Puć lěpjaty był
Bórk. Njebě to wobchadne njezbožo, ale lěpk, kotryž postara so minjeny pjatk wječor wo poćeženje wobchada mjez Budyšinom a Bórkom. Tam bě něchtó bow z uniwersalnym lěpkom zhubił. Wěko bowa so wočini a lěpk wuběža na dróhu. Naslědne awta jón na to po něhdźe 50 metrach rozjězdźachu. Policija a wohnjowa wobora stej wotrězk zaraćiłoj, dokelž dyrbješe specialna firma rjedźić přijěć. Wěstoty dla bě puć hač do dźensnišeho ranja zawrjeny.
Koblicy (AK/SN). Towarstwo rebelow Hórnikečanskeho jězora žada sej wjace rozswětlenja a transparency při saněrowanju Hórnikečanskeho jězora, při technologijach a při zasadźenju financow. „Wšako płaći saněrowanje jězora 100 milionow eurow“, podšmórny předsyda Werner Petrick sobotu w Koblicach. Towarstwo dwěluje na tym, zo je strach zesuwanja zemje woprawdźita přičina saněrowanja. „Dotal njeje žadyn plan twarskich dźěłow spóznajomny“, Werner Petrick kritizowaše.
Rebelojo sej dale žadaja, zo měł jězor za čas kupanskeje sezony na małym wotrězku južneho pobrjoha wopytowarjam přistupny być. 23. junija je towarstwo wo tym na městnje ze zastupjerjemi LMBV, wyšeho hórniskeho zarjada a sakskeho ministerstwa za hospodarstwo rěčało. Funděrowanych wotmołwow pak njebě, praji Petrick.
Dobry zazběh do prózdninskeho časa mějachu wobydlerjo Šunowa a Konjec. Prjedy hač so do zasłuženeho dowola podadźa, přewjedźechu zhromadnje swój wjesny swjedźeń. Wot soboty popołdnja hač do wčerawšeho wječora starachu so organizatorojo wohnjoweje wobory a blidotenisoweho towarstwa wo zabawny a wotměnjawy program.
Konjecy (JK/SN). Po natočenju piwa wubědźowachu so sobotu popołdnju tři mustwa we wolejbulu. Mały turněr doby Ralbičanske hobbyjowe mustwo před Konječanskej młodźinu a mustwom wohnjoweje wobory Šunow-Konjecy. Wječor zahajichu ze zabawnej hudźbu, prjedy hač dožiwichu wjesnjenjo a hosćo lóštny a zajimawy program delanskich žonow. Do toho pak sej dźěći při lěhwowym wohenju hišće tu abo tamnu chłóšćenku słodźeć dachu. Wječor wuklinča při hudźbnej zabawje. Při tym mějachu sej wjesnjenjo mnoho z minjeneho lěta powědać a sonjachu hižo wo dowolu.
Serbska literatura słowaksce
Budyšin. W najnowšim čisle słowakskeho časopisa Slovenské pohlady je wozjewjeny přełožk Jurja Brězanoweho „Lista wnučkam“. Prěni raz steješe tón w antologiji „Wobraz ze skibami“, wušłej lěta 2001 w Ludowym nakładnistwje Domowina. Přełožił je list Peter Čačko, kiž hižo lětdźesatki prawidłownje serbsku literaturu słowakskim čitarjam spřistupnja.
Wopomnja Jana Kiliana z taflu
Delany. Při ródnym domje fararja Jana Kiliana w Delanach pod Čornobohom (Döhlen) připrawi Bukečanska ewangelska wosada wopomnjensku taflu. Wo tym informuje farar Thomas Haenchen. Wotkryć chcedźa taflu 13. awgusta. Kilian bě lěta 1854 najwjetšu skupinu serbskich wupućowarjow texaskeho Serbina nawjedował.
Pokazaja dokumentaciju
Lubnjow. Telewizijny sćelak Phoenix wusyła zajutřišim, srjedu, w 20.15 hodź. dokumentaciju wo Błótach. Tak pokazuja archiwne natočenja a rozmołwy z časowymi swědkami stawizny Błótow. 45minutowsku dokumentaciju z produkcije sćelaka RBB stej Lutz Rentner a Frank Otto Sperlich zestajałoj.
