Krótkopowěsće (03.03.17)
Serbowki sylnje zastupjene
Budyšin. Wokrjesny zwjazk Žónskeje unije CDU (FU) je wčera nowe předsydstwo wuzwolił. Po tym zo dotalna předsydka Andrea Pankau hižo znowa njekandidowaše, wuzwolichu Marju Michałkowu za nowu předsydku. Za městopředsydku wuzwolichu Halenu Jancynu z Ralbic. Borbora Hančikowa z Radworja pak wostanje dale pokładnica a tak tež čłonka předsydstwa.
Krótkostawizny w 5. nakładźe
Budyšin. Popularnohistoriska kniha „Kurze Geschichte der Sorben“ dr. Pětra Kunzy je w 5. nakładźe w LND wušła. Nazorna publikacija skići w kompaktnej formje stawizny Serbow, kotrychž najwažniše stacije hodźa so na zakładźe přehlada wo podawkach lochce sćěhować. Přeco zaso prašany je přehlad mjez wopytowarjemi Łužicy kaž tež mnohimi zajimcami za jeje mjezami.
Mostowe myto biskopej
Policija (03.03.17)
15 000 eurow škody
Porchow. Na A 4 mjez Ohornom a Porchowom dyrbješe wčera wječor 41lětny wodźer Opela haćenja wobchada dla borzdźić. Za nim jěducy 42lětny šofer Škodowki tole přepozdźe spózna a zrazy do Opela. Zranił so na zbožo nichtó njeje. Na woběmaj awtomaj pak nasta škoda něhdźe 15 000 eurow.
Maja reichsbürgerow we wizěru
Rěčnik Zhorjelskeho statneho rěčnistwa: W Serbach je tuchwilu měr
Zhorjelc (SN/mwe). Lětnje přeproša sej Zhorjelske statne rěčnistwo, kotremuž přisłuša wotnožka w Budyšinje, žurnalistow Hornjeje Łužicy na medijowu rozmołwu. Nimo nowin kaž Sächsische Zeitung abo Niederschlesischer Kurier wobdźělichu so na njej wčera popołdnju tež Serbske Nowiny.
Nowy nawjedowacy wyši statny rěčnik Josef Bauer wujasnjowaše přitomnym, zo ma Zhorjelske statne rěčnistwo tuchwilu 44 statnych rěčnikow, 27 w Zhorjelcu a 17 w Budyšinje. Dohromady ma wone 130 přistajenych, 44 z nich w Budyšinje. Z dalšich wuwjedźenjow Bauera wuchadźa, zo je ličba prawicarskich deliktow loni w Hornjej Łužicy rozrostła a zo wobdźěła zarjad cyłkownje něhdźe 50 000 jednanjow. Zwjeselaca powěsć bě, zo w Zhorjelskim statnym rěčnistwje tuchwilu žane skóržby nadběhow na Serbow dla njepředleža. „W Serbach je tuchwilu měr“, wuzběhny Till Neumann, rěčnik statneho rěčnistwa. Kak daloko so šćuwańca napřećo nam w socialnych medijach rozšěrja, njemóže wón posudźować.
Wo kormjerni a pěstowarni
Přihotuja wobjězdku
Tójšto zwoprawdźić móhli
Běła Woda (AK/SN). Město Běła Woda dóstanje lětsa wot energijoweho koncerna LEAG cyłkownje 350 000 eurow. Pjenjezy maja zarunać poćeženja wobydlerjow přez Wochožansku wuhlowu jamu. Tole předwidźi dojednanje wobeju stron wo dalšim zhromadnym dźěle.
Konkretnje dóstanje město za wobłuk hospodarstwo a zarjadnistwo 10 000 eurow. Dalšich 10 000 eurow dźe do wobłuka přiroda a wobswět, do kotrehož słuša hłownje wuhotowanje města. 190 000 eurow maja za žiwjensku kwalitu a infrastrukturu k dispoziciji, štož móža přede- wšěm za spěchowanje towarstwow, šulow a pěstowarnjow nałožić. 80 000 eurow je za kulturu kaž tež za ponowjenje sportowych arealow. 45 000 eurow dóstanje Běła Woda za hórnistwowe nadawki a 15 000 za wodowy naprawowy plan.
