Njewšědny jubilej swjećili
Žičeń (SiC/SN). 300 wobydlerjow Žičenja (Seitschen) a Žičenka (Kleinseitschen) w Hodźijskej gmejnje je njedawno wosebity podawk dožiwiło. Woni woswjećichu 1 000. róčnicu prěnjeho pisomneho naspomnjenja Žičenja. Byrnjež wjes najskerje hišće starša była, naspomnja ju chronika Thietmara Merseburgskeho z lěta 1017 prěni raz jako „Sciciany“.
Dźensniši Žičeń wobsteji z bywšeho, hač do lěta 1900 tak mjenowaneho Wulkeho Žičenja a twarjenjow, kotrež nastachu wot srjedź 19. lětstotka blisko dwórnišća. Mjez Wulkim a Małym Žičenjom rozeznawa prěni raz dawkowy register klóštra Marijineje hwězdy 1374. Na woběmaj wsomaj běštej samostatnej ryćerkuble.
W bywšim ryćerkuble (Wulkeho) Žičenja wotmě so swjedźeń k 1 000. róčnicy. Organizował bě jón wjesny klub hromadźe z nětčišim wobsedźerjom ryćerkubła Matthiasom C. Englerom. Něhdźe 500 wopytowarjow dožiwi mjez druhim přednošk Drježdźanskeho konzerwatora a historikarja Holgera Birkholza wo stawiznach wsy. Nimo dalšich wuznamnych wosobinow wuzběhny wón serbskeho ludoweho basnika Pětra Młónka, rodźeneho 19. meje 1805 w Žičenju.
Skupinarjo w Lipsku byli
Na zašłej hłownej zhromadźiznje našeje Domowinskeje skupiny Pančicy-Kukow běchmy sej Lipsk jako cil swojeje lětušeje wuprawy wupytali. Mnozy město nad Plesnu hižo znajachu, dokelž běchu tam studowali, zwěrjenc wopytali abo w operje byli. A přiwšěm bě minjenu sobotu zajim wulki a bus połnje wobsadźeny.
Lipsk je najwjetše město Swobodneho stata Sakskeje. Jedne z najmarkantnišich twarjenjow je hoberski pomnik Bitwy narodow. Tam wězo pozastachmy. Zo pochadźa mjeno města ze serbšćiny, je wšak powšitkownje znate. Nimo Tomašoweje cyrkwje a katolskeje propstowskeje cyrkwje St. Trinitatis napřećo nowej radnicy maja tež Židźa swoje domy. To a wjele dalšeho zhonichmy na kołojězbje po Lipsku.
Po wobjedźe w domje Srjedźoněmskeho rozhłosa (MDR) wěnowachmy so rozhłosej a telewiziji. Na wodźenju pokazachu nam jednotliwe rumnosće z najwšelakorišim wuhotowanjom. Běchmy překwapjeni, kelko sćelakow tu swoje programy produkuje. Wot lěta 1992 wusyłaja tule znate programy MDR.
Wotnětka ze serbskim napisom
Telko serbskosće kaž minjenu sobotu na přirodowych wikach w Stróži hišće njebě. To pak njezaleži jenož na tym, zo běchu to jubilejne 20. wiki tajkeho razu.
Stróža (CS/SN). Dohromady něhdźe 4 300 wopytowarjow zličichu minjenu sobotu na přirodowych wikach w Stróži pola Hućiny. Nimo čerstweje zeleniny, sadu a běrnow poskićachu tam lětsa prěni raz Hornjołužiske holanske piwo k woptawanju. Warili běchu je ze starych družin ječmjenja, kotrež w biosferowym rezerwaće Hornjołužiska hola a haty plahuja. Wobšěrny poskitk rostlin kaž tež drjewjanych, tekstilnych a hornčerskich wudźěłkow přeprošowaše k hladanju a kupowanju. We wosebitej přehladce zhonichu wopytowarjo wo mnohotnosći domjacych družin słódnych a jědojtych hribow.
Jedne z najwoblubowanišich stejnišćow na Budyskich zelenych wikach ...
Krótkopowěsće (13.09.17)
Heiner Geißler njeboh
Berlin. Wón bě hač do wysokeje staroby jedyn z najprofilowanišich a najbóle bojowniskich zastupjerjow CDU. Nětko je bywši zwjazkowy minister a generalny sekretar CDU Heiner Geißler 87lětny zemrěł, kaž jeho syn Dominik wčera zdźěli. Zastupjerjo wšitkich wulkich stron hódnoćachu zemrěteho, kiž njeje tež z kritiku na swójskej stronje lutował.
Prominentne domske na předań
Drježdźany. Tilichec domske w Pančicach-Kukowje je na předań. W interneće jewješe so tele dny poskitk za nje w „najlěpšim měrnym a zelenym połoženju“ blisko Kamjenca. Kaž nowina Sächsische Zeitung dźensa piše, bu twarjenje, w kotrymž su sakski ministerski prezident Stanisław Tilich (CDU) kaž tež jeho dźěći wotrostli, po přećahu swójby před lětomaj do Drježdźan wurumowane.
