Swój 26. serbski zapust swjećachu minjeny kónc tydźenja w ...
Komuny měli so přihotować
Fachowa dźěłarnička we Wojerecach so z digitalizaciju zaběrała
Wojerecy (AK/SN). Komuny měli so na nowy digitalny dźěłowy a powołanski swět lěpje nastajić. „Wone dyrbjeli akterojo a zdobom pohonjerjo być. Njeměli wuwiće zaspać.“ To je Jens Leschner, sobudźěłaćer koordinowanišća za kubłanje města Wojerec a regionalneho dźěłanišća za kubłanje, demokratiju a žiwjenske perspektiwy tele dny w kompjuterowym muzeju Konrada Zusy we Wojerecach zwuraznił. Na dwudnjowskej fachowej dźěłarničce su so tam z temu „Kubłanje za digitalny dźěłowy a žiwjenski swět“ dokładnje zaběrali.
Krótkopowěsće (31.01.18)
Bjezdźěłnosć postupiła
Budyšin. We wuchodnej Sakskej bě w januaru 22 010 bjezdźěłnych, 1 954 wjace hač loni w decembrje (+ 9,7 procentow) a 3 248 mjenje hač před lětom (- 12,9 procentow). Wuwiće wotbłyšćuje sezonalne efekty, wosebje we wot wjedra wotwisnych powołanjach. Nimo toho wuběžachu wobmjezowane dźěłowe městna kónc lěta, rjekny Thomas Bernd, předsyda jednaćelstwa Budyskeje agentury za dźěło.
Žadaja sej dale wutwar A4
Budyšin/Drježdźany. Wobchad na awtodróze A4 mjez Drježdźanami a Zhorjelcom je zašłej lěće wo dźesać procentow přiběrał a dale stupa. To wujewja statistika posudźowarja, kotruž je Alianca hornjołužiskich politikarjow tele dny w Drježdźanach předstajiła. Loni bě čaru cyłkownje 45 000 jězdźidłow wob dźeń wužiwało. Politikarjo wokoło zapósłanca Sakskeho krajneho sejma Marka Šimana (CDU) žadaja sej tuž dale wutwar A4 na šěsć čarow.
Serbšćina njezastupjena
Wjelki wjesnjanow zaběrali
Policija (30.01.18)
Wobydler zadobywanje njepytnył
Šěrachow. Nade wšo kruty spar měješe po wšěm zdaću w nocy na minjenu njedźelu wobydler wjaceswójbneho domu na Budyskej dróze w Šěrachowje. Hakle njedźelu dopołdnja wón zwěsći, zo běchu so njeznaći w nocy do toho do domu zadobyli, płót skóncowali, wjacore wokna a chěžne durje rozbili, jako so z nimi do twarjenja łamachu. Kaž přiwołani policisća pozdźišo zwěsćichu, běchu zadobywarjo w bydlenju w přizemju pobyli. Dokelž pak bě te runje njewobydlene, drje tam ničo pokradnyć njemóžachu. Wo wšěm tym wobydlerjo hornjeho poschoda ničo pytnyli njejsu. Načinjenu wěcnu škodu trochuje wobsedźer na něhdźe 2 000 eurow. Kriminalna policija so nětko z tymle padom bliže zaběra a spyta skućićelow wuslědźić.
Wěnuja so jónkrótnosćam
Turistiske regionalne zhromadźenstwo lětsa znowa wusměrjene
Njeswačidło (JK/SN). Jako je André Köhler na zašłym posedźenju Njeswačanskeje gmejnskeje rady dźěławosć a struktury managementa Leaderoweho regiona Hornjołužiska hola a haty rozłožił, pokaza wón tež na prócowanja managementa na polu turizma. Po tym zo běchu Turistiske teritorialne zhromadźenstwo hola a haty w Budyskim kraju kónc lěta 2017 rozpušćili, wutwori regionalny management wotrjad turizm.
Wo ludowych spěwach
Budyšin. Sekcija hudźba Maćicy Serbskeje a Towarstwo za staru serbsku ludowu hudźbu přeprošatej štwórtk, 1. februara, w 19.30 hodź. do sydarnje Budyskeho Serbskeho domu. Tam budźe přednošk na temu „Přehlad a posudźowanje zběrkow serbskich ludowych spěwow“. Přednoškej přizamknje so rozmołwa wo mjenowanej temje.
Předstaja zběrku lyriki
Choćebuz. Zo njeje Bernd Pittkunings jenož nadarjeny spěwytwórc, ale tohorunja wuběrny znajer poezije, pokazuje nowa zběrka delnjoserbskeje lyriki „Basnikarska kjarmuša“. Kniha je do hód w Ludowym nakładnistwje Domowina wušła. Hromadźe z cejdejku ju nětko předstaja, a to štwórtk, 1. februara, we 18 hodź. w bibliotece Choćebuskeho Serbskeho domu. Wšitcy lubowarjo basnjow su wutrobnje přeprošeni.
Wjetšina pancany měd spóznała
Hižo tójšto lět přewjeduja w Smječkečanskim Domje swjateho Jana jónu wob lěto zjawne zarjadowanje k najwšelakorišim temam. Wčera steješe wěstota wšědnych žiwidłow w srjedźišću jara derje wopytaneho přednoška.
Smječkecy (SN/MWj). Před wobšudnistwom ze žiwidłami njemóže sej nichtó wěsty być, a za normalneho přetrjebarja je nimo toho jara ćežko tajke wobšudnistwo spóznać. Tele dopóznaće zašćěpi so wčera do pomjatka nimale sto wopytowarjow, kotřiž běchu do Smječkečanskeho Domu swj. Jana přišli. Tam přednošowaše dr. Handrij Klimant ze zwjazkoweho zarjada za škit přetrjebarjow a wěstotu žiwidłow (BVL). Rodźeneho Radworčana bě nawoda domu Tadej Šiman před lětom na Berlinskim Zelenym tydźenju zetkał a jeho do Łužicy přeprosył.
W Blunju su minjenu sobotu ženjeni camprowali. Jako Neptun, swěćata ...
Film wo tragiskim dóńće Židow
Budyšin (JBR/SN). Kaž dotal hišće nihdy tak kopata połna bě tele dny kinowa žurla Budyskeho Kamjentneho domu. Organizatorojo běchu přeprosyli na film režisera Dirka Szusziesa „Smy Židźa z Breslauwa“. Dokumentacija powěda wo tragiskim dóńće 14 židowskich młodostnych 1933 w Breslauwje. Woni su dźensa 90 lět a posledni, kotřiž běchu hitlerski pogrom a deportaciju přežiwili.
Breslau bě w 1930tych lĕtach z 20 000 přisłušnikami třeća najwjetša židowska wosada Němskeje. Nĕtko wopřijima wona jenož hišće 350. Někotři rjekojo filma su město swojeho młodźinskeho časa njedawno wopytali. Wo tehdyšim žiwjenju wosady swědči jenož hišće synagoga, mĕstno modlitwy a židowskeje kultury. „To njeje hižo naš ródny Breslau, to je nowe město Wrócław“, měnja woni w swojich interviewach.
Kaž režiser připowědźi, porěči jedna z rjekow filma Anita Lasker-Wallfisch jutře, 31. januara, składnostnje 73. róčnicy wuswobodźenja koncentraciskeho lěhwa Auschwitz w zwjazkowym sejmje. Jako huslerka lěhwoweho orchestra bě wona kacet w Auschwitzu přežiwiła.
