Zo so za twarski projekt kóšty za čas twarskich dźěłow podróša, njeje ničo njewšědne. Derje, ma-li tón, kiž twari, mału rezerwu za to přihotowanu. W padźe komunow tomu zwjetša tak njeje, přetož wone dyrbja tak a tak hižo kóždy cent dwójce wobroćić. Połoženje Chróšćanskeje gmejny je hišće trochu prekerniše. Swoju nowu pěstowarnju dźě wona nimale dospołnje ze spěchowanskimi pjenjezami zapłaći, štož njemóžeš hinak hač klewerne mjenować. Hdyž pak so nětko płaćizna za wonkowne připrawy wo dźesatki tysacow eurow podróši, móhło z toho problem nastać. Přetož za pad, zo přidatne spěchowanje njedóstanu, nimaja žadyn plan B. Za to pak nadźiju, zo so tola hišće wšitko zrjaduje. A tale nadźija je najskerje jara wulka. Jenož jenički radźićel so mjenujcy na wčerawšim posedźenju gmejnskeje rady prašeše, što so stanje, jeli spěchowanje njedóstanu. Marian Wjeńka

Dalši 5. lětnik

Wodowe Hendrichecy. Prěni raz po lěće 2012 rozžohnuje so dźensa 5. lětnik Wyšeje šule Wodowe Hendrichecy do lětnich prózdnin. Tež za přichodne lěto maja tam hižo 28 přizjewjenjow, kaž rěčnica Budyskeje wotnožki­ Sakskeje kubłan­skeje agentury zdźěli. Tuchwilu planuja we Wodowych Hendrichecach zawěsćenje šulskeje wučby.

Sakske lětanišća woblubowane

Kamjenica. Ze sakskich regionalnych lětanišćow je loni telko lětadłow startowało a tam přizemiło kaž hižo dołho nic. Cyłkownje bě to něhdźe 130 000 króć, kaž ze statistiki Sakskeje krajneje direk­cije wuchadźa. Lěta do toho zličichu 115 000 do 120 000 pohibow. Jeničce lěta 2011 bě na regionalnych lětanišćach nimale telko mašinow po puću kaž loni.

Čěska stolica rozrosće

Praha. Ličba wobydlerjow čěskeje stolicy so po měnjenju demografow w přichodnych dekadach raznje powjetši. Z dźensa zličenych 1,25 milionow ludźi móhła wona w lěće 2050 na wjace hač 1,6 milionow rozrosć. Fachowcy z instituta za planowanje a wuwiće rozmysluja tuž hižo nětko wo nowych štwórćach, hladajo tež na potrjebu wjace małych bydlenjow za samostejacych.

Podhlad morjenja

Radeberg. W Ullersdorfje pola Radeberga přepytujetej Zhorjelske statne rěčnistwo a tamniša policajska direkcija podhlada morjenja dla. Kaž policija zdźěli, je swědk wčera popołdnju w jednym bydlenju ćěšenka našoł, kiž hižo njedychaše. Sobudźěłaćerjo alarmowaneje wuchowanskeje słužba spytachu něhdźe dwaj měsacaj stareho hólčka do žiwjenja wróćo zwołać, bohužel bjez wuspěcha. Prěnje wuslědki hnydom zahajeneho přepytowanja kriminalneje policije wobkrućichu podhlad, zo jedna so wo morjenje. W tym zwisku 33lětnu mać dźěsća jako podhladnu nachwilnje zajachu. Statne rěčnistwo a policija pad dale přepytujetej. Dalše nadrobnosće, što je so w Ullersdorfje stało, pak njemóžetej přepytowansko-taktiskich přičin dla zdźělić. Hakle dźensa w běhu dnja chcychu zjawnosć wobšěrnišo wo tym informować.

Wonkowne připrawy noweje pěstowarnje dróše hač planowane

Chrósćicy (SN/MWj). Dźens za tydźeń drje změje Chróšćanski wjesnjanosta Marko Kliman (CDU) trochu spodźiwne začuće. 1. julija mjenujcy wón zhoni, hač dóstanje komuna wot Sakskeje natwarneje banki (SAB) přidatne spěchowanje za nowu pěstowarnju „Chróšćan kołć“. Te trjebaja za wonkowne připrawy, bjez kotrychž tajki dom być njemóže.

Kaž architekt Marko Dźisławk na wčerawšim posedźenju Chróšćanskeje gmejnskeje rady rozłoži, běchu za zahrodu, płoty, rostliny, hrajkanišćo, pućiki atd. dohromady 118 000 eurow kalkulowali. Po wupisanju wotpowědneho nadawka so wujewi, zo płaći najtuńši poskitk na wšo 192 000 eurow. Nahladnu diferencu spytaja nětko z přidatnymi spěchowanskimi srědkami zarunać. Zo pak njebychu čas brojili, dóstaštaj wjesnjanosta a dalši gmejnski radźićel wčera nadawk, hnydom po rozsudźe SAB přichodny pjatk krajinotwarskej firmje nadawk za wonkowne připrawy noweje pěstowarnje přepodać.