Policija (25.01.17)
Hodowny štom so palił
Połčnica. Mjeztym zo su mnozy swój hodowny štom hižo wotbyli, wón w jednym bydlenju w Połčnicy hač do wčerawšeho přeco hišće z wóskowymi swěčkami wudebjeny steješe. Něhdźe w 17.30 hodź. pak jedna ze swěčkow hałžku zapali, na čož so sekundy pozdźišo cyły štom paleše. 73lětnej wobydlerce so poradźi z přikrywami a wohnjohašakom płomjenja podusyć, prjedy hač alarmowana wohnjowa wobora přijědźe. Zranił so nichtó njeje, škoda wučinja 5 000 eurow.
Nowy wodowód bjezdomnym
Na swojim lońšim poslednim posedźenju je Łazowska gmejnska rada wobzamknyła, za něhdźe 66 000 eurow kłasć nowy wodowód ke gmejnje přisłušacemu twarjenju w Złyčinje. We wjaceswójbnym domje bydlitaj bjezdomnaj.
Spodobne programy předstajeli
Z dźěćimi w pěstowarnjach a zakładnych šulach ptači kwas swjećili
Radwor/Wotrow/Hory (SN/MWj). Za pěstowarnje a zakładne šule Hornjeje Łužicy njeje ptači kwas jenož jedyn z najwoblubowanišich nałožkow, ale naskerje tež tón, kiž je z najwjace přihotami zwjazany. Bjez dźiwa tuž, zo mějachu kubłarki a wučerki, ale tež njeličomne pomocnicy minjene dny ruce połnej dźěła, zo by za dźensniši wulki swjedźeń wšitko prawje sedźało, drasta runje tak kaž ptačokwasny program. Tajki su na přikład holcy a hólcy Radworskeho dźěćaceho domu dźens dopołdnja dźědam a wowkam na farje pokazali. Na čole kročachu njewjesta Madlenka Kralec, nawoženja Titus Wićaz a braška Benedikt Hicka.
Tež Wotrowska pěstowarnja je hižo dopołdnja swój program na tamnišej starej šuli předstajiła. Tak skićeše so znowa rjany wobraz, jako kwasny ćah z njewjestu Samiru Smolic, nawoženju Janom Brycku a brašku Walentinom Simonom po puću ćehnješe. W šuli dožiwichu starši, dźědojo a wowki kaž tež dalši wosadni basnički, spěwčki a rejki.
Camprowarjo zaso po puću
Pytaja dale za zmylkom
Pančicy-Kukow (SN). Milinowy zastaraćel ENSO pyta dale napjeće za přičinu, čehodla je minjene dny we wulkim dźělu Pančic-Kukowa nadróžne wobswětlenje wupadnyło. Na wjacorych pućach so wot srjedź zašłeho tydźenja nadróžne lampy njeswěćachu. Zdźěla wone mjeztym zaso funguja. Kaž wjesnjanosta Markus Kreuz (CDU) wobkrući, su fachowcy ENSO městnosć zmylka wobmjezowali a tam dokładnišćo za nim pytaja. Hač jedna so wo złamany kabl abo hač je něhdźe zawěstka defektna, dotal znate njeje.
Čitaja na dnju wopomnjeća
Najrjeńši wobraz mytowali
Pančicy-Kukow (SN/MWj). Kamjenska pěstowarnja Němskeho čerwjeneho křiža (DRK) je dobyła wubědźowanje, ke kotremuž bě zapósłanc Sakskeho krajneho sejma Alojs Mikławšk (CDU) we wobłuku swojich lońšich adwentnych wopytow we wosom dźěćacych dnjowych přebywanišćach swojeho wólbneho wokrjesa namołwjał. Tehdy bě wón dźěćom přepodał wobrazowy ramik z kisanja (Sauerteig), do kotrehož mějachu wone rjany wobraz z přirodnych maćiznow stworić.