W Dobrošicach su tele dny wjesni mužojo dospołnje dodźeržany ...
Són wo „Krónje“ rozpłunył?
Nakup a wobhospodarjenje Budyskeje měšćanskeje hale „Króna“ njemóže město Budyšin financować. Zajim na filejowym kruchu pak dale je.
Budyšin (CK/SN). „Žadana płaćizna njeje jenož přewysoka, ale tež z prawniskeho wida njerealistiska.“ Z tymle wuprajenjom skónči Budyski financny měšćanosta dr. Robert Böhmer (njestronjan) na wčerawšim posedźenju měšćanskeje rady wšitke spekulacije, zo sprjewine město „Krónu“ kupi. Za 3,4 miliony eurow chce Berlinska předewzaćelska skupina Onnasch twar z wulkoparkowanišćom mjez Kamjentnej a Hornčerskej předać. Filejowy kruch to, kotryž po słowach někotrych radźićelow město njeměło wotpokazać. Wjacore frakcije běchu měšćanskemu zarjadnistwu nadawk dali nakup pruwować.
Wčerawša wotmołwa bě strózba. Po zasadach zlutniweho hospodarjenja, k čemuž je město winowate, „njepřińdźe nakup do prašenja“. Planowanych inwesticijow za twarske naprawy hač do lěta 2020 njejsu žane pjenjezy za nakup. Chcyli-li ju jako měšćansku halu dale wobhospodarjeć, dyrbjeli tójšto inwestować, rozkory bychu wotwidźomne byli.
Krótkopowěsće (02.03.17)
Opozicija žada sej wěstotu
Drježdźany. Zeleni a Lěwica žadaja sej wot sakskeho krajneho knježerstwa lěpši škit dawkipłaćerjow před móžnymi kóštami wudobywanja brunicy dla. Tak dyrbjało sej knježerstwo wot energijoweho zastaraćela LEAG, naslědnika Vattenfalla, najručišo wěstotne pjenjezy za pad hospodarskeje plajty žadać, zo njetrjebał stat nastate kóšty přewzać.
Inflacija dale přiběrała
Kamjenc. Inflacija w Sakskej je w februaru dale přiběrała. Po dotalnych wobličenjach su so twory wo 2,4 procenty podróšili, kaž Kamjenski statistiski zarjad zdźěla. Naposledk běchu tajke podróšenje w oktobru 2011 zwěsćili. Dróše su předewšěm žiwidła, bencin a diesel kaž tež tepjenski wolij.
Pitnu wodu potuńšić
Praha. Čěski wobswětowy minister Richard Brabec chcył pitnu wodu za woteběrarjow potuńšić. Po jeho zapodatym namjeće měł so nadhódnotowy dawk za wodu a wopłóčki wot dotal 15 na 10 procentow znižić. Zo bychu ludźo tež woprawdźe mjenje płaćić dyrbjeli, planuje Brabec natwar wosebiteho regulaciskeho zarjada kaž tež nowu formu wobličenja dobytka wodarnjow.
Jutrowne jejka z Mikowa po wšej Łužicy znate
Mikowčanka Beatris Sachse wobdźěla so wot lěta 2008 na wubědźowanju wo najrjeńše serbske jutrowne jejko. Tež za lětuše 64. wurisanje chce swoju kolekciju zapodać. Hač do jutřišeho pjatka je za to hišće chwile.
W fakultatiwnej wučbje serbšćina B na Hućinjanskej šuli je so Beatris Sachse jako dźewjećlětna z debjenjom jutrownych jejkow zeznajomiła. Tak su potom doma w Hućinje w swójbje jejka debili. Wukubłana šwalča za muži tule swójbnu tradiciju hač do dźensnišeho swěrnje dale wjedźe. Do jeje šwalčernje w Mikowje ludźo rady přichadźeja. W jutrownym času móža tam tež serbske jutrowne jejka z jeju wušikneju rukow kupować.
