Wosebity dźak Elikowskej-Winklerowej
Choćebuz (HA/SN). W Choćebuzu su so nětko dojednali zdźěłać strategisku koncepciju, kak móhli město přichodne 20 lět wuwić. W tak mjenowanym směrodajnym programje „Choćebuz 2035“ měło so postajić, što je za přichod města rozsudne, što je typiske wabjace w delnjołužiskej metropoli, kak so wona wot tamnych městow rozeznawa a za čo chce swoje pjenjezy hłownje wudawać.
Krótkopowěsće (25.01.17)
Wjace padow gripy
Budyšin. Hač do druheho kalendroweho tydźenja běchu w Budyskim wokrjesu
95 přizjewjenych padow gripy registrowali. W třećim tydźenju je ličba hižo na 132 padow rozrostła. Kaž nowinska rěčnica wokrjesa Sabine Rötschke Serbskim Nowinam zdźěli, je wokrjesej hač do 23. januara 211 přizjewjenych gripowych padow předležało.
Zeleni kritizuja Gabriela
Berlin. Braniborska zapósłanča Zelenych w zwjazkowym sejmje Annalena Baerbock je hospodarskeho ministra Sigmara Gabriela (SPD) kritizowała, dokelž so tón dale spjećuje kruty termin mjenować, hdy so wudobywanje brunicy zakónči. „To je njezamołwite napřećo wšitkim wobdźělenym. Ludźo we Łužicy trjebaja jasnu perspektiwu.“
Hižo tójšto sele přetrjebali
Za traktorom po zasněženych łukach
Projekt pochowanskeho lěsa sam pochowany
Wjace hač 900 ludźi je ze swojim podpismom podpěrało iniciatiwu, zo ma pola Kamjenca tak mjenowany pochowanski lěs nastać, štož měješe alternatiwa k pochowanju na pohrjebnišću być. Tele předewzaće pak je nětko po wšěm zdaću zwrěšćiło. Iniciatorojo chcedźa podobne projekty na druhich městnach podpěrać.
Kamjenc (UM/SN). Pochowanski lěs we wokolinje Kamjenca najprjedy raz žadyn njebudźe. Po tym zo su radźićeljo gmejny Haselbachtal projekt wotpokazali, njewidźi město Kamjenc žanu móžnosć, předewzaće zwoprawdźić. Wuslědk posedźenja radźićelow bě runje tak jasny kaž njewočakowany. Jenož jenički z 15 radźićelow bě za pochowanski lěs, dwanaćo hłosowachu přećiwo njemu a dwaj so hłosa wzdaštaj. Marion Junge bě chětro zadźiwana, přetož „signale do toho běchu hinaše“. Kamjenska zapósłanča Sakskeho krajneho sejma Lěwicy je jedna z iniciatorow projekta prěnjeho pochowanskeho lěsa wuchodneje Sakskeje. Dlěje hač tři lěta bě so wona za njón angažowała a je nětko ćim přesłapjeniša.
Policija (25.01.17)
Hodowny štom so palił
Połčnica. Mjeztym zo su mnozy swój hodowny štom hižo wotbyli, wón w jednym bydlenju w Połčnicy hač do wčerawšeho přeco hišće z wóskowymi swěčkami wudebjeny steješe. Něhdźe w 17.30 hodź. pak jedna ze swěčkow hałžku zapali, na čož so sekundy pozdźišo cyły štom paleše. 73lětnej wobydlerce so poradźi z přikrywami a wohnjohašakom płomjenja podusyć, prjedy hač alarmowana wohnjowa wobora přijědźe. Zranił so nichtó njeje, škoda wučinja 5 000 eurow.
Nowy wodowód bjezdomnym
Na swojim lońšim poslednim posedźenju je Łazowska gmejnska rada wobzamknyła, za něhdźe 66 000 eurow kłasć nowy wodowód ke gmejnje přisłušacemu twarjenju w Złyčinje. We wjaceswójbnym domje bydlitaj bjezdomnaj.
Spodobne programy předstajeli
Z dźěćimi w pěstowarnjach a zakładnych šulach ptači kwas swjećili
Radwor/Wotrow/Hory (SN/MWj). Za pěstowarnje a zakładne šule Hornjeje Łužicy njeje ptači kwas jenož jedyn z najwoblubowanišich nałožkow, ale naskerje tež tón, kiž je z najwjace přihotami zwjazany. Bjez dźiwa tuž, zo mějachu kubłarki a wučerki, ale tež njeličomne pomocnicy minjene dny ruce połnej dźěła, zo by za dźensniši wulki swjedźeń wšitko prawje sedźało, drasta runje tak kaž ptačokwasny program. Tajki su na přikład holcy a hólcy Radworskeho dźěćaceho domu dźens dopołdnja dźědam a wowkam na farje pokazali. Na čole kročachu njewjesta Madlenka Kralec, nawoženja Titus Wićaz a braška Benedikt Hicka.
Tež Wotrowska pěstowarnja je hižo dopołdnja swój program na tamnišej starej šuli předstajiła. Tak skićeše so znowa rjany wobraz, jako kwasny ćah z njewjestu Samiru Smolic, nawoženju Janom Brycku a brašku Walentinom Simonom po puću ćehnješe. W šuli dožiwichu starši, dźědojo a wowki kaž tež dalši wosadni basnički, spěwčki a rejki.
Camprowarjo zaso po puću
Pytaja dale za zmylkom
Pančicy-Kukow (SN). Milinowy zastaraćel ENSO pyta dale napjeće za přičinu, čehodla je minjene dny we wulkim dźělu Pančic-Kukowa nadróžne wobswětlenje wupadnyło. Na wjacorych pućach so wot srjedź zašłeho tydźenja nadróžne lampy njeswěćachu. Zdźěla wone mjeztym zaso funguja. Kaž wjesnjanosta Markus Kreuz (CDU) wobkrući, su fachowcy ENSO městnosć zmylka wobmjezowali a tam dokładnišćo za nim pytaja. Hač jedna so wo złamany kabl abo hač je něhdźe zawěstka defektna, dotal znate njeje.
Čitaja na dnju wopomnjeća
Najrjeńši wobraz mytowali
Pančicy-Kukow (SN/MWj). Kamjenska pěstowarnja Němskeho čerwjeneho křiža (DRK) je dobyła wubědźowanje, ke kotremuž bě zapósłanc Sakskeho krajneho sejma Alojs Mikławšk (CDU) we wobłuku swojich lońšich adwentnych wopytow we wosom dźěćacych dnjowych přebywanišćach swojeho wólbneho wokrjesa namołwjał. Tehdy bě wón dźěćom přepodał wobrazowy ramik z kisanja (Sauerteig), do kotrehož mějachu wone rjany wobraz z přirodnych maćiznow stworić.
Ramik bě pjekarnja Mika Zelnaka w Pančicach-Kukowje napjekła. „Wjeselu so, zo su w jednotliwych pěstowarnjach kreatiwnje a zahoriće rjane motiwy stworili“, praji Mike Zelnak. Wón je nětko hromadźe z prezidentom zjednoćenstwa sakskich rjemjeslnikow Rolandom Ermerom a Alojsom Mikławškom najrjeńši wobraz mytował. Jako myto smědźa holcy a hólcy Kamjenskeje pěstowarnje Pančičansku pjekarnju wopytać a budu w njej poprjancy pjec. Hromadźe z pjekarjom pak tež někotre strowe pizzy do kachli sunu.
