Kritiske prašenja na město
Wojerowski hospodarski plan z 900 000 eurami poćeženy
Wojerecy (AK/SN). Město Wojerecy dyrbi za financowanje dźěćacych dnjowych přebywanišćow w swobodnym nošerstwje přidatnje 900 000 eurow nałožić. Tole běchu měšćanscy radźićeljo po wobšěrnym stejišću šulskeho a socialneho měšćanosty Thomasa Dellinga (SPD) hižo w nowembru wobzamkli. Přiznał bě Delling zanjechanja zarjadnistwa a skomdźenja swobodnych nošerjow. Za to zasadźeny sobudźěłaćer města dyrbješe mjeztym wučbu z toho sćahnyć a hić.
Kapałka duchowne srjedźišćo wsy
Kónc lěta wróćo zhladuješ a dopominaš so rady na wulkotne dožiwjenja. Wosebite wjerški, skedźbnjace na wjelelětne stawizny, su jubilejne zarjadowanja a swjedźenje. Na wosebitu róčnicu móžachu Pěskečenjo lětsa zhladować.
Pěskecy (aha/SN). Druhi swjaty dźeń hód po nyšporje so Pěskečenjo dopominachu, zo maja swoju kapałku mjeztym 25 lět. Wot 1992 je tele městno duchowne srjedźišćo wsy.
Hižo w NDRskim času zrodźichu někotři wjesnjenjo ideju, sej kapałku natwarić. Jich předstawy pak tehdy wězo wotpokazachu, a hakle po přewróće po jutrach 1991, dóstachu twarsku dowolnosć. Agilny kwartet– Jan Smoła, Beno Pólk, mjeztym njeboh Beno Lipič a Jan Matka – přewza nawod twarskich dźěłow, organizatoriski wotběh kaž tež zasadźenje ćěslow a mulerjow. Wšědnje dźěłajo a kóždu sobotu wužiwajo natwarichu nahladny Boži dom. Cyła wjes je při twarje po swojich mocach pomhała. Mějićeljo lěsow běchu darmotnje trěbne drjewo přewostajili, a w NDRskim času za twar konsuma přihotowany material bu sobu wužiwany.
Kaž loni rěkaše tež wčera zaso w kopaće połnej Nukničanskej ...
Hwězdni spěwarjo po puću
„Z přesydlenjom wjes njenarunaš“
Miłoraz (AK/SN). Rudi Krauz a Hans-Joachim Klei zasadźataj so za to, Miłoraz njewotbagrować. „Miłoraz ma so zaso ze žiwjenjahódnej wsu stać“, podšmórnje krajinowy moler Hans-Joachim Klei. Wonaj sej samo žadataj tež lěsy, pola a zahony wokoło wsy znowa zarjadować. „Wobkedźbować maja so při tym dalokož móžno stare wobsydstwowe poměry. Nastać ma zaso syć dróhow a pućow kaž tež dalša infrastruktura“, měnitaj wuměnkarjej z Rownoho a Běłeje Wody.
Krótkopowěsće (28.12.17)
Na diskusiju z FUEN
Berlin. Federalistiska unija europskich narodnych mjeńšin (FUEN) přewjedźe klětu spočatk februara wosebity medijowy forum. 1. a 2. małeho róžka zaběraja so zajimcy z temu „Politika a medije za mjeńšiny: informacija, syć, komunikacija“. Forum je wusměrjeny na aktualne temy w mjeńšinowej politice. Diskutować budu zastupjerjo politiki kaž tež němskich a mjezynarodnych medijow.
Liča z wjetšim wunoškom
Picnjo. Delnjołužiscy rybarjo a hatarjo su z lětušim rybjacym lětom spokojom a liča samo z wjetšim wunoškom hač loni. Kaž Braniborski krajny rybarski zwjazk informuje, móhli rybarjo lońši wunošk 609 tonow na 650 tonow stopnjować. Pozitiwnje běchu so lětnje dešće wuskutkowali. Naprašowanje za rybu je runje nětko do silwestra wulke. Płaćizna na kilo wosta na lońšim niwowje.
