Policija (07.11.16)
Zražka při ampli
Pančicy-Kukow. Čerwjeneje ample dla dyrbješe wodźerka Rovera sobotu wječor před nadróžnym twarnišćom w Pančicach-Kukowje zastać. Jako ampla na zelene přeskoči, chcyše 33lětna dale jěć. W tym wokomiku přijědźe wotzady VW a spyta Rover hišće přesćahnyć, při čimž wobě awće do so zrazyštej. Wěcna škoda wučinja něhdźe 8 000 eurow.
Romantica z reju a improwizaciju
Wulkej nakupowanskej nocy Romantica w Budyšinje je sobotu wječor wjedro trochu klubu činiło. Přiwšěm mějachu wopytowarjo rjane dožiwjenje, a wikowarjo běchu tohorunja spokojom.
Budyšin (CS/SN). Dobru naladu we wobłuku nakupowanskeje nocy Romantica rozpřestrěwaše sobotu wječor na Budyskim Póstowym naměsće 1. serbska kulturna brigada. Po tym zo dyrbješe prěni tak mjenowany flashmob w 16.30 hodź. sylneho dešća dla wupadnyć, mějachu holcy a hólcy we 18 hodź. potom swój wulki wustup. Zdźěla w serbskej narodnej drasće předstajichu šulerjo znatu reju Šewca. Z njej spytachu publikum sobu zapřijeć. Tak so tež cityjowa managerka Gunhild Mimuß z předsydu Domowiny Dawidom Statnikom w rejwanju pospyta.
14. romantica pak skićeše hišće wjace serbskeho. SLA přeprosy wopytowarjow na zjawnu probu baletneje skupiny. Jan Cyž zahori připosłucharjow ze swojimi improwizacijemi k němemu filmej „Cuzy ptak“ z Astu Nielsen. Njewobstajneho wjedra dla přepołožichu šminkowanje dźěći do foyera Serbskeho domu.
Mjezynarodne rańše piwko je kóžde lěto wosebity zazběh do ...
Krótkopowěsće (07.11.16)
Awtodróha bórze hotowa
Praha. Z awtom spěšnje na hodowne wiki do Prahi? Tole móhli sej lětsa hižo zwoprawdźić. Jeli so „ničo njepředwidźomne njestanje“, budźe dróha 17. decembra dotwarjena. Tole zdźěli čěski wobchadny minister Dan Ťok dźensa w Praze. Prěnich hosći na přepodaće poslednjeho dźěla je „kedźbliwje“ hižo přeprosył. Awtodróhu twarja mjeztym 25 lět.
Paducha w cyrkwi lepili
Drježdźany. Policija je dźensa rano w Drježdźanskej Cyrkwi našeje knjenje paducha zajała. Muž z Madźarskeje bě na wuhladnu platformu ćeknył a so tam za sćežorom chował, jako zastojnicy jeho zajachu. W ruce měješe měšk pjenjez. W cyrkwi bě 26lětny prawdźepodobnje tři jałmožnicy wurubił. Swědk bě policiju informował, zo je so něchtó přez wokno do cyrkwje zadobył.
Z ćahom přećiwo drogam
Podpěru města klětu najradšo dale wjesć
Choćebuz (SN/at). Namjet, kotryž bě Choćebuski wyši měšćanosta Holger Kelch (CDU) zrodźił a zastupjerjam serbskich institucijow při swojej poslednjej rozmołwje z nimi rozłožił, je z blida: Zarjadnišći Šula za delnjoserbsku rěč a kulturu kaž tež Serbski muzej w Choćebuzu njezmějetej přichod pod třěchu móžneje załožby. To je pruwowanje w měšćanskim zarjadnistwje wunjesło. „Wšitko wostanje potajkim při starym, wobě instituciji matej samostatnje dale dźěłać“, zdźěli na naprašowanje našeho wječornika Karin Tšukowa, regionalna rěčnica Domowiny za město Choćebuz, po wčerawšim zetkanju Kelcha ze Serbami w tamnišim Serbskim domje.
1,3 miliony eurow za móst
Krótkopowěsće (04.11.16)
Za myto namjetowanaj
Budyšin. Serbski rozhłosownik Roman Nuk a jeho čěski kolega Petr Kumpfa staj za swoje wusyłanje „Mensch, Nachbar“ sćelaka MDR1/Radio Sakska za Němsko-čěske žurnalistiske myto 2016 namjetowanaj. Z nimale sto zapodatych přinoškow bě Němsko-čěska jury po třoch kandidatach z wobeju krajow nominowała. Dobyćerjow počesća kónc januara w Praze.