Lionel Messi přestanje
Dalši 5. lětnik
Wodowe Hendrichecy. Prěni raz po lěće 2012 rozžohnuje so dźensa 5. lětnik Wyšeje šule Wodowe Hendrichecy do lětnich prózdnin. Tež za přichodne lěto maja tam hižo 28 přizjewjenjow, kaž rěčnica Budyskeje wotnožki Sakskeje kubłanskeje agentury zdźěli. Tuchwilu planuja we Wodowych Hendrichecach zawěsćenje šulskeje wučby.
Sakske lětanišća woblubowane
Kamjenica. Ze sakskich regionalnych lětanišćow je loni telko lětadłow startowało a tam přizemiło kaž hižo dołho nic. Cyłkownje bě to něhdźe 130 000 króć, kaž ze statistiki Sakskeje krajneje direkcije wuchadźa. Lěta do toho zličichu 115 000 do 120 000 pohibow. Jeničce lěta 2011 bě na regionalnych lětanišćach nimale telko mašinow po puću kaž loni.
Čěska stolica rozrosće
Praha. Ličba wobydlerjow čěskeje stolicy so po měnjenju demografow w přichodnych dekadach raznje powjetši. Z dźensa zličenych 1,25 milionow ludźi móhła wona w lěće 2050 na wjace hač 1,6 milionow rozrosć. Fachowcy z instituta za planowanje a wuwiće rozmysluja tuž hižo nětko wo nowych štwórćach, hladajo tež na potrjebu wjace małych bydlenjow za samostejacych.
Podhlad morjenja
Radeberg. W Ullersdorfje pola Radeberga přepytujetej Zhorjelske statne rěčnistwo a tamniša policajska direkcija podhlada morjenja dla. Kaž policija zdźěli, je swědk wčera popołdnju w jednym bydlenju ćěšenka našoł, kiž hižo njedychaše. Sobudźěłaćerjo alarmowaneje wuchowanskeje słužba spytachu něhdźe dwaj měsacaj stareho hólčka do žiwjenja wróćo zwołać, bohužel bjez wuspěcha. Prěnje wuslědki hnydom zahajeneho přepytowanja kriminalneje policije wobkrućichu podhlad, zo jedna so wo morjenje. W tym zwisku 33lětnu mać dźěsća jako podhladnu nachwilnje zajachu. Statne rěčnistwo a policija pad dale přepytujetej. Dalše nadrobnosće, što je so w Ullersdorfje stało, pak njemóžetej přepytowansko-taktiskich přičin dla zdźělić. Hakle dźensa w běhu dnja chcychu zjawnosć wobšěrnišo wo tym informować.
Chrósćicy (SN/MWj). Dźens za tydźeń drje změje Chróšćanski wjesnjanosta Marko Kliman (CDU) trochu spodźiwne začuće. 1. julija mjenujcy wón zhoni, hač dóstanje komuna wot Sakskeje natwarneje banki (SAB) přidatne spěchowanje za nowu pěstowarnju „Chróšćan kołć“. Te trjebaja za wonkowne připrawy, bjez kotrychž tajki dom być njemóže.
Kaž architekt Marko Dźisławk na wčerawšim posedźenju Chróšćanskeje gmejnskeje rady rozłoži, běchu za zahrodu, płoty, rostliny, hrajkanišćo, pućiki atd. dohromady 118 000 eurow kalkulowali. Po wupisanju wotpowědneho nadawka so wujewi, zo płaći najtuńši poskitk na wšo 192 000 eurow. Nahladnu diferencu spytaja nětko z přidatnymi spěchowanskimi srědkami zarunać. Zo pak njebychu čas brojili, dóstaštaj wjesnjanosta a dalši gmejnski radźićel wčera nadawk, hnydom po rozsudźe SAB přichodny pjatk krajinotwarskej firmje nadawk za wonkowne připrawy noweje pěstowarnje přepodać.