Němcy (AN/SN). Swoju hłownu a wólbnu zhromadźiznu přewjedźechu tele dny čłonojo Němčanskeho hońtwjerskeho drustwa.

Beno Domanja w mjenje předsydstwa je nimale 50 čłonow serbsce witał. Dotalny a po wólbach nowy předsyda Jurij Čórlich wuzběhny wosebje dobre zhromadźenstwo, kotrež wotbłyšćuje so při dźěle kaž tež tež při lětnim grilowanskim wječoru, štož tež wjesnemu zhromadźenstwu tyje. Nastupajo rjedźenje lěsnych hrjebjow so dojednachu, zo čłonojo, kotřiž so njemóža wobdźělić, zastupjerja sćelu respektiwnje financny přinošk zapłaća.

Spokojom wupraji so Čórlich wo wobstatku dźiwiny. Hońtwjerjo třělichu loni 16 sornow, dwě dalšej staštej so z woporom njezboža, dwaj jelenjej, dwanaće dźiwich swini, 14 liškow a dwanaće šupow.

Ralbicy (PR/SN). Na mnohich cyrkwinych wěžach wuhladaš wětrowu chorhojčku, pokazowacu směr wětřika. Starym hospodarjam bě wona předewšěm za čas žnjow wjedro připowědźała. W Ralbicach je to kaž lědma druhdźe město chorhojčki z lětoličbu natwara cyrkwje pozłoćany kapon. Wón pak je w minjenym času trochu njespušćomny. Ze snadnišim wětřikom so hižo prawje njewjerći. Tuž so nětko monter z pomocu krana njespušćomnemu wěšćerjej wjedra wěnuje, zo by kapona sporjedźał. Jutře dopoł­dnja w dźesaćich móža wjesnjenjo a dalši zajimcy tónle njewšědny podawk w Ralbicach sobu dožiwić.

Postupowanje přećiwo rozšěrjenju kormjernje swini wobzamknyli

Róžant (JK/SN/JaW). Přećiwo rozsudej Budyskeho wokrjesa, dowolić rozšěrjenje Ralbičanskeje kormjernje swini, zapoda gmejna Ralbicy-Róžant spřećiwjenje. Zdobom zapoda komuna skóržbu přećiwo hnydomnemu zwoprawdźenju dowolnosće kormjernju rozšěrić. Tole­ wobzamknychu gmejnscy radźićeljo na swojim wčerawšim wurjadnym po­sedźenju. Nimo toho chcedźa Ka­mjeni­čanskemu prawiznikej Raikej Pe­tzoldej nadawk přepodać, zo by gmejnu w boju přećiwo rozšěrjenju kormjernje prawnisce pod­pěrał.

Dale radźićeljo wčera rozsudźichu so wo to prócować, zo nima so Jitkowski puć hižo za zastaranje kormjernje wužiwać. Puć je gmejnski a tuchwilu w jara špatnym stawje. Delanska gmejna ma wotpohlad, jón klětu po­nowić. Trěbne srědki chce sej hač do toho na­lutować.

Worklečanska gmejna bě dotal jedna z mało, hdźež móžachu wobydlerjo swoje zahrodkowe wotpadki a samo nuklacy hnój darmotnje wotbyć. Tónle čas pak je nětko doskónčnje nimo.

Worklecy (SN/MWj). Z dweju stron wjedźetej pućikaj na kromje Worklec k městnu, hdźež móžachu wobydlerjo gmejny wjele lět wotsyčenu trawu, lisćo, zbytki zahrodowych rostlin a podobne wotbyć, a to darmotnje. Mjeztym pak je přijězd k tak mjenowanemu Psyčemu kěrchowej z wobeju bokow zawrjeny a zawěra z wotpowědnym wobchadnym znamjenjom wuhotowana. Wotpadki wotbyć je tam wotnětka zakazane.

Wjesnjanosta Franc Brusk (CDU) tónle krok wokrjesneho wobswětoweho zarjada jara wobžaruje, ma pak za njón zrozumjenje. „Mi je jara škoda, zo po telko lětach tule přijomnu móžnosć darmotneho wotwožowanja rostlinskich wotpadkow zhubimy, jenož dokelž so jednotliw­- cy z gmejny, ale tež zwonka njeje zadźeržeć njewědźa“, praji wjesnjanosta. Na tele skerje zdwórliwe wašnje wón wopisuje, kak je so minjene měsacy połoženje na Psyčim kěrchowje přiwótřiło.