Wo swojich dožiwjenjach powědał
Policija (26.02.18)
Pod a z drogami, ale bjez papjerow
Běła Woda. Hnydom wjacore delikty su zastojnicy zwěsćili, jako kontrolowachu minjeny pjatk wječor w Běłej Wodźe wosobowe awto typa Audi. Dokelž so 35lětny wodźer napadnje zadźerža, nasta podhlad, zo móhł wón pod wliwom drogow stać. A podhlad so při tesće jako prawy wopokaza. Nimo toho namakachu pola muža wjacore titki z kristalinym próškom. A skónčnje policisća při dalšim přepruwowanju 35lětneho zwěsćichu, zo tón scyła žanu jězbnu dowolnosć njeměješe, dokelž běchu ju jemu hižo sćazali. K deliktej jězdźenja pod drogami přińdźetej tuž hišće wobsydstwo wopojnych srědkow a jězdźenje bjez jězbneje dowolnosće. Tež wobsedźerka awta změje so zamołwić, zo bě mužej awto přewostajiła, byrnjež wón dowolnosć njewobsedźał.
Wědźeć, što so stawa
Je dźensa přemało z wašeho regiona w Serbskich Nowinach abo njeje scyła ničo z wašeje wsy? Změńće to a stańće so z korespondentom jeničkeho serbskeho wječornika. Informujće nas wo nowosćach w swojej wsy a wokolinje kaž tež wo podawkach w swojich towarstwach. Zazwońće redakciju wječornika w Budyšinje pod telefonowym čisłom 0 35 91 / 57 72 32 abo pósćelće nam informacije abo tež wobrazy z e-mailku na re.
Chcemy wědźeć, što so stawa, zo móhli čitarjam SN a dalšim zajimcam wo nowosćach na serbskich a dwurěčnych wsach rozprawjeć. Informujće nas, wjeselimy so nad kóždym pokiwom. Redakcija Serbskich Nowin
Wo spěchowanje so prócować
Kubšicy (CS/SN). Ćežišći planowanych inwesticijow w Kubšiskej gmejnje stej lětsa nuznje trěbne saněrowanje Zakładneje šule Bošecy a wutwar wokrjesneje dróhi přez Jenkecy. Tole rozłoži radźićelam gmejny Kubšicy wjesnjanosta Olaf Reichert (CDU) na zašłym wuradźowanju gmejnskeje rady. Předewzaći pak móža hakle zwoprawdźić, hdyž dóstanu trěbne spěchowanske srědki přizwolene.
Wjesnjanosta skedźbni wšitkich wobydlerjow na to, zo je Leaderowa kónčina Budyski Horni kraj, kotrejž tež Kubšiska gmejna přisłuša, srjedź měsaca namołwu za nowe projektowe srědki zahajiła. Hač do 18. apryla móža priwatnicy kaž tež zawody swoje podłóžki za projekty w běrowje regionalneho managementa Leaderoweje kónčiny w Korzymje zapodać a so wo spěchowanske srědki prócować. Na přikład móže młoda swójba, kotraž so rozsudźi prózdne, do lěta 1960 nastate twarjenje kupić a je saněrować, ze spěchowanjom Leaderoweho managementa hač do 90 000 eurow ličić.
Protestujo zhromadźiznu wopušćił
Róžant (SN/JaW). Bjezmała z eklatom by so zašłe wuradźowanje gmejnskeje rady Ralbic-Róžanta skónčiło. Hnydom na spočatku skedźbni radźićel Józef Woko (SWZ Delany) na to, zo bě hižo wjacore razy próstwu stajił, wustawki popłatkow wopłóčkoweho zwjazka Při Klóšterskej wodźe do dnjoweho porjada zapřijeć a wobjednawać. Tola tež minjeny štwórtk wone na porjedźe njestejachu. „To je za wuradźowanje w aprylu předwidźane“, wjesnjanosta Hubertus Ryćer (CDU) wujasni. „Potom su wustawki wobzamknjene a njemóžemy ničo wjac činić. Sym zludany, kak so tu z temu wobchadźa. Njedam so hižo za nós wodźić. Takle demokratija njefunguje“, Woko zwurazni a hrožeše zhromadźiznu wopušćić.
