„To je cyłostatny nadawk“
Potrjechene komuny maja so na strukturnej změnje we Łužicy wobdźělić
Budyšin (SN/at). Łužica steji před wulkim přełamom. Wokrjesy Sprjewja-Nysa, Dubja-Błóta, Hornje Błóta-Łužica, Łobjo-Halštrow a bjezwokrjesne město Choćebuz w Braniborskej kaž tež wokrjesaj Budyšin a Zhorjelc w Sakskej chcedźa towaršnosć Hospodarski region Łužica zwr wutworić, zo bychu trěbnu strukturnu změnu srjedź lěta 2017 zmištrowali. Nastać ma wona z dotalneje towaršnosće Energijowy region Łužica-Błóta ze sydłom w Choćebuzu.
Budyski wokrjesny sejmik je na posedźenju minjenu póndźelu z třomi hłosawzdaćemi wobzamknył, zo so Budyski wokrjes z podźělom 5 000 eurow na nowej towaršnosći bjezposrědnje wobdźěli a jej přistupi. Wuměnjenje je, zo Braniborska a Sakska hoberske předewzaće dlěšodobnje podpěrujetej. „Produkcija miliny je w narodnym zajimje, tohodla měła so tudyša strukturna změna w narodnej zamołwitosći přewjesć“, podšmórny krajny rada Michael Harig (CDU).
Krótkopowěsće (14.12.16)
Pjenjezy za sakske šule
Berlin/Drježdźany. Zwjazkowe knježerstwo je so dźensa w Berlinje na změnu financneho zrěčenja mjez krajemi a Zwjazkom dojednało. Zapřijaty do toho je tež program wo modernizowanju šulow. Tak móže Zwjazk přichodnje do kubłanišćow w gmejnach inwestować, kotrež nimaja trěbne pjenjezy. Dóńdźe-li k doskónčnemu rozsudej wo změnje, móže Sakska hižo klětu wot lěća 175 milionow eurow za šule nałožić.
Swobodny stat dale inwestuje
Drježdźany. Swobodny stat Sakska chce saněrowanje třoch šulow w Budyskim wokrjesu z cyłkownje 454 000 eurami podpěrać. Wjeselić móža so we Łutach, Zemicach-Tumicach a Radebergu. Tole zdźěli dźensa socialne ministerstwo w Drježdźanach. Pjenjezy su z inwesticiskeho programa „Mosty do přichoda“, z kotrymž hižo wot lěta 1990 infrastrukturne projekty spěchuja.
Dwórnišćowy mision 25 lět
Policija (14.12.16)
Woheń ze smjertnym woporom
Wóspork. Při hašenju wohenja su wobornicy wčera rano we Wósporku ćěło muža namakali. Něhdźe w 7.30 hodź. wołachu jich k hašenju wohenja w jednoswójbnym domje na Schillerowej. Na hornim poschodźe namakachu wuchowarjo ćěło 86lětneho wobydlerja. Nuzowy lěkar móžeše jenož hišće jeho smjerć zwěsćić.
Za hrajkanišćo trjebaja spěchowanje
Róžant (aha/SN). Na poslednim posedźenju rady gmejny Ralbicy-Róžant w lěće 2016 pod nawodom druheho zastupowaceho wjesnjanosty Michała Šołty (SWZ) wobdźělichu so wjacori zajimowani wobydlerjo kaž tež zastupjerjo staršiskeje přirady Ralbičanskeje pěstowarnje „Dr. Jurij Młynk“. Mjez druhim chcychu woni zhonić stejišćo gmejnskeje rady nastupajo móžne nowe hrajkanišćo pěstowarnje, kotraž je w nošerstwje Serbskeho šulskeho towarstwa.
Lěto derje zakónčili
Dobre powěsće z Njeswačanskeje gmejnskeje rady
Njeswačidło (JK/SN). Na swojim poslednim lětušim posedźenju móžachu Njeswačanscy gmejnscy radźićeljo wčera jednotliwe dypki dnjoweho porjada bjez wulkich zadźěwkow wobjednać. Tak woni wobzamknychu, pomjenować nowe dróhi w Zarěču, zdźěla tež z ležownostnymi mjenami serbskeho pochada. Dotalnu hasu Při šuli w Njeswačidle přemjenowachu na Nowy hród. Móžne pomjenowanje Zarěčanskich dróhow běchu hižo na wobydlerskej zhromadźiznje w nowembrje rozjimali.
W zwisku z přemjenowanjom hasy Při šuli wjesnjanosta Gerd Schuster (CDU) zdźěli, zo chce gmejna z pomocu spěchowanskich srědkow jězdnju dospołnje ponowić a přidatne parkowanske móžnosće podłu hrodoweje murje wutworić. Dalša dobra powěsć wjesnjanosty bě, zo su prěnje přizwolenja spěchowanskich srědkow po zakonju wo zesylnjenju inwesticiskeje mocy dóšli. Z tymi pjenjezami chcedźa wosebje nadróžne wobswětlenje we wsach gmejny na jednotny standard z LED-swěcu přestajić.
