Młodźina hosći derje zastarała
Radwor (SN/MkWj). Při najrjeńšim wjedrje bě wčera popołdnju w Radworju cyła wjes na nohomaj, jako na nawsy meju mjetachu. Do toho móžachu wopytowarjo kulturny program katolskeho dźěćaceho domu „Alojs Andricki“ dožiwić. Tón wopřiješe samo dwaj dźělej: Na małym jewišću prezentowachu chowancy spěwy a basnje. Kubłar Marko Njek jich na gitarje přewodźeše. Takrjec pódla pokazachu trochu wjetše dźěći, što běchu pola rejwanskeje wučerki Alexandry Wagner hižo wšitko nawuknyli. Rejwarka Serbskeho ludoweho ansambla z nimi prawidłownje zwučuje, štož bě za přichwatanych staršich, dźědow a wowki widźomne. Wo hudźbne wobrubjenje postarachu so tradicionalnje Wulkodubrawscy hercy.
Policija (08.05.17)
Awto do ćaha zrazyło
Załom. Z dotal njeznateje přičiny je 87lětny wodźer Opela wčera wječor w Załomju začinjenu zawěru a čerwjenu swěcu při železniskim přechodźe přewidźał. Awto suny so pod zawěru a zrazy do regionalneho ćaha. Při tym so rentnar ćežko zrani. 65 sobujěducych w ćahu wosta njezranjenych.
Rostliny a pokiwy sej wuměnjeli
Přijomne wjedro a nadźija, zo so tola hišće nalěćo předrěje a so snano njeznate rostliny hišće w zahrodce plahować hodźa, přiwabi wčera nahladnu ličbu zajimcow na rostlinsku bursu při Miłočanskej skale.
Miłoćicy (JK/SN). Hibićiwe towarstwo Kamjenjak bě organizowało bursu, zo móhli ći, kotřiž maja snano přewjele abo někajke cyle nowe rostliny, je dalšim zahrodkarjam poskićić abo na nowosće skedźbnić. A poskitkow bě tójšto. Nimo zeleninowych rostlinkow, wosebje tomatow a papriki, bě to tež wjele njeznatych abo hižo nic tak wužiwanych rostlin. Tak poskićeše Biskopičan Karl Pirk jako jedyn ze sobuorganizatorow pastyrnak (Pastinak) a kosćadło (Beinwell). K tomu dawaše wobšěrne pokiwy, kak hodźitej so plahować, a zajimawe recepty k přihotowanju słódnych jědźow z njeju.
Hišće ženje telko porow
Mejemjetanje w Kukowje kaž wulki wjesny swjedźeń było
Pančicy-Kukow (BW/SN). W njewšědnje dołhim rynku zaćahnychu mjeńše a wjetše dźěći kaž tež młodostni sobotu popołdnju na Kukowske swjedźenišćo k mejemjetanju. Pod nawodom Mechthild Hogoweje a Elisabeth Rjedźineje předstaji na spočatku 19 porow mjeńšich dźěći swoje reje, kotrež přewodźeštaj Marija Šołćina a Měrćin Weclich na akordeonje. Jim slědowaše wosom porow trochu wjetšich dźěći a skónčnje zarejwa dwanaće porow młodostnych wokoło meje. Wšitke holcy běchu w swjedźenskej narodnej drasće, štož je sobu zasłužba njeličomnych hotwańčow. Mjez mjeńšimi dźěćimi wudoby sej Samuel Paška česć mejskeho krala a wuzwoli sej Maru Wohlfahrtec za kralownu. Pola wjetšich dźěći doby Johannes Cyž napřemoběh, z jeho kralownu sta so Rejzka Zelnakec. Jako wulka meja skónčnje padny, bě Jan Clausen najspěšniši při wjeršku a wuzwoli sej Nelu Pjetašec za kralownu. Něchtóžkuli z wopytowarjow so dopominaše, zo bě před lětami na prěnich mejemjetanjach w Kukowje lědma dźesać porow.
Z keramiku dźěłać
Wulka Dubrawa. Spěchowanski kruh za serbsku ludowu kulturu je keramisku dźěłarničku přihotował. Krótkodobni zajimcy zetkaja so jutře, 6. meje, w 9.30 hodź. w něhdyšej Margarećinej hěće we Wulkej Dubrawje. Nawod změje Jadwiga Lešawic, tema su serbske baje. Kóždy zapłaći swójski přetrjebany material a přinjese sej něšto k jědźi sobu.
