Policija (26.03.18)
Kosmetiku kradnyli
Budyšin. Komisar připad je sobotu popołdnju na Delnjokinjanskej dróze w Budyšinje pomhał, padustwo wuslědźić. Při wobchadnej kontroli zadźeržachu policisća wosobowe awto typa VW. W nim namakachu 16 bleškow parfima, dźesać hubnych barbjenčkow a kablej za nabiwanje smartphona. Kaž so při dalšich přepytowanjach wukopa, běchu 21lětna žona kaž tež mužej w starobje 27 a 33 lět twory w hódnoće trochu wjace hač 300 eurow w bliskim nakupowanišću pokradnyli. Młoda žona měješe nimo toho drogi při sebi, rěka w rozprawje Zhorjelskeje policajskeje direkcije.
Za akciju so přizjewić
Kołbaski město wožiwili
Cyle w znamjenju Kamjenskeje kołbaski steješe wčera centrum Lessingoweho města. Tam wotměchu so prěni raz kołbaskowe wiki. A te běchu wulki wuspěch, kaž wothłós pokaza.
Kamjenc (UM/SN). „Kamjenc njeje nam smorže“ steješe na jednym z plakatow na kromje torhošća před radnicu. Nimoducy běchu namołwjeni, swoje přeće za Lessingowe město – pak z wida wobydlerja pak z wida wopytowarja – na mału cedlu napisać a na plakat přičinić. A přeća běchu zawěrno mnohostronske. „Kino“ steješe na jednym łopjenu, „kupjel“ na dalšim a „jutrowne jěchanje“ na třećim. W zašłosći často zwuraznjene přeće za žiwym nutřkownym městom njetrjebachu připisać. Te mjenujcy je so znajmjeńša wčera na něšto hodźin spjelniło. Měšćanska managerka Anne Hasselbach a jeje sobuwojowarjo běchu ze swojej ideju kołbaskowych wikow wulku ličbu wobydlerjow a wopytowarjow do centruma přiwabili.
Worklečenjo su minjeny pjatk we wohnjowobornej gratowni čestne wrota ...
Krótkopowěsće (26.03.18)
Nětko tola nic přez móst
Pančicy-Kukow. Chróšćanscy křižerjo jutrowničku tola w Pančicach-Kukowje přez móst, kotryž tuchwilu ponowjeja, njepojěchaja. Kaž zarjadniski zwjazk Při Klóšterskej wodźe zdźěla, njejsu móžne škody abo njezboža zawěsćene a nichtó tajke njepřewozmje. Chróšćenjo pojěchaja tuž zady z klóštra, na hłownu dróhu přez Póstowu a Młónčik zaso do klóštra, kiž skónčnje přez hłowny portal wopušća a so do směra na Worklecy podadźa.
Minority SafePack podpěrać
Podstupim. W mjenje braniborskeho krajneho knježerstwa je ministerka za wědomosć, slědźenje a kulturu Martina Münch (SPD) Braniborčanow kónc tydźenja namołwiła, zo bychu tež woni europsku wobydlersku iniciatiwu Minority SafePack w interneće pod www.minority-safepack.eu podpěrali.
Bitzka znowa w stronskej radźe
„Žně“ konopje wuschnyli
K parnej lokomotiwje maja nětko tež knihu
Budyšin/Lubij (UM/SN). Wuchodosakscy přećeljo železnicy du z połnym programom do noweje sezony. Towarstwo, kotrež je swoje sydło z Budyšina do Lubija přepołožiło, poskići lětsa 15 wosebitych jězbow. Wone powjedu mjez druhim k festiwalej R.S.A. do Schwarzenberga (2. junija), do filmoweho města Babelsberga (15. septembra), k Wochožanskej brunicowej jamje (25. septembra) a samo do čěskeje Mladeje Boleslavy (16. oktobra). Dospołny program nadeńdu zajimcy pod www.osef.de. Loni je něhdźe 5 500 poskitki wužiwało.
Za swoje jězby zapřahnu nimo wupožčenych lokomotiwow swójsku dieselowu lokomotiwu kaž tež jako „Ferkeltaxe“ znate wozy z produkcije NDR. Nimo toho wobsedźi towarstwo dwě parnej lokomotiwje, kotrejž pak tuchwilu njejězdźitej. „Naša 52 80 80-5 wot lěta 2013 steji, dokelž by tehdy trěbne hłowne přepytowanje poł miliona eurow płaćiło. Telko pjenjez njemóžachmy zwjesć“, wuswětla předsyda towarstwa Alfred Simm. Hač za to přichodnje snano raz spěchowanske srědki dóstanu, njeje wěste.
Policija (23.03.18)
Wopačni rjemjeslnicy po puću
Dobruša-Huska. Policija warnuje před pozdatnymi rjemjeslnikami, kotřiž spytaja wobydlerjow zjebać. Tak so w gmejnje Dobruša-Huska wukrajni dźěłaćerjo poskićichu, lijawu domu za 150 eurow ponowić. Po tym zo su staru lijawu wotstronili, bě płaćizna na 1 000 eurow.
Baletny wječor ze zawodom
Budyšin. Swoju baletnu produkciju „Što zwostanje?“ předstaji Serbski ludowy ansambl njedźelu, 25. měrca, w 17 hodź. na žurli SLA. Wot 16.30 hodź. poskića w předrumje Röhrscheidtoweje bašty zawodne słowa do krucha.
Zaběraja so z wobswětom
Budyšin. Wobswětowe kubłanje steji w srjedźišću młodźinskeho wobswětoweho dnja wutoru, 27. měrca, wot 10 hodź. w Budyskim Dźiwadle na hrodźe. Šulerjo 5. lětnika Budyskich šulow móža najwšelakoriše poskitki wužiwać a mjez druhim wotpadki dźělić, so na kwisu wobdźělić abo štomy postajeć.
Wotewru historisku dokumentaciju
Spěchowanske towarstwo HELO wotewrje jutře, sobotu, w 11 hodź., w Hornjej Hórce historisku „Dróhu spomnjeća“ z třinaće wulkimi taflemi, kotrež dokumentuja wuwiće ratarskeho mašinotwara w Hornjej Hórce. „Dróhu spomnjeća“ natwarichu na zelenej łuce, blisko fabrikskeho twarjenja něhdyšeho papjernika, dźensnišeje firmy Gratotwar Raussendorf.
Woswjećimy 130 lět twara ratarskich mašinow w Dźěžnikecach a dźesaćlětne wobstaće spěchowanskeho towarstwa HELO. Wjesnjenjo Hornjeje Hórki a něhdyši sobudźěłaćerjo fabriki móža z wulkim dźakom na zdokonjane dźesaćlětne dźěło spěchowanskeho towarstwa a na „Dróhu spomnjeća“ zhladować. Gratulujemy tuž k 130 lětam wuwiwanja a produkowanja ratarskich mašinow w Hornjej Hórce a Dźěžnikecach.