Ramik bě pjekarnja Mika Zelnaka w Pančicach-Kukowje napjekła. „Wjeselu so, zo su w jednotliwych pěstowarnjach kreatiwnje a zahoriće rjane motiwy stworili“, praji Mike Zelnak. Wón je nětko hromadźe z prezidentom zjednoćenstwa sakskich rjemjeslnikow Rolandom Ermerom a Alojsom Mikławškom najrjeńši wobraz mytował. Jako myto smědźa holcy a hólcy Kamjenskeje pěstowarnje Pančičansku pjekarnju wopytać a budu w njej poprjancy pjec. Hromadźe z pjekarjom pak tež někotre strowe pizzy do kachli sunu.
Policija (24.01.17)
Hižo rano dospołnje pjany
Horni Wujězd. Zastojnicy Budyskeho policajskeho rewěra su wčera něhdźe w 6.30 hodź. na awtodróze A 4 pola Hornjeho Wujězda dospołnje pjaneho wodźerja awta dosahnyli. Wjacori šoferojo běchu so pola policije přizjewili a wo awće rozprawjeli, kotrež runjewon njejědźe. Nimo toho je jeho wodźer wosrjedź jězby nastajnosći durje awta wočinjał. Policisća wuhladachu w Danskej přizjewjeny Suzuki na kromje awtodróhi stejo. 37lětny šofer móžeše so lědma na nohomaj dźeržeć. Alkoholowy test pak dospołnje wopity wotpokaza. Zastojnicy tuž přikazachu, zo ma so jemu krej brać, a wzachu muža sobu na rewěr.
Wikowarjo drogow před sudnistwom
Za atraktiwniše adwentne wiki
CDU, Zeleni a Pegasus žadaja sej wubědźowanje wo najlěpši koncept
Budyšin (CK/SN). Je hišće wjele potenciala, zo stanu so Budyske Wjacławske wiki jako jedne z najstaršich w Němskej atraktiwniše. Tole praji měšćanski radźićel Měrko Brankačk (Pegasus). Wón na wikach předewšěm serbske elementy paruje. Wojerowske dźěćatko drje kóžde lěto adwentne wiki wopytuje a při jednotliwych předawanišćach Brankačk tež někotrych Serbow wuhlada, ale serbskeho předawanišća njeje. „Kak hodźał so tajki organizować, wo tym zadani so hladajo na serbskich wopytowarjow a mnohich hosći z Pólskeje a Čěskeje rozmyslować“, praji dźiwadźelnik NSLDź. Zo so wiki kaž loni nimale tydźeń do hód nadobo kónča, njesměło so wospjetować. Přirunajomne města kaž Annaberg-Buchholz pokazuja, zo lěpje dźe. Dokelž dyrbjało so na tudyšich adwentnych wikach kulturnje a koncepcionelnje wjace stać, podpěruje Měrko Brankačk namjet, kotryž frakcija CDU, Claus Gruhl (Zeleni) a wón na jutřišim posedźenju Budyskeje měšćanskeje rady předpołoža.
Dožiwjenski muzej wjele lubi
Wojerecy budu wot přichodneje soboty wo atrakciju bohatše. Tón dźeń mjenujcy wotewru wosrjedź města nowy Zusowy kompjuterowy muzej.
Wojerecy (UH/SN). Po tym zo bě Konrada Zusowy kompjuterowy muzej 20 lět na Wojerowskej industrijowej přestrjeni, potajkim cyle na kromje města, dožiwi město nad Čornym Halštrowom sobotu, 28. januara, zawěrno hwězdnu hodźinu. Přetož dawno přemały kompjuterowy muzej dóstanje swój nowy domicil w přetwarjenym wysokodomje na Bonhoefferowej 1-3, potajkim wosrjedź města. Tónle měznik měšćanskich stawiznow chcedźa tón dźeń wot 10 do 17 hodź. ze wšitkimi wobydlerjemi a dalšimi wopytowarjemi woswjećić.