Swjeća na šulskim dworje
Worklecy. Zakładna a wyša šula „Michał Hórnik“ Worklecy přeprošatej tež lětsa zaso wšitkich wobydlerjow a hosći na swój tradicionalny dworowy swjedźeń. Wón wotměje so pjatk, 12. meje. Po zwučenym wašnju zahaja jón w 17.30 hodź. z mejemjetanjom. Holcy chcedźa zaso w serbskej narodnej drasće wokoło mejki rejwać. Slědujetej bjesada a zabawa, na kotrejž poruča jednotliwe rjadownje zaso najwšelakoriše kulinariske chłóšćenki a so na wopyt wjesela.
Žohnuja motorske
Ralbicy. Popołdnjo z požohnowanjom motorskich zahaji so njedźelu, 7. meje, w 14 hodź. z nyšporom w Ralbičanskej cyrkwi. Přizamknje so zhromadny wulět.
Rostliny sej wuměnjeć
W Sernjanach móža twarić
Gmejnscy radźićeljo kalkulaciju za alternatiwnu wariantu wobzamknyli
Róžant (JK/SN). K wólbam zwjazkoweho sejma 24. septembra w Smjerdźacej žadyn wólbny lokal njezměja. Dokelž bě minjene lěta stajnje wobćežne namakać zwólniwych pomocnikow, je so gmejnska rada Ralbicy-Róžant na swojim wčerawšim posedźenju dojednała, zo móhli Smjerdźečenjo w Róžeńće wolić, Łazkowčenjo pak w Ralbicach. Přiwšěm změje gmejna přeco hišće štyri wólbne lokale, telko kaž žana druha serbska.
Dróhu hakle srjedź meje zawru
Lejno (SN/MWj). Wulki dróho- a mostotwarski projekt na statnej dróze S 100 w Pančicach-Kukowje so dale dliji. Poprawom měješe dróha wot zašłeje póndźele dospołnje zawrjena być. Kaž Pančičansko-Kukowski wjesnjanosta Markus Kreuz (CDU) na wčerawšim posedźenju gmejnskeje rady w Lejnje zdźěli, maja so twarske dźěła nětko 15. meje zahajić. Zhonił bě wón tónle termin wčera na zeńdźenju z twarskimi zarjadami a zastupjerjemi firmy Strabag, kotraž ma twar zwoprawdźić. Wot srjedź meje tuž budźe S 100 dospołnje zawrjena.
Zo započnu projekt ze 14dnjowskim zapozdźenjom, zwisuje najskerje z wobchadoprawniskim wukazom nastupajo wobjězdku. Kaž bě ze słowow Markusa Kreuza wusłyšeć, ma so na wobjězdce hač do poslednjeho wokomika wjele zrjadować. Na njej dyrbja mjez druhim tuchwilny twarski staw dokumentować, zo móhli móžne škody pozdźišo zwěsćić.
Policija (05.05.17)
Z trikom pjenjezy kradnyłoj
Běła Woda. Wjacore sta eurow staj zawčerawšim njeznataj muž a žona 87lětnej w Běłej Wodźe z móšnje pokradnyłoj. Wonaj běštaj rentnarku prosyłoj jimaj pjenjezy zaměnić. W njekedźbliwym wokomiku sahny jedyn z njeju do móšnje staruški a wza z njeje pjenjezy.
Mjez ćěkancami lědma fachowcy
Mjez migrantami, kotřiž su w jobcenteru wokrjesa Budyšin registrowani, je lědma štó z dobrymi rjemjeslniskimi kmanosćemi. Najwjetši dźěl ani šulske ani powołanske wotzamknjenje nima.
Budyšin (CK/SN). W jobcenteru Budyskeho wokrjesa je tuchwilu 506 ludźi jako připóznaty ćěkanc registrowanych. Před pjeć lětami bě jich runje třinaće. Wšitcy pochadźeja z krajow zwonka Europy. Ze 403 ludźimi je najwjetši dźěl ze Syriskeje, 38 ćěkancow je z Iraka a 33 z Afghanistana. Dohromady wučinja ličba migrantow runje tři procenty wšitkich něhdźe 20 000 registrowanych přijimarjow Hartza IV. Tele ličby zdźěli šef jobcentera Mathias Bielich. Ryzy po ličbje njeje to dotal problem, móže pak so z tajkim stać, maš-li čłowjeka z cyłej jeho swójbu před sobu sedźo, wón praji.
