Znowa serbske napisy přemórane
Krótkopowěsće (18.07.17)
Na wjelčicu třělane było
Rěčicy/Berlin. Wjelčica, kotraž bu spočatk julija na B 156 mjez Blunjom a Zabrodom přejědźena, je na sćěhi njezboža zahinyła. To je Leibnizowy institut za coologiske a dźiwinowe slědźenje w Berlinje zwěsćił. Zdobom namakachu w ćěle zwěrjeća šrótowe kulki, štož rěči za to, zo bu na nje třělane. Wot spočatka lěta su w swobodnym staće hižo šěsć mortwych wjelkow namakali.
Sta woporow namocy
Regensburg. Znajmjeńša 547 spěwarjow chóra Regensburger Domspatzen je so swój čas z woporom ćělneje a splažneje namocy stało. Tole wuchadźa z dźensa předpołoženeje kónčneje rozprawy wo skandalu znjewužiwanja w swětosławnym chórje dla. Prawiznik Ulrich Weber bě pady, kotrež stachu so wot 1945 do spočatka 90tych lět, dokumentował.
William a Kate w Pólskej
Krótkopowěsće (17.07.17)
Wjace ekoratarstwa
Drježdźany. Ekologiske ratarstwo w Sakskej so dale rozšěrja. Lětsa je dotal 620 zawodow próstwu wo wotpowědne spěchowanje zapodało, 15 procentow wjace hač loni w samsnym času, kaž sakske ratarske ministerstwo zdźěla. Płonina, na kotrejž ekologiske ratarstwo praktikuja, je wo 28,5 procentow na cyłkownje 52 400 hektarow rozrostła.
Sakska wažne stejnišćo VW
Drježdźany. Sakska je awtotwarcej Volkswagen dale „zasadnje wažne stajnišćo“. Tole je šef koncerna Matthias Müller nowinarjam wobkrućił. Při tym wón kompetencu sobudźěłaćerjow a jich wukubłanje wosebje wuzběhny. Eksistenca cyłkownje štyrjoch twornjow w swobodnym staće je po słowach Müllera zaručena.
Hladanje přiwuznych zapłaćić
Praha. Čěski parlament je přiwzał nowelu zakonja wo chorobnym zawěsćenju, zmóžnjacu domjace hladanje chorych přiwuznych. Po njej změja ludźo prawo na hač do tři měsacy płaćeneho zastaranskeho dowola. W tym času dóstanu woni 60 procentow mzdy. Z wuwzaćom pada chutneho wohroženja dalewobstaća firmy dyrbi dźěłodawar potrjechenym dowol zmóžnić.
Serbska reja městno nadešła
Lipsk (gk/SN). Młoda skupina Serbska reja je minjeny pjatk wječor w Lipšćanskim rewijowym dźiwadle TheaterPack dalši spodobny wječork organizowała. Młódši a starši rejwarjo z Lipska, Serbja a přećeljo, su na mału, ale rjanu žurlu přichwatali. Přewodźejo wot hercow rejwachu woni polku, walčik abo teptachu lóštne koło. Započatkarjo móžachu zakładne kroki nawuknyć. Zaklinčeli su nimo rjanych serbskich tež pólske, němske a skandinawiske pěsnje, a to na akordeonje, fleće, nykelharpje, gitarje, na huslach kaž tež kontrabasu.
Projektna skupina Serbska reja so jara wjeseli, zo je w dźiwadle TheaterPack městnosć nadešła, hdźež móže wotnětka stajne zarjadowanja w Lipsku organizować. Wšako ma skupina ze swojim fokusom na serbsku a słowjansku hudźbu w Němskej mału nišu. Wo tym móžachu so hosćo tež na njedawnym folklornym festiwalu w Chrósćicach předswědčić. Serbska reja wjeseli so na přichodny wječork, kotryž budźe 11. awgusta, a to wězo w TheaterPack.