Hosćo z Wrócławja we Łužicy
Slepo. Zastupjerjo ewangelskeje cyrkwje Wrócławskeje diecezy zetkachu so wčera ze zastupjerjemi ewangelskeje cyrkwje Berlin-Braniborska-šleska Hornja Łužica w Slepom. Mjez nimi běštaj tež biskop Waldemar Pytel z Wrócławja a generalny superintendent Martin Herche. Hosćo zhonichu tež wo połoženju Serbow we Łužicy. Wosadna fararka Jadwiga Malinkowa swjećeše z nimi trojorěčnu serbsko-pólsko-němsku nutrnosć.
Hotuja so na demonstraciju
Policija (04.11.16)
Swěcu kontrolowali
Budyšin. Při něhdźe 1 300 jězdźidłach je policija w oktobru w Budyskim a Zhorjelskim wokrjesu kontrolowała, hač je z jich swěcowej připrawu wšo w porjadku. W kóždym wosmym padźe zwěsćichu zastojnicy njedostatki. 144 wodźerjow dyrbi swoje awto porjedźeć dać a znowa předstajić. Runje w ćmowym počasu policija radźi časćišo hladać, hač je swěca awta w porjadku.
Zwony zwonja k jubilejej
Před 200 lětami su Poršisku cyrkej po- swjećili. Dźakowano angažowanemu zwonowemu spěchowanskemu towarstwu maja tam nětko nowe zwony. Tole njedźelu hódnje woswjeća.
Poršicy (CK/SN). K jubilejnej kermuši w Poršicach wotměje so w tamnišej cyrkwi zajutřišim w 17 hodź. swjedźenski koncert Budyskeje wokrjesneje hudźbneje šule, a Jan Malink porěči wo 200lětnych wotměnjatych stawiznach Božeho domu. W nim su w běhu časa tež serbscy fararjo skutkowali. Wołtarny rub ma serbski napis. Kóždej dwaj měsacaj swjeća w ewangelskej wosadźe Poršicy-Budyšink serbske Bože słužby.
Na koncert a přednošk witaja wopytowarjow nowe zwony, připowědźi předsyda zwonoweho spěchowanskeho towarstwa Joachim Hantuš. „Samozrozumliwe to njeje. Ze spočatnje štyrjoch zwonow w lětach 1814 do 1816 natwarjeneho Božeho domu zwosta jenički mjedźany. Tamne su za čas swětoweju wójnow zeškrěli. Město toho powěsnychu 1949 železne zwony na wěžu. Te pak běchu swojeho materiala dla chětro dodźeržane. „Ze zwonami a zwóńcu dyrbješe so nuznje něšto stać“, Joachim Hantuš powěda.
Do hornčernje pohladnyć
Bóšicy. Lubowarjo keramiki njeměli skomdźić sej do Bóščanskeje Barchmannec hornčernje dojěć, hdźež změja jutře a njedźelu stajnje wot 9 do 17 hodź. dźeń wotewrjenych duri. Tam móžeš sej wobhladać, kak z jednoreje hliny taler abo šalka nastawa, dźěći móža hornčerić a jedyn kruch sami pomolować. Nimo toho čaka na wopytowarjow we wobchodźe wobšěrny sortiment, tež hodowna keramika.
Dalše nazymske koncerty
Rogow/Worklecy/Budyšin. Skupina Přezpólni wuhotuje jutře, sobotu, w 19 hodź. nazymski koncert w Rogowje. Smjerdźečanska rejwanska skupina a folklorna skupina Sprjewjan chcetej ludźi njedźelu, 6. nowembra, we Worklečanskim hosćencu zawjeselić. Wot 14.30 hodź. poskića tam kofej a tykanc, program započnje so w 15.30 hodź. Samsnej cyłkaj wuhotujetej nazymski koncert sobotu, 12. nowembra, w 16.30 hodź. w Budyskim Serbskim domje. Za čłonow Budyskich Domowinskich skupin zapłaća zastup ze skupinskich pokładnjow.
Literatura a bjesada
Drjenow. Na literarnu kermušu přeprošuje Ludowe nakładnistwo Domowina njedźelu, 13. nowembra, w 15 hodź. do hosćenca „Hońtwjerski dwór“ w Drjenowje.
