Krótkopowěsće (15.02.18)
Wobskorža krajneho radu
Hamburg/Zhorjelc. Zwěrinoškitna strona Ethia je zhromadnje ze zajimowym zhromadźenstwom „Wjelk, haj prošu“ a Zelenej ligu Sakskeje skóržbu přećiwo Zhorjelskemu krajnemu radźe Berndej Lanzy (CDU) zapodała. Přičina je njedawno zatřěleny problemowy wjelk. Po słowach skóržbnikow bě Lange z dowolnosću, zwěrjo wottřělić, wjacore zakonje ranił. Njejsu žane dopokazane nadpady, kotrež wottřěl wjelka wusprawnjeja.
Widźi šansu za Łužicu
Grodk. Łužiski zapósłanc zwjazkoweho sejma dr. Klaus-Peter Schulze (CDU) ma předwidźanu zamołwitosć swojeje strony za hospodarski ressort w móžnym nowym zwjazkowym knježerstwje za spomóžnu. To „skići wulku šansu runje hladajo na přichod łužiskeho energijoweho regiona a z nim zwjazanu strukturnu změnu. Tak móhli při temje brunica skónčnje zas prawe ćežišća sadźeć.“
Wabja za aktiwny dowol
Eksperiment mjez póstniskej hudźbu a pobožnymi psalmami
Kotre hudźbne stile hodźa so poprawom za meditaciju w cyrkwi? Kontrast mjez modernymi improwizacijemi w stilu jazza, rocka a popa na jednej stronje a starozakonskimi tekstami z doby krala Dawida, zhudźbnjenymi předewšěm w předposlednim lětstotku wot Antonína Dvořáka a Maxa Regera na tamnej stronje, je wšak chětro drastiski. Tajki wužadowacy eksperiment prezentowachu minjenu njedźelu na hudźbnym nyšporje w Budyskej cyrkwi Našeje lubeje knjenje. A runje tele napřećostajenje jara rozdźělneju hudźbneju směrow, kotrež mjenowachu „Mjez póstniskej hudźbu a pobožnymi psalmami“, njewopokaza so snadź jako šokowace, ale skerje jako fascinowace a k přemyslowanju, rozmyslowanju a dalemyslenju pohnuwace.
Policija (14.02.18)
Ničo njesłyšeli a njewidźeli
Biskopicy. We wobchodźe na Biskopičanskej Cyrkwinskej hasy dyrbjachu zawčerawšim rano zwěsćić, zo bě so tam kónc tydźenja něchtó zadobył. Byrnjež wosrjedź města jedyn dom při druhim stał, njeje ze susodow nichtó ničo widźał abo słyšał. Samo rozbita škleńca zachodnych duri nikoho njepohnu policiju zazwonić. Paduši mějachu tuž chwile dosć, wšitke rumnosće za hódnotnymi wěcami přepytać. Při tym načinichu něhdźe 2 000 eurow wěcneje škody.
Na handy hladajo do sćežora prasnył
Wojerecy. 15lětny je so póndźelu nawječor na Wojerowskej Einsteinowej při kolesowanju radšo na swój handy koncentrował hač na nadróžny wobchad. To bě přičina, kotrejež dla wón bjez wobdźělenja druhich znjezboži. Dokelž njebě ani kuska na puć kedźbował, prasny młodostny bjez spinanja do sćežora nadróžneho wobswětlenja a so na hłowje ćežko zrani, kaž Zhorjelska policajska direkcija zdźěli. Dyrbjachu jeho w chorowni zastarać. Škoda na kolesu typa Diamant wučinja 50 eurow. Groćaneho konika je sej policija najprjedy raz wobchowała.
Za měsac wočakuja wopytowarjow
Twarske nadawki za šulu a hort přepodate
Pančicy-Kukow (SN/MWj). Ponowjenje třěchi Šule Ćišinskeho a přetwar bywšeje pěstowarnje na hort stej lětsa najwjetšej twarskej předewzaći gmejny Pančicy-Kukow. Za projektaj su radźićeljo na swojim zašłym posedźenju twarskim firmam nadawki we wobjimje nimale 300 000 eurow přepodali.
Přewažnje předewzaća z blišeje wokoliny budu na třěše šule dźěłać. Tak změje Mickelec firma z Radworja třěchikryjerske a klempnarske dźěła na starosći, Smječkečanski Gerntkec zawod wukonja ćěsliske a drjewotwarske dźěła a Wotrowska Bulankec firma stara so wo błyskowód a elektroinstalaciju. Dale přepodachu radźićeljo nadawkaj za róštotwar Heidenauskemu zawodej a za wotwožowanje starych twaršćiznow Kamjenskemu předewzaću.
