićeljo wobzamknychu, ponowić wjacezaměrowu žurlu při Poršiskim hrodźe. Tam maja so wokna wuměnić, nowy wjerch zatwarić, wohnjoškit polěpšić a tepjenje do špundowanja skłasć. Po słowach Reicherta so twarske dźěła hakle w januaru započnu, tak zo móža na žurli hišće silwester swjećić.
Policija (25.09.17)
Kołbaski zajědojćene byli
Lejno. Zajědojćene kołbaski běchu njeznaći minjeny pjatk při štomje w Lejnje pola Bukec powěsnyli. Po wšěm zdaću chcychu psam zaměrnje zeškodźeć, štož so jim tež poradźi. Pos 54lětneje wobydlerki je dźěl kołbaskow zežrał, tak zo dyrbješe wobsedźerka swojeho štyrinohateho lubuška ke skótnej lěkarce dowjezć. Ta zwěsći, zo bě w kołbaskach jěd. Kriminalna policija pad nětko dale přepytuje.
Gmejna zamołwita była
Žane starosće njeplanowanych wudawkow za porjedźenje puća dla
Chrósćicy (JK/SN). Njeplanowane wudawki za njedawne dźělne ponowjenje Hórnikoweho puća w Chrósćicach njedaloko šule běchu jedna z temow zašłeho posedźenja Chróšćanskich gmejnskich radźićelow. Hačrunjež jedna so w tym padźe wo statnu dróhu S 98, měješe a ma gmejna nadawk ju zwuporjedźeć dać, dokelž bě so pod asfaltom skóncowała roła, kotraž dešćowu wodu wotwodźuje. A za jeje wotwodźowanje je gmejna zamołwita, wjesnjanosta Marko Kliman (CDU) radźićelam rozłoži. Dešćowa woda je skóncowaneje roły dla dlěši kónc dróhi podpłokała, tak zo je tónle dźěl zapadnył. Trěbne porjedźenske dźěła su po kontroli z kanalowej techniku a po poradźowanju fachowcow z Budyskeho zarjada za dróhotwar a wobchad přewjedli. Dokelž běchu dźěła nuznje trěbne, móžachu radźićeljo naprawu, kotraž płaćeše gmejnu nimale 9 000 eurow, hakle na njedawnym posedźenju wobzamknyć. Wudawki zarunachu z pjenjezami, wuzbytkowanymi z nišimi personalnymi kóštami za Chróšćansku pěstowarnju.
Dźakownosć přińdźe z wutroby
Pančicy-Kukow (SN/MWj). Hdźež knježi w Pančicach-Kukowje hewak ćišina klóštra Marijineje hwězdy, dominowachu sobotu připołdnju hłuboko brunčace motorske z přiwozom, mužojo a žony w kožanych cholowach a kabaće, předewšěm pak błyšćace so woči wobydlerjow Marije Marćineho domu. Stajnje posledni kónc tydźenja w septembru so wodźerjo motorskich ze zbrašenymi na wulět podawaja. Mnozy zbrašeni „swojich šoferow“ mjeztym hižo znaja a rozpjeršeni čakaja, hdy „jich“ motorske skónčnje přijědźe.
Nimale dwaceći konjacych zapřahow je so wčera w Chrósćicach ...
Přistajenych za rěč sensibilizować
Wo nałožowanju serbskeje rěče je tele dny społnomócnjena za serbske naležnosće města Choćebuza Anna Kosacojc-Kozelowa přednošowała, a to na fachowej konferency nawodow fachowych wobłukow w tamnišim měšćanskim zarjadnistwje.
Choćebuz (SN/at.). Zamołwita za serbske naležnosće města Choćebuza je wažna partnerka, dźe-li wo to zaručić prawo wobydlerjow, swoje naležnosće pisomnje abo ertnje w serbskej rěči měšćanskemu zarjadnistwu zapodać. Kaž Anna Kosacojc-Kozelowa w swojim přednošku wuzběhny, wobroćeja so sobudźěłaćerki abo sobudźěłaćerjo ze serbskorěčnym zapodaćom najprjedy na nju. Wona přełožuje delnjoserbske teksty abo tekstowe pasaže do němčiny a je tež za ertnu rozmołwu k dispoziciji. Tole zhonichu wobdźělnicy fachoweje konferency, mjez nimi Choćebuski wyši měšćanosta Holger Kelch (CDU). Ale tež w jeje njepřitomnosći je trěbna pomoc zaručena, wšako móža dalši kompetentni serbskorěčni sobudźěłaćerjo přełožki wobstarać. Wona pak poruči, zo bychu ju do toho informowali, maja-li so předmjety w ertnej serbšćinje rozjimować.
