Za njecyły tydźeń poćehnje po Kulowje róžowopóndźelny ćah. To ...
Ličba na gripu schorjenych stupa
Po wčerawšim stawje registruja w Budyskim wokrjesu 278 padow gripy. Tydźeń do toho bě jich 143 a w štwórtym kalendrowym tydźenju lěta 76.
Budyšin (SN/mwe) Kaž dr. Ilona Walter, wjednica Budyskeho strowotniskeho zarjada, pisa, njejsu mjenowane ličby přizjewjenja domjacych lěkarjow, ale z labora. Štóž chce strašnu gripu-influencu wotwobarać, měł so tež nětko hišće šćěpić dać. Wšako njeje wirusowa gripa jednore nazymnjenje, ale chutne schorjenje. Wosebje chronisce chori, nad 60lětni a samodruhe dyrbja so šćěpić dać. Maja pak na kóždy pad wobkedźbować, zo šćěpjenski škit hakle po něhdźe dwěmaj tydźenjomaj skutkuje.
Krótkopowěsće (06.02.18)
Zakituje třělenje wjelkow
Düsseldorf. Naprawy móžneje noweje wulkeje koalicije k třělenju wjelkow městopředsydka CDU Julia Klöckner dźensa w nowinje Rheinische Post zakituje. „We wobchadźenju z wjelkom ma wěstota ludźi najwyšu prioritu. Chcemy, zo so wjelki, kotrež su płoty pastwow přeskočili a ludźom strach načinjeja, wurisaja.“ Wona měni, zo maja so tajke zwěrjata morić.
Zwisk do Zieloneje Góry steji
Zhorjelc. Zielona Góra je dalše město w Pólskej, kotrež móžeš wot minjeneje soboty ze Zhorjelca z ćahom docpěć. Direktny zwisk „Polregio“ wobsteji wšědnje trójce w 9.07, 11.07 a 17.07 hodź. do Zieloneje Góry a wottam w 7.41, 13.44 a 15.45 hodź. Jězba traje něhdźe dwě a poł hodźiny. Předewzaće Länderbahn je nowy zwisk z partnerom Przewozy Regionalne dojednało.
Chcedźa komunikaciju polěpšić
Zhromadnje štomiki palili
Chrósćicy (aha/SN). Mjeztym wosmy raz su wčera, njedźelu, w Chrósćicach zhromadnje božodźěsćowe štomy palili. Zamołwitosć za přiwabliwy podawk bě znowa přewzała z dwaceći kameradow wobstejaca wjesna wohnjowa wobora pod nawodom Swena Młynka.
W Chrósćicach je nimale 150 domjacnosćow, a něhdźe třećina z nich je swój štomik za spalenje přewostajiła. K tomu přińdźe hišće wulki wěnc, z kotrymž so wjesne towarstwo Domizna w hodownym času wo wotpowědny flair wosrjedź wsy staraše. Měrćin Jakšt, mjeztym sydom lět nawoda Chróšćanskich gmejnskich woborow, ke kotrymž nimo Chróšćanskeje tež Nukničanska a Hórčanska słušatej, hódnoćeše, zo je termin do dźěłoweje protyčki wobory zapisany, a chwaleše sej disciplinowanu angažowanosć kameradow, zo tež dalše trěbne dźěła přihotuja a zaručeja.
Zeleni přeprošeja
Kamjenc. Přichodne stajne blido Zelenych je jutře, wutoru, w 19 hodź. w Kamjenskim hosćencu „La Piazza“ na Zwingerowej 4. Jako hosća witaja rěčnicu krajneho předsydstwa Zwjazka 90/Zelenych Christin Melcher. Wona a předsydstwo regionalneje skupiny wjeselitej so na zajimawe rozmołwy.
Porodowu staciju zeznać
Kamjenc. Zajutřišim, 7. februara, w 19 hodź. su přichodni starši na informaciski wječork do Kamjenskeje chorownje maltezow přeprošeni. Na porodowej staciji Margareta budu nazhonite baby a sotry na prašenja samodruhich a jich mandźelskich wotmołwjejać. Přizjewjenje za to trěbne njeje.
Zetkaja so w stolicy
Berlin. Přichodne Serbske blido w Berlinje budźe štwórtk, 8. februara, w 16 hodź. w hosćencu EINSTEIN KAFFEE na Friedrichowej 206. Štóž ma lóšt a chwile, so na měsačnych zetkanjach wobdźěleć, zo by maćeršćinu w cuzbje hajił, je stajnje lubje witany. Za Serbskim blidom w Berlinje maja zajimcy dobru składnosć, swoje rěčne kmanosće nałožować a skrućeć. Wjelelětni wobdźělnicy su na nowych ludźi a jich ideje wćipni.
