Wokrjes SPN a Choćebuz přećiwo reformje
Baršć/Choćebuz (HA/SN). Hač do 10. měrca maja 14 wokrjesow a štyri bjezwokrjesne města w Braniborskej stejišćo k předwidźanej wokrjesnej reformje zapodać. Reforma předwidźi, zo ma cyłkownje dźewjeć wulkowokrjesow nastać. Nimo toho města Choćebuz, Brandenburg nad Habolu a Frankfurt nad Wódru swoju bjezwokrjesnosć přisadźa.
Wčera stej so hnydom dwaj parlamentaj w Delnjej Łužicy z naležnosću zaběrałoj a swoju poziciju k tomu formulowałoj: sejmik wokrjesa Sprjewja-Nysa (SPN) a Choćebuska měšćanska zhromadźizna. A wobaj parlamentaj staj při tym planowane noworjadowanje, kotrež tuchwilu jako „referentowy naćisk“ předleži, jasnje wotpokazałoj.
Na posedźenju wokrjesneho sejmika SPN w Baršću wotbłyšćowaše so zdobom politiska situacija w Braniborskim krajnym sejmje, w kotrymž knježaca koalicija SPD a Lěwicy za noworjadowanje přećiwo woli opozicije wojuje. Po dlěšej diskusiji wupraji so 27 zapósłancow CDU a mjeńšich frakcijow za wotpokazowace stejišćo wokrjesa, 17 zapósłancow SPD a Lěwicy bě přećiwo njemu.
Krótkopowěsće (23.02.17)
Wo iniciatiwje wuradźowali
Podstupim. Nutřkowny wuběrk Braniborskeho krajneho sejma je dźensa wo ludowej iniciatiwje přećiwo planowanej wokrjesnej reformje wuradźował. Iniciatiwa wojuje wo to, zachować dotalne 14 wokrjesow a štyri bjezwokrjesne města. Za to je 130 000 podpismow wobydlerjow znosyła. Knježerstwo chce dźewjeć wokrjesow wutworić.
Wodtke nastupi za Wjelcej
Wjelcej. Hannelore Wodtke z wolerskeje iniciatiwy „Zeleny přichod za Wjelcej“ kandiduje za wólby měšćanosty Wjelceje dnja 7. meje. Na wólbnej zhromadźiznje su ju čłonojo iniciatiwy wčera jednohłósnje nastajili. Ze swojim hesłom „Wodtke za Wjelcej“ chce so něhdyša zarjadniska fachowa přistajena nětko do wólbneho boja podać.
Stres na porodnych stacijach
Drježdźany. Dale přiběraca ličba porodow je chorownjam swobodneho stata dźeń a wjetše wužadanje. Předewšěm we wulkoměstach dźěłaja porodne stacije na hranicy swojich móžnosćow, kaž towaršnosć chorownjow Sakskeje informuje. Zamołwići pak tež kritizuja, zo su minjeny čas wjacore porodne kliniki we wjesnych kónčinach zawrěli.
Wosebitej wodźeni
Wojerecy (SN). Hród a měšćanski muzej we Wojerecach přeprošatej składnostnje swětoweho dnja wodźenja zajimcow njedźelu, 26. februara, na wosebitej wodźeni. Lětuše centralne hesło mjenowaneho dnja „Reform – Zeit für Veränderung“ bjerjetej Wojerowskej domaj po słowje a chcetej hosćom wuwiće hrodu a muzeja hač do dźensnišeho wobswětlić.
Na póstnicy a sankowanje
Budyšin (SN). Póstniski kónc tydźenja zasadźi wobchadny zwjazk Hornje Łobjo (VVO) wosebite busy z Budyskeho wokrjesa – mjez druhim z Rakec a Wojerec – do Drježdźan. Ze železnicu sej tohorunja derje z Kamjenca a Połčnicy do sakskeje stolicy dojědźeš. Wottam zasadźi VVO tež zymsko-sportowy-ekspres do wuchodnych Rudnych horin, a to na sněhakowarske póstnicy w Geisingu a na swětowy cup spěšnosankowanja w Altenbergu.
Policija (23.02.17)
Njezbožo zawinił a ćeknył
Budyšin. Jako chcyše wčera wječor wodźer Mercedesa klasy A za Budyšinom do směra na awtodróhu nalěwo wotbočić, přewidźa wón napřećo přijěducy Simson a zrazy do njeho. 16lětny mopedist a jeho 17lětny sobujěducy padnyštaj a so wobaj zraništaj. 72lětny zawinowar njezboža pak ćekny. Pozdźišo je so policiji přizjewił.
Paduši po puću byli
Budyšin. W Budyskim wokrjesu běchu zawčerawšim zaso paduši po puću. W Kamjencu pokradnychu na Wernera Reifowej wotstajeny Škoda, we Wojerecach 20 000 eurow hódny Audi TT a tohorunja w Kamjencu z firmy blisko dwórnišća měrjensku techniku.
Loni pjeć dańkow třělili
Nowoslicy (aha/SN). Nowosličanske hońtwjerske drustwo je wčera wječor w sydarni tamnišeho towarstwoweho domu swoju lětnu hłownu zhromadźiznu přewjedło. Předsyda drustwa Pětr Wawrij witaše wjetšinu ze 54 zapisanych čłonow, kotřiž přewostajeja wotnajerjam cyłkownje 354 hektarow přewažnje polow a łukow, pak tež lěsow.