Němska z načolnym městnom
Přehladka w cyrkwi
Wojerecy. „Serbske cyrkwje mjez Lubijom a Luborazom“ rěka hesło wustajeńcy, kotraž je hišće hač do kónca septembra we Wojerowskej Janskej cyrkwi widźeć. Kaž Ursula Philipp z tamnišeje wosady zdźěla, so zadani sej impozantne a stawiznisce hódnotne twarjenja w regionje wobhladać. We wustajeńcy nazhoni wopytowar zajimawe nadrobnosće a njewšědne widy na serbske ewangelske žiwjenje zašłych lětstotkow. Wojerowska Janska cyrkej je wšědnje wot 10 do 17 hodź. wočinjena. Zastup je darmotny.
Casting w dźiwadle
Budyšin. Němsko-Serbske ludowe dźiwadło pyta młodostnych, kotřiž maja lóšt na njewšědny dźiwadłowy eksperiment. Performancowa skupina friendly fire z Lipska dźěła zhromadnje ze serbskimi a němskimi dźiwadźelnikami NSLDź na projekće „Wustajeńca Němcow – Das Museum der Deutschen“ a pyta zesylnjenje. Štóž chce sobu hrać, spěwać abo rejwać, njech přińdźe na casting štwórtk, 14. septembra, w 17 hodź. do Dźiwadła na hrodźe. Přeprošeni su młodostni wot 16 lět. Premjera budźe 3. oktobra. Nadrobniše informacije dóstanu zajimcy pod telefonowym čisłom 03591/ 584 237.
Policija (12.09.17)
Zražka na křižowanišću
Bošecy. Wobchadne njezbožo stało je so wčera popołdnju na statnej dróze S 111 při wotbóčce do Bošec. Nakładne awto chcyše tam hłownu dróhu přeprěčić, šofer pak njewobkedźbowaše předjězbu wosoboweho awta typa Fiat. Jeho wodźerka njemóžeše hižo sčasom borzdźić a zrazy do nakładneho awta. Žonu dyrbjachu z wuchowanskim awtom do chorownje dowjezć.
Kapałka a mnohe dalše pomniki ludźi wabili
Worklecy (rk/SN). Na dnju wotewrjeneho pomnika móžachu zawčerawšim we Worklečanskej kapałce Marije maćerje Božeje něhdźe 200 wopytowarjow witać. Na cyłkownje pjeć wodźenjach rozłožowaštaj jim wjesny chronist dr. Beno Wałda a Klawdija Čornakowa stawizny kapałki a jeje wosebitosće. Je to jedna z mało cyrkwjow Němskeje, w kotrejž su mólby w formje Beuronskeho stila hač do dźensnišeho zdźeržane. Při kofeju a tykancu dopominachu so hosćo na čas, jako bě we Worklecach hišće chorownja zaměstnjena. Popołdnjo organizowało je Towarstwo Worklečanskeje kapałki.
Wobkuzłacy wječor w parku
Njeswačidło (LR/SN) Prjedy hač přewjedźechu minjenu sobotu wječor třeći a posledni koncert w rjedźe lětušich Njeswačanskich hrodowych koncertow, bě hižo popołdnju składnosć k wulkemu wjeselu we wsy. Wjesnjanosta Gerd Schuster (CDU) přepoda saněrowane studnje w hrodowym parku, kotrež běchu přez wulku wodu w lětomaj 2010 a 2013 škodu poćerpjeli. Wobrubjena bě swjatočnosć mjez druhim z krótkim programom zakładneje šule. Tři poriki pěstowarskich dźěći domu „Maks a Moric“ z Njeswačidła wustupichu w katolskej swjedźenskej drasće a zanjesechu serbske a němske spěwčki. Hosćo, mjez nimi zapósłanča zwjazkoweho sejma Marja Michałkowa (CDU), so wulce radowachu.
Wječor wotmě so gospelowy koncert na łuce při hrodźe. Drježdźanski chór The Gospel Passengers přednjese z krasnymi a přeswědčiwymi hłosami swój repertoire. Ze sylnym aplawsom so publikum dźakowaše. Po koncerće wobswětlichu park z něhdźe 3 000 swěčkami a mnohimi smólnicami. Napohlad bě přemóžacy. Tež wohnjowa show dweju Choćebužanow a mjeńši wohnjostroj so k wječorej derje hodźeštej.
Nadawki za zetkawanišćo přepodali
W Hamorskim šulskim twarjenju wutworić zetkawanišćo za wšitke generacije je tuchwilu najwažniše předewzaće tamnišeje gmejny za přichod. Za to su gmejnscy radźićeljo wčera tójšto twarskich nadawkow přepodali.
Hamor (AK/SN). Bjezbarjerne zetkawanišćo za wšitke generacije nastawa w Hamorskim šulskim twarjenju. Hižo srjedź awgusta započachu tam tule wulkonaprawu přihotować, informowaše wjesnjanosta Achim Junker (CDU) na wčerawšim posedźenju gmejnskeje rady. „Tež z prěnimi wottorhanskimi dźěłami su započeli. Sobudźěłaćerjo twarskeho zawoda gmejny nětko druhi horni poschod dospołnje wurumuja runje tak kaž dźěle zakładneje šule“, praji wjesnjanosta.