Swinjorězanje a brunch
Hórki. Štóž chce sej zaso raz słódne dobroty ze swinjorězanja popřeć, móže to sobotu, 17. februara, w Hórčanskim Młynkec hosćencu. Tam krupjane a całtowe kołbasy kaž tež połćik a wšo dalše předawaja. Nimo toho přeprošeja Młynkecy njedźelu, 18. februara, wot 12 hodź. na Walentinowy brunch.
Radźićeljo so zetkaja
Worklecy. Wohnjoškitne naprawy na wyšej šuli „Michał Hórnik“ budu jedna z temow posedźenja Worklečanskeje gmejnskeje rady jutře, štwórtk, w 19 hodź. w šuli. Dale zaběraja so z nowym hortowym twarjenjom a z naćiskom twarskeho plana za přemysłowu přestrjeń Nowa Wjeska-zapad II. Posedźenje je zjawne, zajimcy su přeprošeni.
Sčasom na dźěłarničku přińć
Budyšin. W zwisku z dźěłarničku „Rjekojo z pjelsća“ sobotu, 17. februara, wot 10 do 18 hodź. skedźbnja Budyski Serbski muzej na to, zo je radźomne sčasom na dźěłarničku přińć, zo by chwile dosć było klanku dokónčić. Čim wjace časa za jeje wuhotowanje je, ćim lěpje.
Poskićeja zelowe pućowanja
Program lětušich zarjadowanjow wo biologiskim ratarjenju předstajili
Njebjelčicy (JK/SN). We wobłuku njedawneje symjenjoweje bursy w Njebjelčicach předstajištej towarstwo Kamjenjak a tamniši nowy bio-wobchod „Lausitzer Höfeladen“ wobšěrny program lětušich zarjadowanjow na temu „Biologisce ratarić“. Wobsahi a terminy zarjadowanjow běchu zastupjerjo Njebjelčanskeje gmejny a kubłanskich institucijow Sakskeje spočatk lěta zestajeli. Na to móžeše fachowc a poradźowar gmejny na polu permakultury Thomas Noack prěnje programy lětušich zarjadowanjow rozłožić.
Při busowym zastanišću twarja
Za ponowjenje poslednjeho wotrězka Tuchorskeje w Budyšinje je měšćanska rada nětko zelenu swěcu dała. Hinak hač na druhich městnach njetrjebaja za to žane štomy pušćić.
Budyšin (CK/SN). Jednohłósnje je Budyska měšćanska rada na swojim zašłym posedźenju wobzamknyła, posledni hišće njesaněrowany dźěl Tuchorskeje hasy wot Friedricha Engelsoweho naměsta hač k wotbóčce na Liebknechtowu wobšěrnje ponowjeć. Najwjetši problem při tym je centralne busowe dwórnišćo. Tohodla chcedźa projekt we wjacorych mjeńšich wotrězkach zwoprawdźić a 2. apryla započeć, bjez toho zo přijězd k busowemu dwórnišću zahaća. Na cyłkownej naprawje wobdźělene su nimo wysoko- a hłubokotwarskeho zarjada města tež měšćanski wopłóčkowy zawod a energijowe a wodowe zawody města. Tuchwilu mjenujcy nimaja tam hišće žane porjadne wotwodźowanje dešćikoweje wody, a nadróžne wobswětlenje dyrbja tohorunja ponowić.
Kapałku na kromje Kanec do směra na Swinjarnju tuchwilu ponowjeja. ...
Cyrkwinsku za 750. jubilej wožiwić
Wojerowske stare město chce ludźi z „bulwarom Cyrkwinska“ wot 4. junija do 1. julija přeprosyć, zo bychu tam flaněrowali a chłóšćili. Z projektom wobdźěli so přemysłowy kruh Město-přichod na jubileju „750 lět Wojerecy“.
Wojerecy (AK/SN). „Chcemy žiwu městnosć přebytka a dožiwjenja tworić, zapřijejo wikowanje, gastronomiju a posłužby.“ Tak předstaji cityjowa managerka a architektka Dorit Baumeister koncept wčera we wobydlerskim centrumje Piwarska hasa 1. „Z hrodom, coowom, wobydlerskim centrumom a kinom mamy kompaktnje štyrjoch sylnych partnerow w starym měsće.“ Wotpohladane je areal kwalitatiwnje nahódnoćić, zjawne rumy zapřijeć a poskitki rozšěrić.
