Smječkecy (AK/SN). Z wopomnjenskej taflu počesći Smječkečanska wosada mnohostronskeho architekta Woldemara Kandlera. Drježdźanski cyrkwinski twarski mišter (1866 – 1929) je wjace hač 23 cyrkwjow, mjez druhim w Smječkecach, jako architekt natwarić dał. K tomu přińdu kapałki na kěrchowach, farske domy a profanowe twarjenja. „Smječkečanska cyrkej je ze swojej bliskosću cyrkwinskeho ruma a wołtarnišća architektonisce tak koncipowana, zo móža tu ludźo zhromadnosć dožiwić“, fararka Karin Großmann měni. Poswjećenje wopomnjenskeje tafle wotměje so zajutřišim, njedźelu, 15. oktobra, w 10 hodź., na swjatočnych kemšach w Smječkecach. Přeprošeni su tež přiwuzni Kandlera.

Zaso tójšto namakankow

Wojerecy (SN). Z Wojerowskeho běrowa wyšeho měšćanosty rěka, zo su ludźo w času wot 1. do 30. septembra w měšćanskim běrowje namakankow zaso tójšto­ wěcow wotedali – wosebje­ kluče, kolesa a handyje. Štóž tajke abo podobne zhubjenki pyta, njech so hač do 28. febru­ara 2018 we wobydlerskim běrowje přizjewi.

W kuchni woheń zhašeli

Kamjenc. Z dotal njeznateje přičiny je so zawčerawšim popołdnju w bydlenju w Kamjencu kuchnja paliła. Jara spěšnje běchu zawołani wohnjowi wobornicy města přichwatali a płomjenja z C-rołu a pod škitom dychanja zhašeli. Woby­dlerka bydlenja a dalši wobydlerjo domskeho zamóchu wohenjej a kurej wućeknyć. Wuchowanska słužba pak wšitkich medicinsce přepytowaše.

Policist kołpja na dróze dosahnył

Porchow. Njedaloko Porchowskeho wot- jězda z awtodróhi wuhlada policajska patrulja srjedu popołdnju kołpja na dróze. Tež za policajskim awtom jěducy wodźer wosoboweho awta a šofer nakładneho awta to spóznaštaj a puć z warnowanskej swětło-signalowej připrawu „zawrěštaj“. Na to policist z awta skoči a kołpja do awta hrabny. Njeby dźě to prěni króć było, zo tam blisko Ramnowskeho hata hnězdźacu pjeriznu přejědu, wšako kołpje hdys a hdys swój rewěr měnjeja.

Darmotne parkowanske městna su w Budyšinje požadane. Wšako jězdźi tu wjele ludźi, tež do serbskich institucijow, na dźěło a dyrbi něhdźe swoje awto­ přez cyły dźeń wotstajić móc.

Budyšin (SN/mwe). Za Budyskich wobchadnych wobdźělnikow drje je dźensniši „pjatk tón třinaty“ skerje radostny dźeń. Wšako su Schillerowe zelenišća po zakónčenju wobšěrnych dróhotwarskich naprawow za wobchad zaso wotewrjene. Na­jebać to pak maja so Budyšenjo a dojězdźowarjo z tym bědźić, zo je wot zaš­łeje póndźele Lessingowa dróha zawrjena. Mjez Wallskej a Tuchorskej ma so asfaltowa woršta wuměnić. Tuž njemóža tež tam bydlacy swoje jězdźidło wotstajić a pytaja sej druhdźe městno. Kaž pak André Wucht z měšćanskeho zarjadnistwa zdźěla, móža tam při přihódnych wjedrowych wuměnjenjach přichodny tydźeń zaso awta bjezbłatnje parkować.

Na Budyskim Třělnišću je „Cirkus Busch“ swój wulki stan nastajił. Z teje přičiny je jedne z najwjetšich naměstow Budyšina wot přichodneje póndźele hač do 29. oktobra zašlahane a njehodźi so jako parkowanišćo wužiwać.

Jitk/Nowoslicy (aha/SN). Ludźo w Delanach słyšachu wčera popołdnju sirenu wuć. Alarmowani buštej wohnjowej woborje z Konjec-Šunowa a Ralbic, a to nic k wohenjej abo wobchadnemu njezbožu. Wojerowska centrala je alarm wuwowała trěbneje techniskeje pomocy při wuchowanju skotu dla. Wuchować mějachu wódneho buwoła, kiž bě so wo napjatu odyseju postarał.

Jitkowčan Enrico Pilz je so před lětom rozsudźił plahować buwoły, wědźo, zo njeje jenož mloko, ale wosebje tež mjaso tejele wosebiteje družiny howjadow mało cholesterina dla wo wjele strowše, ale tež słódniše. Kaž stajnje běše tež minjenu póndźelu na wobrodźenej pastwje za Jitkom jeho pjeć jednolětnych buwołow – štyri žónske a poł tony ćežki byk. Jemu drje so na pastwje njelubješe a tuž so wudoby. Wšo pytanje njebě wuspěšne. Připadnje pak wuhlada jeho Łazkowčan Dierk Šewc w lěsu za Łazkom.