Lipowe łopješko před pomnikom
Policija (17.07.17)
Awto z mosta zjěło
Prěčecy. Jako bě wčera připołdnju pólski wodźer Forda na awtodróze A 4 ze Zhorjelca do směra na Drježdźany po puću, wón na mosće pola Prěčec naraz kontrolu nad wozdźidłom zhubi a zleća z awtom pjeć metrow hłuboko na puć pod mostom. Šofer a sobu jěduca wosoba měještaj wulke zbožo a so jenož lochko zraništaj. Ford so dospołnje skóncowa. S 100 dyrbjachu wjacore hodźiny zawrěć.
Statokaj z grafitijemi pomórali
Kulow. W nocy na 15. julij su njeznaći na Młynskej hasy w Kulowje statokaj z grafitijemi pomórali. Za wobsedźerjow nasta wěcna škoda po něhdźe sto eurach.
Wotstronja škody wody dla
Z kupanskimi wanjemi so honili
Na a při Brězowskim jězoru wotmě so kónc tydźenja Neptunowy swjedźeń. Jedyn z wjerškow bě wubědźowanje z kupanskimi wanjemi. Tež trabijowy cross přihladowarjow wabješe.
Brězowka (JoS/SN). Najebać njewjedro z hrimanjemi a šwihelemi bě wot pjatka do wčerawšeho wjele ludźi tež z Hornjeje Łužicy při Brězowskim jězoru. Kaž kóžde lěto dožiwichu tam znowa wulkotny Neptunowy swjedźeń.
Wulke wjeselo mjez přihladowarjemi knježeše, jako so tróšku kołwrótni z kupanskimi wanjemi po wodźe honjachu. Dźesać originelnych wódnych jězdźidłow, kotrež běchu wobdźělnicy z fantaziju natwarili, so na hołku a tołku wobdźěli. Wubědźowanje bě přewšo napjate. A skónčnje su so małe a něžne wódne žony při wjesłowanju wuspěšnje přećiwo bězmanskim musklam přećiwnikow elegantnje přesadźili. Jako prěnja dźě bě šikwana módra niksa Brězowskeho młodźinskeho kluba pjericu wódneho muža hubkowała.
Smječkečenjo rjenje swjećili
Wjesoła třidnjowska nalada znowa tójšto hosći do wsy wabiła
Smječkecy (aha/SN). Kaž kóždolětnje bě winicowy kónc tydźenja přiwabliwy swjedźeń wjesnjanam, ale tež mnohim wopytowarjam z wokolnych wsow.
Handrij Hejduška, kiž steji mjeztym sydom lět na čole 1998 załoženeho wjesneho kluba ze swojimi 35 čłonami, je wčera na zakónčenju dobru podpěru wohnjoweje wobory, młodostnych a dalšich wjesnjanow při natwarje swjedźenišća hódnoćił. Tak wuzběhny tež wuběrny serwis Dinarjec swójby z Nowoslic, kotraž je za swjedźeń stan, blida a ławki přewostajiła, tak zo knježeše hižo pjatk k zazběhej na openair-kinje z wubranymaj filmomaj dobra nalada.
Statnu dróhu w Němcach móža skónčnje wutwarić
Němcy (SN/MWj). Za wutwar statneje dróhi S 95 w Němcach je město Wojerecy spěchowanske srědki přizwolene dóstało. Wotpowědne wopismo přepoda statny sekretar w sakskim ministerstwje za hospodarstwo, dźěło a wobchad Stefan Brangs dźensa Wojerowskemu wyšemu měšćanosće Stefanej Skorje. W Němcach chcedźa S 95 dospołnje wutwarić, a to po 1 120 metrach wot spočatka wsy ze směra Kulowca hač k awtowemu domej krótko do amploweho křižowanišća na zwjazkowej dróze B 97. Nimo toho matej tam chódnik nastać a mosćik nad Wincencowej hrjebju. Dohromady inwestuja do wutwara dróhi 3,45 milionow eurow. Kaž zdźělichu, chcedźa z twarskimi dźěłami klětu nalěto započeć.
Tohorunja dźensa je Stefan Brangs přepodał přirjadnicy Budyskeho krajneho rady Birgit Weber přizwolenske spěchowanske wopismo za wutwar wokrjesneje dróhi K 9207 wot Mučowa do Hórnikec.
