Hólčkej žiwjenje wuchowali

Brětnja/Michałki. Dźakowano swojemu angažowanemu a wobhladniwemu jednanju su zawčerawšim wjacore žony při jězoru w Brětni/Michałkach blisko Wojerec třilětneho hólca před smjerću wuchowali. Tón bě něhdźe w 15.30 hodź. na bliskim hrajkanišću dohladej swojeje maćerje twochnył. Mać hnydom za nim pytaše a wuhlada jeho, kak bjez pohiba na wodźe jězora płuwa. Jeje wołanje je wjacore žony w bliskosći na njezbožo skedźbniło. Wone skočichu do wody, wućahnychu dźěćo z wody a započachu je reaniměrować, doniž přiwołany nuzowy lěkar njepřijědźe. Wuchowanski heli­kopter dowjeze třilětneho do specialneje kliniki. Po informacijach policije hólčk hižo w žiwjenskim straše njeje. Policija dźakuje so žonam za jich kuražowane jednanje, z kotrymž su dźěsću žiwjenje wuchowali.

Chrósćicy. Štóž dotal hišće najnowšu inscenaciju dźiwadłoweje skupiny Bratrowstwa „Jědźk a lěnjoch“ widźał njeje, změje k tomu kónc tydźenja składnosć. Žortnu hru Jana Aleksandera Fredra pokazaja lajscy dźiwadźelnicy njedźelu, 12. měrca, w 16 hodź. na Chróšćanskej Krawčikec žurli. Dalše předstajenja budu njedźelu, 26. měrca, w 16.30 hodź. w Budyskim Serbskim domje, sobotu, 1. apryla, w 19 hodź. na Konječanskej žurli a njedźelu, 2. apryla, w 17.30 hodź. na Kulowskim Starym dwórnišću.

Wo stawiznach wopismow

Budyšin. Na dalši přednošk w rjedźe „Što wopisma powědaja“ přeproša Budyski archiwny zwjazk wutoru, 14. měrca, w 19 hodź. Zajimcy zhonja tónraz nadrobnosće wo tworach wikowarjow, wo nałožkach rjemjeslnikow a wo nabožnym žiwjenju w Budyšinje do a po reformaciji. Wopisma z Budyskeho měšćanskeho archiwa zmóžnjeja zajimawe dohlady do wšědneho dnja za čas reformacije.

W dźěłarni za zbrašenych swj. Michała klóštra Marijineje hwězdy w Pančicach-Kukowje su přistajeni w tamnišej blidarni njedawno póstny křiž zhotowili. Wot minjeneho tydźenja steji tón poswjećeny­ w klóšterskej cyrkwi.

Pančicy-Kukow (SN/mwe). Steffen Wjacławk je ćěsla w klóšterskej dźěłarni swj. Michała. Hromadźe z někotrymi zbrašenymi je wón wulki póstny křiž zhotowił, kotryž su w klóšterskej cyrkwi na drjewjane nóžki stajili. Tak móže jón kóždy widźeć. Wšako je křiž, wulki kaž čłowjek, nachileny. Nastał je z pušćeneho štoma robinije, kotruž běchu dźěłaćerjo bli­darnje sami z lěsa přiwjezli. „Při tym bě nam wažne, zo njeje zdónk cyle runy“, klóšterski rjemjeslnik přeradźa. Do zarězka křiža je něhdźe 60 małych, tohorunja w blidarni rězbarjenych křižikow zasadźenych, kotrež móža sej wopytowarjo a kemšarjo sobu wzać. Pódla pak steji mała tyza, zo bychu do njeje pjenježny dar za so­buwzaty křižik połožili. „Budu-li křižiki wšitke wuwzate, to přez cyły póstny čas přeco zaso nowe zhotowimy“, Steffen Wjacławk rozłožuje. „Wšako je to rjane znamjo póstneho časa.“

Chróšćanscy gmejnscy radźićeljo mějachu­ so na wčerawšim posedźenju z tójšto naležnosćemi zaběrać. Nimo dodawkow k twarskim wustawkam bě trjeba,­ wěnować so kontroli komunalnych­ postajenjow.

Chrósćicy (JK/SN). Nimale na kóncu wčerawšeho­ posedźenja Chróšćanskich gmejnskich radźićelow, jako mějachu woni składnosć, swoje abo starosće wobydlerjow přednjesć, wuwi so zajimawa diskusija k winowatosćam wobydlerjow. Nastork za to bě hižo na zašłym posedźenju wobzamknjene poručenje, zo měł wobsedźer ležownosće swój žiwy płót tak přitřihać, zo hižo do zjawneho ruma njesaha. Dokelž pak so potrjecheny wobydler na to złožuje, zo měli tajke postajenja za wšitkich wobsedźerjow ležownosćow płaćić a zo měli so woni tohorunja po rjadowanju gmejny měć, so wón po přeću gmejny njezměje.