Po dobrych třoch měsacach twarskeho časa na nowej wuchowanskej ...
Serbska nawigaciska app přistupna
Budyšin (juny/SN). Serbski nawigaciski system je dźensa wušoł. Z najnowšej wersiju nawigaciskeje aplikacije „OsmAnd“ maja zajimcy prěni raz serbsku kartu za smartfony a tablety k dispoziciji. App wužiwa material njekomercielneho wotewrjeneho projekta OpenStreetMap.
Nimo serbskich pomjenowanjow městow a wsow poskića app Serbam dalšu lěpšinu. Prěni króć je móžno, sej serbsku jako kartowu a nawigacisku rěč wuzwolić. Tak móža Serbja wotnětka w swojej maćeršćinje po Łužicy nawigěrować. Starali su so wo to njeličomni dobrowólni pomocnicy, kotřiž běchu karty cyłeje Łužicy we wólnym času do serbšćiny přełožili.
Krótkopowěsće (05.10.16)
Studentow imatrikulowali
Budyšin. Direktorka Budyskeje studijneje akademije prof. dr. Barbara Wuttke witaše wčera 180 studentow na imatrikulaciju do Budyskeho Němsko-Serbskeho ludoweho dźiwadła. Něhdźe połojca studentow je z Budyskeho a Zhorjelskeho wokrjesa. Studij we wobłukach management, informatika kaž tež elektro- a medicinska technika traje tři lěta.
Hosćićelski zapis jězoriny
Zły Komorow. Turistiski zwjazk Łužiska jězorina přihotuje tuchwilu hosćićelski zapis lěta 2017. Hač do 12. oktobra móža so zajimcy, kotřiž chcedźa tam ze swojim poskitkom přebytka sobu zapřijeći być, přizjewić. Klětu w januaru ma zapis potom wuńć, tak zo móhli jón potom tež na turistiskich wikach prezentować a rozdźěleć.
Pücklerowe listy přistupne
Pola Libona frontalnje do štoma
Policija (05.10.16)
Mortweho namakali
Wojerecy. Při železniskich kolijach blisko mosta nad Čornym Halštrowom we Wojerecach su zawčerawšim připołdnju ćěło muža namakali. Kaž při blišim přepytowanju zwěsćichu, jedna so wo 44lětneho bjezdomneho z Wojerowskeje wokoliny. Kak je wón dokładnje žiwjenje přisadźił, njeje dotal znate, po wšěm zdaću pak je ćah do njeho zajěł.
Diesel kradnyli
Kulow. Póndźelny swjaty dźeń su njeznaći wužili a w Kulowje diesel kradnyli. Woni wotklumpachu něhdźe 200 litrow ćěriwa z bagra, kotryž steješe na twarnišću na Salowskej dróze. Kriminalna policija pad přepytuje.
Třećinu inwentara přewozmu
Nalěto chcedźa Slepjanski šulski centrum twarić započeć
Slepo (AK/SN). Plany za twar němsko-serbskeho šulskeho centruma w Slepom dale postupuja. Tole podšmórny nawoda twarskeho wotrjada Slepjanskeho zarjadniskeho zjednoćenstwa Steffen Seidlich na wčerawšim posedźenju Slepjanskeje gmejnskeje rady. „Zwickauski inženjerski běrow jako generalny planowar zdźěła wšitke trěbne naćiski a stara so tohorunja wo trěbne dowolnosće“, wón rozłoži.
Z pomocu ćežkeje techniki su wčera a dźensa třěchu wodarnje při ...
Policija (04.10.16)
W probowym času alkohol pił
Běła Woda. Hdyž maš swoju jězbnu dowolnosć na probowy čas, nimaš při wodźenju jězdźidła pod wliwom alkohola stać. To je sej w nocy na minjenu njedźelu 26lětny w Běłej Wodźe wot policistow rozłožić dać dyrbjał. Zastojnicy běchu młodeho muža na Budyskej dróze kontrolowali a pola njeho 0,3 promile alkohola naměrili. Štož w normalnym padźe žadyn problem njeje, wšak za probowy čas jězbneje dowolnosće njepłaći. Tak ma 26lětny nětko ze selenej pokutu ličić. W najhóršim padźe móže so stać, zo dyrbi wón swoju jězbnu dowolnosć zaso wotedać.
Domchowanka sta ludźi wabiła
Čorny Chołmc (UH/SN). Mjeztym hižo tradicionalnu domchowanku stej sobotu a njedźelu towarstwo Krabatoweho młyna a Domowinska župa „Handrij Zejler“ hromadźe z mnohimi pomocnikami w Čornochołmčanskim Krabatowym młynje přewjedli. A dokelž bě wjedro lěpše hač připowědźene, móžachu tam wopytowarjow po stach na nazymsce wupyšenym arealu witać.
Plany wopytowarstwa běchu dosć rozdźělne. Jedni mějachu hišće flair 5. Krabatowych swjedźenskich hrow před wočomaj a chcychu sej nětko Krabatowy młyn raz cyle woměrje wobhladać, kaž šěsćwosobowa Henkelec swójba z Kamjenca. Druzy so cyle zaměrnje na rjemjeslniske a předawanske stejnišća měrjachu, zo bychu sej tón abo tamny přirodny wudźěłk sobu domoj wzali. Dalši so hnydom za wupyšenymi blidami napřećo jewišću zesydachu a wottam wotměnjawy dwurěčny kulturny program wobkedźbowachu. Wuhotowali su jón nimo dalšich ćělesow Chróšćanscy muzikanća, kapała Horjany, Brětnjanske a Wojerowske dźěći w swojej narodnej drasće, Rakečanska dujerska kapała kaž tež dźěći a młodostni Kulowskeho kulturneho kruha.
Přećeljo a swójbni kał tołkali
Spočatk winowca je čas, hdyž ludźo krušwy, jabłuka a winowe kiće šćipaja, hdyž morchej a běrny do pincy chowaja a kał předźěłuja. Módry a běły kał drje so zdźěla tež składuje, ale wulki dźěl běłeho kała předźěłuje so nazymu na kisykał. Čas mojeho dźěćatstwa běštej w zymje kisykał k wobjedu a kisała kórka k wječeri nimale jeničkej zeleninowej přiłoze. Zo je kisykał strowy, je dawno znate. Byrnjež sej dźensa kóždy kisykał we wobchodźe za poměrnje mało pjenjez kupić móhł, je w minjenym času samozhotowjenje kisykała w domjacnosćach přiběrało.
Tola hišće rjeńšo hač něhdźe doma w swojej kuchni je tołkanje kała we wjetšej zhromadnosći. To je Florian Rynč hižo před lětami spóznał. Tuž je tež minjenu sobotu znatych a přećelow k sebi na dwór přeprosył, zo bychu kał při lóštnej bjesadźe do keramikowych horncow tołkali. Ličba tych, kotřiž so spočatk oktobra w Rynčec něhdyšej bróžni zetkawaja, lěto wob lěto přiběra. Lětsa bě jich 28 ludźi. Što dyrbja woni sobu přinjesć? Swójbje abo potrjebje wotpowědowacy hornc, dobru naladu a pjenjezy za snadny obolus.
