Šulerjo w starowni program předstajili
Policija (14.12.17)
Po njezbožu ćeknył
Budyšin. Na parkowanišću při kupnicy w Budyskej Strowotnej studni je zawčerawšim wodźer Hondy do Seata prasnył a na to prosće dale jěł. Swědkojo to wobkedźbowachu a zdźělichu policiji awtowe čisło. Zastojnicy na to zawinowarja doma we Wulkej Dubrawje wopytachu a zwěsćichu, zo bě 64lětny alkohol pił. To drje wón přizna, alkoholowy test pak wotpokaza. Nětko dyrbja zwěsćić, hač bě muž hižo za čas njezboža natutkany.
Spokojaca bilanca a wuhlad
W Njeswačidle optimistisce do přichoda hladaja
Njeswačidło (JK/SN). Najebać napjatu hospodarsku situaciju gmejny hódnoćeše wjesnjanosta Gerd Schuster (CDU) zawčerawšim na poslednim lětušim posedźenju Njeswačanskeje gmejnskeje rady jeje dźěławosć w minjenym lěće jako dosć wuspěsnu a spomóžnu. Tohodla wupraji radźićelam kaž tež wšitkim aktiwnym wjesnjanam swój wosobinski dźak. Zwjaza pak jón z přećom, klětu w napinanjach njepopušćić, tež hdyž njebudu wobstejnosće a wuměnjenja lěpše.
Z grand ouvertom lěto zakónčili
Budyšin (-na-/SN). Posledni lětuši škotowy turněr serbskich seniorow je wutoru w Budyskim seniorskim domje Sonja Krječmarjowa jako jenička žona mjez něhdźe 30 wobdźělnikami dobyła. Wona hižo něšto lět mjez mužemi swoje hrajne kmanosće měri a přesadźi so předwčerawšim snadnje před Günterom Socku z Klětnoho a Wolfgangom Kühnom z Delnjeho Wujězda. Wulke zbožo měješe Hućinjan Manfred Rohark, kiž připowědźi, zo ma wulkohru, mjenujcy grand ouvert, na ruce. To posledni turněr lěta runje tak skulojći kaž wulosowanje małeho hodowneho darika kóždemu kartyplacarjej.
W Salowje saněruja tuchwilu puć k starej cyhelerni. Hižo zašły ...
Radźićeljo tłóča na nowy móst
W Budyšinje móhł nowy móst za pěškow wot turistiskeho parkowanišća na Schliebenowej do stareho města nastać. Tež měšćanske zarjadnistwo za projektom steji. Nic pak na wšón gwałt.
Budyšin (CK/SN). Z dobrej powěsću Budyski wyši měšćanosta Alexander Ahrens (SPD) čłonow měšćanskeje rady na jich wčerawšim posedźenju překwapi. Po tym zo běchu dwanaće lět na tym dźěłali, su minjeny pjatk ležownosći při Schliebenowej wuměnili. Z tym je jedyn z předpokładow spjelnjeny, zo móža wot turistow wulce wužiwane parkowanišćo powjetšić a pódla njeho tak mjenowanu wobydlersku łuku za najwšelakoriše zarjadowanja wutworić. Předewšěm pak je to wuměnjenje za to, zo nastanje wisaty móst na napjatych powjazach přez sprjewiny doł k staremu městu.
Krótkopowěsće (14.12.17)
Prezidij Domowiny wuradźował
Dešno. Aktualny staw přihotow klětušeje strukturneje konferency je prezidij Domowiny wčera w Dešnje rozjimał. Zdobom dojednachu so z předsydstwom župy Delnja Łužica klětu přewjesć zarjadowanja k šulskim temam, zarjad Domowiny zdźěla. Gremij gratulowaše tež nowemu Sakskemu ministerskemu prezidentej Michaelej Kretschmerej k wuzwolenju.
Sylnišo zhromadnje dźěłać
Budyšin. Serbski institucije chcedźa nastupajo marketing sylnišo hromadźe dźěłać. To je wuslědk wčerawšeho prěnjeho zetkanja zamołwitych za zjawnostne dźěło pod nawodom zamołwiteje za marketing a kooperacije Załožby za serbski lud Hanki Budarjoweje w Budyšinje. Nimo zhromadnych dalekubłanjow chcedźa tež za móžnosćemi pytać zhromadnje wabić, zdźěli załožbowy direktor Jan Budar.
Nowy nakład wušoł
Zhromadnje wjes wupyšili
Hornje Sulšecy (SN/MWj). Štož je na druhich wsach hižo wjele lět z wašnjom, zo tam w adwentnym a hodownym času zjawny štomik swěći abo hinaša adwentna patych wjes porjeńša, maja wot lětušeho tež w hornich Sulšecach. Tam pak njeje so gmejna, w tym padźe Hodźijska, wo to postarała, ale wobydlerjo sami.
Kaž jedyn z iniciatorow Bosćij Bulank powěda, běchu hižo loni kónc lěta rozmyslowali, kak móhli sej wjes adwentnje wozdebić. „A tak smy sej myslili, zo by rjenje było, jeli móhli sej we wsy hwězdu powěsnyć“, rozprawja młody muž. Hakle měsac do adwenta pak započachu swoju akciju zwoprawdźeć. Nan Bosćija Bulanka Beno z tyzu po wsy chodźeše a prošeše wobydlerjow wo mały pjenježny dar, štož je lědma štó wotpokazał. Tak nazběrachu šwarnu sumu, z kotrejž móžachu nahladnu Ochranowsku hwězdu kupić. Za nju wobstarachu sej trěbnu žerdź a přičinichu ju při priwatnej ležownosći, kotruž jeje wobsedźer poskići.
Kónc tydźenja budu cyle hotowi
Torhošćo před Kamjenskej radnicu po twarskich dźěłach přepodate
Kamjenc (BG/SN). Po nimale poł lěće twarskeho časa su zawčerawšim Kamjenske torhošćo zjawnosći přepodali a symboliski banćik přetřihali. Na naměsće móža šoferojo nětko tež baterije swojich elektroawtow nabiwać. Na te wašnje so symbolisce tomu wuznawaja, zo w Lessingowym měsće tele baterije produkuja. Poslednje twarske płoty a twaršćizny pak na to skedźbnjeja, zo su twarscy dźěłaćerjo hišće hač do kónca tydźenja na městnje. Poslednje plestrowanske dźěła maja so hišće zwoprawdźić. Za čas swjatočneho přepodaća su tam jenož krótku přestawku zapołožili.
Policija (13.12.17)
„Wubědźowanje“ ze sćěhami
Wóspork. Dypk w Flensburgu a 80 eurow pokuty su wuslědk tak mjenowaneho „elefantoweho wubědźowanja“, kotrež bě policija zawčerawšim na awtodróze A 4 pola Wósporka wobkedźbowała. Přesćahowace nakładne awto trjebaše dlěje hač minutu, zo by po dołhosći jednoho kilometra nimo druheho Lkw-ja jěło. Policisća wodźachu 29lětneho šofera na přichodne parkowanišćo, hdźež jemu tónle zmylk rozłožichu. Wón by mjenujcy jenož přesćahnyć směł, by-li dosć wulku spěšnosć měł. Fachowcy wuchadźeja z toho, zo měło přesćahowace awto znajmjeńša 20 km/h spěšniše być.
