Policija (30.08.17)
Drohe koleso pokradnyli
Łaz. Triatlonowe wubědźowanje sobotu při Třižonjanskim jězoru pola Łaza su paduši za njeskutk znjewužiwali. Woni pokradnychu tam blisko jězora běłe koleso typa Trek Speed Concert. 48lětny wobsedźer trochuje hódnotu swojeho jězdźidła na něhdźe 4 500 eurow. Policija nětko za napadnym wubědźowanskim kolesom pyta.
Hrjebje dale a wuznamniše
Budyšin (JK/SN). Mnohe hrjebje, wosebje podłu gmejnskich pućow, njejsu hižo w tym stawje, zo bychu wotpowědowali swojej bytostnej funkciji: wotwodźeć wodu po zliwkach z dróhow a polow do směra na přichodnu wjetšu rěku. Přiběrajcy jewjachu so na wuradźowanjach gmejnskich radow Budyskeho wokrjesa w minjenych měsacach žadanja wobydlerjow a radźićelow za tym, zhromadnje postupować, zo bychu přirowy podłu dróhow zaso fungowali. W zajimje škita ludnosće kaž tež towaršnostnych a priwatnych zajimow je trjeba so tomule nadawkej na wsach zhromadnje wěnować.
W Njeswačanskej gmejnje maja hižo dobre nazhonjenja zhromadnje ze Zarěčanskim ratarskim zawodom. Njedaloko Łuha znowa wuzběhane přirowy zamóža nětko wulke mnóstwa wody přiwzać a bjez stracha za wobsydstwo wobydlerjow wodu do bliskich přirodnych rěčnišćow wotwjesć. Tež ratarske zawody maja swój wužitk z toho. Dobra póda zwostawa na polu abo znajmjeńša w přirowje. Tak njetrjebaja přidatnje dróhi a puće rjedźić a drohotnu zemju zaso wróćo na pola wozyć.
Mjenje městna na Třělnišću
Budyšin. Dźeń Saksow wot 1. do 3. septembra w Lubiju wuskutkuje so hač do Budyšina. Tu budźe w tym času na Třělnišću mjenje parkowanskich městnow. Přičina je, zo zarjaduja tam busowy serwis, kotryž ma prošenych hosći ze sprjewineho města hač do Lubija dowjezć.
Na torhošću zaso twarja
Kamjenc. Po Kamjenskej Boršći nětko na torhošću Lessingoweho města dale twarja. Tam wěnuja so třećemu twarskemu wotrězkej direktnje před radnicu. Paralelnje k tomu přihotuja instalaciju nabiwanskich stacijow za elektroawta. Te chcedźa po wšěm zdaću za tři tydźenje před bywšim Asia-wobchodom a před Gartenec pjekarnju nastajić. Za čas twarskich dźěłow wostanu wobchody runje tak kaž radnica pěškam přistupne.
Informuja wo studiju
Budyšin. Powołanski informaciski centrum Budyskeje agentury za dźěło přeproša młodostnych na informaciske zarjadowanje jutře, štwórtk, w 16 hodź. Mišnjanska fachowa šula za zjawne zarjadnistwo předstaji tam studijne móžnosće w powšitkownym a socialnym zarjadnistwje. Zajimcy njech přizjewja so pod telefonowym čisłom 03591/ 661 410.
Tři wuznamne wosobiny sej zbližili
Na popołdnišim wulěće Domowinskeje skupiny Budyšin-město zeznajomichu so čłonki a čłonojo njedawno z třomi zasłužbnymi mužemi, kotřiž běchu so w blišej domiznje narodźili a na wšelakore wašnje spomóžnje za swój lud skutkowali. W Hornjej Hórce narodźi so nahladny ryćerkubler a prawiznik a přiwšěm skromnje žiwy Jan Michał Budar. Jeho žiwjenje předstaji wulětnikarjam při jeho ródnym domje Helmut Gros. Na skutkowanišću fararja a přełožowarja Michała Frencla w Budestečanskej cyrkwi zbliži nam dr. Lucija Hajnec dźěło a wuznam tohole sobuzałožerja hornjoserbskeje rěče. Na třećej staciji w Delanach spomni předsydka skupiny Hilža Nukowa na fararja a kěrlušerja Jana Kiliana. Woblubowany kěrlušer je serbskich wupućowarjow do Texasa nawjedował, jim w nowej domiznje w maćeršćinje prědował a jich na ćežkim započatku přewodźał.
Při zabawje a słódnej jědźi w Kubšiskej Čerwjenej korčmje skónči so zajimawa kołojězba při miłym wjedrje po rjanej blišej domiznje. Jurij Łušćanski
Serbskosć do jubileja zapřijeć
Město Wojerecy chce klětu swój 750. jubilej hódnje woswjećić. Za to je měšćanska rada wčera koncept wobzamknyła. Nimo toho přepodachu zwěrjencowej a kulturnej towaršnosći nadawk, swjedźeń organizować.
Wojerecy (AK/SN). Z wufilowanym konceptom chce město Wojerecy klětu 750. róčnicu wobstaća swjećić. „Je to jubilej cyłeje měšćanskeje towaršnosće. Ćežišćo budźe swjedźenski tydźeń w septembru, k čemuž sej tež hosći z partnerskich komunow přeprosymy.“ Tole podšmórny socialny měšćanosta Thomas Delling, kiž nawjeduje dźěłowu skupinu 750 lět Wojerecy, na wčerawšim posedźenju měšćanskich radźićelow. Woni při sydom wzdatych hłosach frakcije CDU a Michaela Rennera (Aktiwne Wojerecy) wobzamknychu, zo ma tamniša zwěrjencowa a kulturna towaršnosć swjedźeń přihotować a přewjesć.