Posudki skerje wottrašeja
Měło město Budyšin sławnu „Krónu“ kupić a wobhospodarjeć abo nic?
Budyšin (SN/at). Wužiwana bu Budyska hala „Króna“ za ptačokwasne zarjadowanja Serbskeho ludoweho ansambla za čas NDR, za wobydlerske zhromadźizny w přewrótowym času, za schadźowanki abo jako přechodne hrajnišćo Němsko-Serbskeho ludoweho dźiwadła.
Krabat, Čorny młynk a pisar wjedli
Krótkopowěsće (26.02.18)
Za Łužicu wabili
Hamburg. Na wčerawšich wikach Němskeho kolesowarskeho kluba ADFC je tohorunja turistiski zwjazk Łužiska jězorina w Hamburgu wo turistow wabił. Kaž rozprawja Serbski rozhłós, je so łužiski zwjazk z dalšimi turistiskimi zwjazkami našeho regiona předstajił. Mjez druhim předstajichu tam sydom kolesowarskich šćežkow srjedźneje a Delnjeje Łužicy.
Přidatne parkowanišća
Wojerecy. Hišće lětsa maja we Wojerecach nowe parkowanišća nastać. Kaž z wupisanja wuchadźa, chcedźa naprawu srjedź meje zwoprawdźeć započeć. Nastać maja přidatne zjawne městna mjez šulu za zbrašenych a policajskim rewěrom na Frenclowej. Hižo loni bě měšćanska rada wobzamknyła parkowanski koncept za stare město, po kotrymž ma tam cyłkownje 40 nowych městnow nastać.
Jenička šulerska skupina
Policija (23.02.18)
Zawinowar njezboža wuslědźeny
Budyšin. Na mnohe pokiwy swědkow je policija zawinowarja njezboža z ćežko zranjenej wosobu při Budyskej Röhrscheidtowej kupjeli zašły pjatk nětko wuslědźiła. Jako zastojnicy wčera 82lětneho šofera VWja w Hornim kraju wopytachu, bě wuměnkar widźomnje wolóženy, zo su jeho namakali. Wón swoje přeńdźenje hnydom přizna, policija zdźěli. Na awće rentnarja zawěsćichu slědy, jězbnu dowolnosć jemu sćazachu. Nětko so statne rěčnistwo z padom zaběra. Dźens tydźenja bě tehdy njeznaty blisko Röhrscheidtoweje kupjele do 77lětneje pěški zrazył a ćeknył, bjez toho zo by so wo zranjenu starał. Staw ćežkozranjeneje je dale kritiski. Kaž policija informuje, lěkarjo dale wo jeje žiwjenje wojuja.
Přednošuje wo Brazilskej
Chrósćicy. Wo swojim přebytku w brazilskim pralěsu, wo zetkanju z Indianami a dalšimi zajimawymi ludźimi rozprawja jutře, sobotu, w 19.45 hodź. Pětr Rab w Chróšćanskej putniskej hospodźe. Stajnje při sebi měješe Kukowčan swoju kameru, z kotrejž je fantastiske motiwy zapopadnył. Turistiska ekspedicija wjedźeše jeho něhdźe 3 000 km po Brazilskej.
Sceniske wodźenje po muzeju
Budyšin. Njedźelu, 25. februara, poskići Budyski Serbski muzej dalše rjane dožiwjenje. W zwisku z wustajeńcu „Krabat – Muž – Mytos – Marka“ wotměja tam mjeztym třeće sceniske wodźenje po přehladce. Krabat, pisar a Čorny młynk chcedźa hosći po wosebitej přehladce wo chorwatskim wyšku wodźić. Jako Krabata dožiwja zajimcy Wolfganga Krausa, jako pisarja genealogu Hansa-Jürgena Schrötera a jako Čorneho młynka Dietera Klimeka. Wodźenje započnje so w 15 hodź. a traje něhdźe hodźinu.
Rjad wuměłskich rozmołwow