Syć přepodali
Radwor (SN/MkWj). Připrawy k wotstronjenju dešćikoweje wody w Radworju přeńdu z nowym lětom do zamołwitosće wopłóčkoweho zwjazka Mała Sprjewja. Tole su gmejnscy radźićeljo na swojim wčerawšim posedźenju po dlěšej diskusiji wobzamknyli. Zaměrowy zwjazk je tuž zamołwity rołowu syć wudźeržować a porjedźeć. Wobydlerjo, kotřiž dešćikowu wodu do syće wjedu, dyrbja wotpowědny popłatk płaćić. Roły, kotrež maja wěstu wobličenu hódnotu, wopłóčkowy zwjazk gmejnje zaruna.
Diskusija mjez radźićelemi wjerćeše so předewšěm wo prašenje, hač njemóhli gmejnje kóšty nastać, na kotrež tuchwilu hišće nichtó njemysli. Přitomny předsyda wopłóčkoweho zaměroweho zwjazka Andreas Skomudek spyta skeptikarjow změrować, zo su katastrofy tajkeho razu absolutne wuwzaće. Wuslědk wothłosowanja wšak pokaza, zo njeje wšitkich přeswědčił: Dźewjećo běchu za přepodaće syće zaměrowemu zwjazkej, dwaj přećiwo tomu a štyrjo so hłosa wzdachu.
Wokrjes žada sej korektury
Bywšu zakładnu šulu w Běłym Chołmcu chce Łazowska gmejna priwatnemu inwestorej předać. To pak po wšěm zdaću tak lochko njeje, kaž so spočatnje zdaše.
Łaz (AK/SN). Rozsud, bywšu Běłochołmčansku zakładnu šulu „Fritz Kube“ předać, ma so w januaru cofnyć. Tole připowědźi Łazowski wjesnjanosta Thomas Leberecht (CDU) na wčerawšim posedźenju gmejnskeje rady. Pozadk su kritiske přispomnjenja komunalneho dohladowanskeho zarjada Budyskeho wokrjesa. „Dyrbimy posudk wo wobchadnej hódnoće předpołožić, kotryž njesmě starši hač dwanaće měsacow być. Na te wašnje ma so dokładna hódnota ležownosće a twarjenja zwěsćić“, Leberecht rozłoži. Po tym maja objekt znowa wupisać.
Hakle w nowembru bě gmejnska rada rozsudźiła, komunalnu imobiliju priwatnemu inwestorej předać. Gmejna sama postaji hódnotu na 10 000 eurow. Inwestor chcyše hłowne twarjenje na bydlenja z wobstajnym hladanjom přetwarić. „Wón k swojemu předewzaću dale steji a chce nětko spytać, wuwzaćnu dowolnosć dóstać“, rjekny wjesnjanosta.
Andreas Zickler a Falk Günther (wotlěwa) ze Smječkečanskeho Rothec ...
„Što wočakujeće wot rozmołwy?“
Budyšin (SN/at). Reakcije na wotpohlad Budyskeho krajneho rady Michaela Hariga (CDU), 15. decembra z předsydu wokrjesneho zwjazka NPD Budyšin Marcom Wruckom so zetkać, pokazachu so wčera tež na posedźenju wokrjesneho sejmika. W hodźinje za wobydlerske naprašowanja chcyše Bruno Rössel z Budyskeje Lěwicarskeje młodźiny wědźeć, čehodla krajny rada „ludźom podij skići, kotřiž su ćěkancow a młodych lěwicarjow po měsće honili. Što wočakujeće wot teje rozmołwy?“ Tele prašenje zbudźi w rjadach frakcije CDU bórbotanje. Krajny rada pak swoje postupowanje zakitowaše. Wón poskića rozmołwy wobydlerjam, a jako jedyn z nich je so Wruck přizjewił.
Wo wosobje Wrucka wědźeše tež wokrjesny radźićel Jürgen Körtzing w hodźinje za naprašowanja radźićelow powědać. Sam je prawicarskich demonstracijow dla, kotrež bě Wruck w Budyšinje organizował, z NPD wustupił. Rozmołwu z Wruckom nima Körtzing za wužitny.
Krajny rada rěčeše w tym zwisku wo „swójskej dynamice, kotraž njeměła być“.
Pruwowanje wobstała
To bě nowum w skutkowanju Budyskeho wokrjesneho sejmika: Prěni raz je społnomócnjena za serbske naležnosće wokrjesnym radźićelam wo swojej dźěławosći rozprawjała a namjety w zmysle płódneje dwurěčnosće w krajnoradnym zarjedźe podała. To je Regina Krawcowa wobsahowje derje zmištrowała. Radźićeljo tuž zhonichu, zo wona wě, što chce. To je tež krajny rada Michael Harig přiznał. Zo je tam wosoba, kotraž nastupajo serbske zajimy tež jemu „na porsty“ hlada, njeje wón snano do toho zwučeny był.
Reginje Krawcowej njebě lochko před wokrjesnym sejmikom rěčeć. Trochu drje so wona tež boješe, swój publikum prawje njedocpěć. Nutřkowny njeměr drje njemóžeše zatajić, to wšak je čłowjeske. Z wčerawšeho posedźenja je pak wona skrućena wušła. Z druhimi słowami: pruwowanje wobstała, sebjewědomje skrućene, na dobro našeho ludu. Axel Arlt