Maltezojo Worklecy wopušća
Ambulantna hladanska słužba přećehnje w oktobru do Kamjenca
Worklecy (SN/MWj). Tukało je so hižo dlěje, nětko je oficialne, zo ambulantna hladanska słužba maltezow Worklecy wopušći. Nawodnica Marika Nowakowa a jeje 45 sobudźěłaćerjow přećahnu hač do spočatka oktobra do twarjenja na Christiana Weißmantelowej 12 w Kamjencu, rěka w nowinskim wozjewjenju maltezow. „Nowa městnosć změje swojeho centralneho połoženja a bliskosće ke chorowni swj. Jana dla wulke lěpšiny za dźěło ambulantneje hladanskeje słužby“, rěka we wozjewjenju. Mjez druhim planuja rěčne hodźiny za poradźowanske rozmołwy w přizemju chorownje.
Krótkopowěsće (29.08.17)
Wobruči awta wobškodźili
Budyšin. Njeznaći su awto wólbneju pomocnikow Lěwicy w Budyšinje wobškodźili. Kaž strona wčera zdźěli, běštaj pomocnikaj njedźelu wječor plakaty připrawiłoj. Při tym bě jimaj něchtó dwě wobruči awta rozkałał. Kaž Lěwica dale piše, wobkedźbuja lětsa wosebje wjele wěcnych wobškodźenjow. Tak su plakaty pomórane, roz- abo samo zwottorhane.
Manufaktura wuznamjenjena
Wjazońca. Wosebite wuznamjenjenje sakskich rjemjeslniskich komorow dósta wčera manufaktura Saxonia Feinsteinzeug ze sydłom we Wjazońcy. We wobłuku swjedźenskeho zarjadowanja spožčenja Sakskeho statneho myta za inowaciju přepodachu předewzaću myto inkluziwnje 5 000 eurow.
Spřećiwjeja so planam ČEZ
Nový Bor. Sewjeročěske město Nový Bor kaž tež wokolne gmejny wojuja přećiwo planam energijoweje firmy ČEZ čary wysokich elektriskich sćežorow 110 kilovoltow dla. Namjetowany 30 kilometrow dołhi wusyk měł cyłe čěske Łužiske hory přeprěčić. Potrjecheni so boja, zo 40 metrow wysoke sćežory panoramu horin wobškodźa a tak zdobom turistiskemu zwičnjenju škodźa.
Přećiwo pawšalnemu wotwołanju
Frakcije CDU, Swobodnych wolerjow a FDP w Budyskim wokrjesnym sejmiku su za to, zwołać wurjadne posedźenje sejmika nastupajo komunikaciju prěnjeho přirjadnika krajneho rady Uda Wićaza (CDU) z mužom NDP. Wone pak maja za wopačne wo wotwołanju rěčeć, doniž wšitke pozadki Wićazoweho jednanja wuswětlene njejsu.
Při pjecy so zhromadnje zetkali
Njebjelčicy (AKr/SN). Wuměłstwowy bus pod hesłom Lauter Leise Sommertour bě minjeny tydźeń w Budyskim wokrjesu po puću a je sobotu popołdnju tohorunja w Njebjelčicach pozastał. Tu je domizniske a kulturne towarstwo swójbny swjedźeń při pjecy na swjedźenskej łuce organizowało. Mały swjedźeń započa so ze zhromadnym kofejom a tykancom. K tomu móžachu wopytowarjo na modernu lyriku słuchać. Udo Tiffert předstaji někotre ze swojich basnjow. Za dźěći bě spřihotowane blido za ćišćenje. Do winyla móžachu wone naškrabać swójski motiw, na kotryž namazachu barbu, tak zo skónčnje wućišćany wobraz nasta.
Wo hudźbu postara so skupina Serbska reja. Jeje čłonojo přewjeduja rejwanske workshopy w Lipsku, we Łužicy a wšudźe tam, hdźežkuli jich přeprošeja. Tam hudźa a pokazuja serbske kružne reje abo polonezu, za kotruž žanoho partnera njetrjebaš. Tež w Njebjelčicach na te wašnje někotrych zajimowanych za reju zdobychu.
Policija (29.08.17)
Při wotbóčce prasnyło
Słona Boršć. Při wotbóčce awtodróhi A 4 w Słonej Boršći je so wčera rano ćežke wobchadne njezbožo stało. Krótko po 7 hodź. je wodźer Seata napřećo přijěducy Pickup přewidźał a frontalnje do njeho zrazył. Na to zajědźe Pickup hišće do Lkw-ja, kotryž chcyše awtodróhu runje wopušćić. Wodźerjej wosoboweju awtow so ćežko zraništaj, tak zo dyrbjachu jeju do chorownje dowjezć. Nimo wjacorych wuchowanskich jězdźidłow běchu tež wohnjowe wobory zasadźene. Wobornicy starachu so wo wuběžane ćěriwo a su zhromadnje z policiju statnu dróhu S 106 zaraćili. Na wobdźělenych jězdźidłach nasta něhdźe 30 000 eurow škody.
Pod wliwom alkohola jěła
Smjerdźaca. Při kontroli Audija zawčerawšim wječor w Smjerdźacej je policiji „chorhojčka“ 64lětneje wodźerki napadnyła. Při tesće so wukopa, zo měješe žona 0,92 promilow alkohola w kreji. Na to jej dalšu jězbu zakazachu. Wona změje nětko 500 eurow pokuty płaćić, dyrbi měsac nóžkować a dóstanje nimo toho dwaj dypkaj w Flensburgu.
