Mnozy šulerjo Kulowskeje wyšeje šule „Korla Awgust Kocor“ so zawčerawšim njemało dźiwachu, jako widźachu na šulskim dworje awto z napisom „Polenmobil“. Dale bě napis tež pólsce podaty. Na chódbje prěnjeho poschoda šule wisaše pólska chorhoj a běchu wšelake informaciske łopjena wupołožene. Pólski institut w Darmstadće přewjeduje cyłoněmski projekt. Hižo lěto jězdźa po jednotliwych zwjazkowych krajach Němskeje. Braniborski ministerski prezident Dietmar Woidke (SPD) tomule projektej kmótři.

W oktobru je mobil w Braniborskej a Sakskej po puću. Zaměr je mjez šulerjemi a wučerjemi zajim za pólsku rěč, stawizny, literaturu a žiwjenske wašnja budźić. Tomu su tež w Kulowje wotewrjeni, nic jenož dokelž maja partnerskej šuli w Pólskej a Čěskej. Šulska nawodnica prošeše tuž mobil do Kulowskeje šule. Zdobom informowaše pólsku partnersku šulu w Lubomierzu wo tym. Wottam přijědźechu ze šěsć šulerjemi do Kulowa.

Njebjelčicy (JK/SN). Po tym zo předleži wotličenje wobhospodarjenskich kóštow za Njebjelčansku pěstowarnju, měješe gmejnska rada wčera wječor njedźakowny nadawk, wo tym rozsudźić, zo wot januara­ staršiski podźěl zwyša. Po napjatej, ale přiwšěm wěcownej diskusiji wobzamknychu radźićeljo z jednym napřećiwnym hłosom, zwyšić přinošk za pěstowarske městno wo wosom eurow na 110 a za žłobikowe wot dotal 170 na 180 eurow měsačnje. Dale dyrbjachu na poručenje krajneje direkcije zwyšić ležownostnej dawkaj A a B. Posledni raz běchu sadźbu za njej w lěće 2012 zwyšili. Wot klětušeho změni so sadźba za ležownostny dawk A za pola a łuki wot 305 na 320 a dawk B za wobtwarjene ležownosće wot 398 na 420 procentow. Přemysłowy dawk so njezměni. Nowy popłatk za pěstowarnju a sadźby za ležownostne dawki leža po słowach wjesnjanosty Tomaša Čor­na­ka (CDU) w přerězku gmejnow zarjadniskeho zwjazka Při Klóšterskej wodźe.

Gozna (SN). Wuběrk za serbske naležnosće wokrjesa Sprjewja-Nysa je srjedu w Goznej namjety Rady za serbske naležnosće Braniborskeho krajneho sejma witał, za dalše komuny přisłušnosć k serbskemu sydlenskemu rumej zwěsćić. Rada bě namjetowała, přisłušnosć Derbna, Gubina, Baršća, Kopańc­ a dalšich gmejnow wokrjesa deklarować, kaž z lista wuběrka wuchadźa. „W potrjechenych komunach je wobstajna rěčna a kulturna tradicija přez wotpowědne fakty a pokazki hač do dźensnišeho dopokazujomna, byrnjež jednotliwe wuměnjenja wšelake byli.“ Takle rěka w dokumenće, kotryž staj předsyda Fred Kaiser a městopředsyda Egbert S. Piosik podpisałoj. Wuběrk za serbske naležnosće wokrjesa Sprjewja-Nysa wočakuje, zo Kraj Braniborska próstwy serbskeje rady krajneho sejma pozitiwnje registruje, je swědomiće pruwuje a wěcywustojnje wo nich rozsudźi.