W mjenje wotnajenskeho zhromadźenstwa, kotremuž přisłušataj tež hajnikaj-hońtwjerjej Maćij Kral a Frank Kocor, rozłoži Günter Winter hońtwjerski wunošk minjeneho lěta. Tak su cyłkownje pjeć dańkow třělili. Dalši bu při wobchadnym njezbožu morjeny. Dale běchu to 16 sornow, štyri šupy a kunjacy pos. Wunošk minjeneho lěta maja hońtwjerjo delanskeho drustwa za spokojacy. Nimaja dźě w swojim rewěrje kruty, ale jeničce rědki měnjaty wobstatk dźiwiny. Jako dobre woni wobhladuja zo njemějachu w rozprawniskej dobje wjelkow dla na wotnajatych honach žane škody.
Ćežišća su šule, dróhi a wobory
Wojerecy dale konsekwentnje swój dołh pomjeńšeja. Tole podšmórny wyši měšćanosta Stefan Skora (CDU) wčera na wobydlerskej zhromadźiznje k hospodarskemu planej 2017.
Wojerecy (AK/SN). Wot lěta 2008, tak Wojerowski wyši měšćanosta wujasnjowaše, je so dołh hižo jasnje pomjeńšił. Wot 27,2 milionow eurow kónc minjeneho lěta ma so wón do lěta 2020 hač na 23,2 milionaj eurow wottwarić. Zadołženje ma so wot tuchwilu 808 eurow na wobydlerja na 731 eurow redukować. „Chcemy trajnje wotpłaćować, zo bychmy přichodne lěta móžnosće inwesticijow měli. Ležimy pod zakonsce postajenej směrnicowej hódnotu w Sakskej, kotraž wučinja 850 eurow dołha na wosobu“, Stefan Skora rozłoži.
Dirk Albers (zady naprawo), nawoda předsydstwa Budyskeje wokrjesneje ...
Krótkopowěsće (22.02.17)
Schulz w Delnjej Łužicy był
Lubin. Kanclerski kandidat SPD Martin Schulz je dźensa Braniborsku a w tym zwisku tež Delnju Łužicy wopytał. Mjez druhim poby w Lubinje, hdźež jemu „Syć za strowe dźěći“ předstajichu. Tam so čestnohamtscy wo młode swójby staraja. Braniborski ministerski prezident Dietmar Woidke (SPD) Schulza přewodźeše.
Za Dźeń Saksow so přizjewić
Lubij. Towarstwa, zwjazki, institucije a dalše móža so hišće hač do srjedy, 1. měrca, za lětuši Dźeń Saksow w Lubiju přizjewić. Po mjenowanym terminje próstwy wo spěchowanske srědki hižo njewobkedźbuja, kaž statna kenclija w Drježdźanach zdźěli. Swobodny stat spěchuje wobdźělenje z přiražkami za jězbne wudawki, zastaranje a přenocowanje.
Nowe zawrjene pasma
Budyšin. Po tym zo běchu tydźenja při Olbaskim jězorje a w Rakecach dalšej padaj ptačeje gripy zwěsćili, je Budyski krajnoradny zarjad za wobě kónčinje škitne naprawy wukazał. Tak njesmědźa psy a kóčki hižo bjez dohlada wonka być. Plahowarjo pjerizny a wikowarjo mjasa maja přidatne naprawy wobkedźbować. Ludźo maja so w interneće wobhonić.
Bubony a spěwy po cyłym domje słyšeć byli
Smochćicy (aha/SN). „Hudźba je dar Boži a zwjesela čłowjeka.“ Takle wopisowaše Martin Luther wuznam hudźby za wěru a dušu. Po tychle słowach so mějo wuhotowachu w Smochčanskim Domje biskopa Bena lětuše dny dźědow a wowkow zhromadnje z wnučkami mjeztym 22. raz, a to pod hesłom „Hudźba zwjesela“.
Gratownju wutwarja
Radwor (SN/MkWj). Radźićeljo gmejny Radwor su wčera na swojim posedźenju dalšu kročel k zwoprawdźenju naročneho projekta zmištrowali: W zwisku z planowanym powjetšenjom Chelnjanskeje gratownje dobrowólneje wohnjoweje wobory přerjadowachu woni financy. Gratownja je dźěl inwesticiskeho projekta, kotryž běchu loni w zwisku z nowym fondsom sakskeho knježerstwa „Mosty do přichoda“ naćisnyli. Nimo rozšěrjenja gratownje chcedźa sej w Radworju ze srědkow knježerstwa nowe jězdźidło za gmejnski twarski zawod kupić a sej za jeho techniku nowu halu natwarić. Nowa gratownja w Chelnje ma cyłkownje 134 000 eurow płaćić.
Ze spokojenjom móžeše Pětr Kliman, kiž na wčerawšim posedźenju Radworskeho wjesnjanostu Wincenca Baberšku (CDU) zastupowaše, připowědźić, zo je twar wodowoda za Łupjansku gratownju wohnjoweje wobory nětko zawěsćeny. Wjele lět běchu wo wodowód wojowali. Projekt bě pak stajnje zaso na wysokich twarskich kóštach zwrěšćił.