Wjace žiwidłow za Caritu
VVO hotline zarjadował
Budyšin (SN). Dokelž maja mnozy sobudźěłaćerjo wobchadneho zwjazka Hornje Łobjo (VVO) na proze do noweho lěta dowol, poruča VVO wosebitu hotline. Telefonisce su přistajeni serwisoweho teama silwester a Nowe lěto wot 10 do 18 hodź. pod čisłom 0351 852 65 55 docpějomni, zo bychu ludźi wo busach a ćahach informowali. Infohotline VVO je hewak wotydźenja wot 7 do 19 hodź., sobotu, njedźelu a dalše swjate dny wot 8 do 19 hodź. docpějomna.
Gospelowy chór na turneji
Budyšin (SN). Pjaty króć je chór „The Gospel People“ lětsa w zymje na wulkej turneji po cyłej Němskej. Z wuběrnymi a wusahowacymi hłosami zahorjeja spěwarjo publikum přeco zaso ze swojim poselstwom. Tak chce sydomčłonska ameriska gospelowa skupina ze swojej hudźbu w času njewěstosće ludźom tróšku nadźije spožčić. Na to móža so fanajo tež w Budyšinje wjeselić. Pjatk, 29. decembra, wot 20 hodź. poskići chór něhdźe dwuhodźinski program jazza a soula w Marje-Marćinej cyrkwi.
Rumpodich so rozžohnował
Policija (27.12.17)
Ćežke spalenja poćerpjeł
Koblicy. 55lětny Kobličan chcyše wčera rano kachle swojeje dźěłarnje zatepić. Zo by to spěšnišo šło, wužiwaše kapalinu za rjedźenje spinadłow. Po zdaću pak přewidźa wón dymjace žehliwo w kachlach, na čož dóńdźe k rozbuchnjenju, a płomjenja sapachu z kachli. Muž so tak jara spali, zo dyrbjachu jeho ćežko zranjeneho z wuchowanskim helikopterom do chorownje dowjezć.
W šuli škodu načinili
Šěrachow. Na hodownych swjatych dnjach su njeznaći w Šěrachowje po zdaću wostudu pasli a načinichu škodu při zakładnej šuli. Tam běchu škleńcu jednoho wokna rozbili a na dalšim woknje wobškodźichu ramik.
Hładku dróhu njewobkedźbował
Wopaka. We Wopakej bě wodźer Citröena wčera něhdźe w 22 hodź. na zwjazkowej dróze B 96, do směra na Budyšin, kontrolu nad jězdźidłom zhubił. Zalodźeneje jězdnje dla poča so suwać a zrazy do štoma. Při tym so wón kaž tež sobujěducy muž a dalša žona so zranichu. Wšitkich třoch dowjezechu do chorownje.
Bjez „papjerow“ z awtom jěł
Zwěrjenc z nowej webstronu
„Wojerowski coo je woprawdźity highlight“ – nic pak serbšćinu nastupajo
Wojerecy (SN/mwe). Wojerowski zwěrjenc je njedawno swoju nowu webstronu prezentował. Wuhotowała bě ju runje tak kaž nowu internetnu stronu Wojerowskeje hudźbneje šule towaršnosć ZooKultur. Pjeć kulturnych a kubłanskich zarjadnišćow pod jednej třěchu twori wot 10. oktobra 2011 Wojerowsku coowowu, kulturnu a kubłansku tzwr. K tomu słušeja nimo zwěrjenca a hudźbneje šule Wojerowski hród a měšćanski muzej, ludowa uniwersita kaž tež měšćanska biblioteka Brigitty Reimann. Towaršnik je stoprocentowsce město Wojerecy. Před třomi lětami powołachu Arthura Kusbera za jednaćela, do toho wukonješe zastojnstwo tehdy w Žuricach bydlaca Carmen Lötsch. Předsyda dohladowanskeje rady ZooKultury je Michael Mandrossa, jeho naměstnik Wojerowski wyši měšćanosta Stefan Skora (CDU). Dalši čłonojo rady su Martin Schmidt, Ursula Biel, Manja Klimt, Ralf Zeidler, Günther Jahnel a Hans-Joachim Donath.