Jejka debić wuknyć
Krabat w žiwjenju dźěći prezentny
Stróža (CS/SN). Wustajeńca z twórbami, nastatymi we wobłuku wubědźowanja „Krabat 2.0“ je wot minjeneho pjatka w Stróžanskim Domje tysac hatow widźeć. Kaž tam na wotewrjenju rjeknychu, bě Krabat poprawom tež ćěkanc, wšako pochadźeše Johann Schadowitz z Chorwatskeje a dósta so hač na sakski kralowski dwór. W lěće 2016 su serbskich a němskich młodostnych kaž tež młodych ćěkancow namołwjeli so z Krabatom wuměłsce rozestajeć a so prašeć, što wón w dźensnišim času wozna- mjenja.
Tak mjenowany projekt „Urban art“ přewjedźechu Domowina, Budyski Kamjentny dom a Debrikečanski dom za młodych ćěkancow zhromadnje. Serbscy, němscy, syriscy, afghaniscy a čěscy młodostni zapodachu dohromady 120 wuměłskich dźěłow. Nimo rysowankow běchu tež kolaže a grafitije zastupjene. W rozdźělnych zestawach pokazachu je w Serbskim domje, Serbskim muzeju a Kamjentnym domje. Štwórta a poslednja wustajeńca k mjenowamu projektej je nětko w Domje tysac hatow widźeć. Nastała je wona z płódneho zhromadneho dźěła, kotrež Domowinu a zarjadnistwo biosferoweho rezerwata Hornjołužiska hola a haty zwjazuje.
Policija (05.02.18)
Zastojnikow křiwdźił
Wojerecy. Natutkany młodostny je sobotu wječor we Wojerecach policistam pismiki „A.C.A.B.“ přiwołał. Wone steja za jendźelsku parolu „All cops are bastards“ („Wšitcy policisća su bastardy“). 16lětny bě w zašłosći hižo wjacore razy policistam napadnył, tak zo wzachu jeho sobu na rewěr. Tam naměrichu pola młodostneho 0,6 promilow alkohola w kreji a přepodachu jeho staršimaj. Wonaj drje z nim chutne słowčko porěčitaj.
„Całtowy knefl“ dwělomny
Budyska přirada za měšćanske wuwiće njewidźi potrjebu
Budyšin (CK/SN). Chětře pola pjekarja abo w lěkarni něšto wobstarać, bjez toho zo dyrbiš za parkowanje awta płaćić – to by so mnohim kupcam w nutřkownych městach lubiło. Po namjeće frakcijow CDU a FDP Budyskeje měšćanskeje rady bychu so klětu w sprjewinym měsće někotre parkowanske awtomaty z móžnosću k bjezpłatnemu krótkodobnemu parkowanju wuhotować hodźeli. Měšćanska rada chce nalěto w tej naležnosći rozsudźić. Hižo nětko pak so Budyska přirada za měšćanske wuwiće z „całtowym kneflom“ zaběra.
Za zarjadnistwo je wěc jasna: „Nimamy problem přemało parkowanskich městnow, ale wone njejsu tam, hdźež bychu je ludźo rady měli“, rozprawja wotrjadnik porjadniskeho zarjada Matthias Almert. Tohodla je parkowanje w starym měsće drohe, ale w zdalenych parkowanskich domach wjele tuńše. Wšitke městna pak wućežene njejsu. W nutřkownym měsće so přerěznje 76 mjeńšin parkuje.
Róčnicu martrarskeje smjerće hódnje wopominali
Radwor (SN/MkWj). Z wulkej swjedźenskej Božej mšu su katolscy wěriwi sobotu w Radworju 75. róčnicu martrarskeje smjerće zbóžnoprajeneho kapłana Alojsa Andrickeho wopominali. K tomu móžachu w kopaće pjelnjenej wosadnej cyrkwi biskopa Drježdźansko-Mišnjanskeje diecezy Heinricha Timmereversa witać, kotrehož běchu křižerjo z Chelna do Radworja přewodźeli. Mjez hosćimi běchu tež wěriwi Zhorjelskeho biskopstwa, kolpingowcy, pólscy skawća a šulerjo zakładneje šule z delnjošleskeho městačka Rząsiny. Kubłanišćo je pomjenowane po Alojsu Andrickim, kotrehož běchu nacionalsocialisća 3. februara 1943 w koncentraciskim lěhwje Dachau ze smjertnej sykawu morili.
Krótkopowěsće (05.02.18)
Wjace filmow na festiwalu
Zhorjelc. Za lětuši 15. nysowy filmowy festiwal, kotryž wotměje so mjezu překročacy wot 15. do 20. meje w třikrajowym róžku, su wjace hač 600 přinoškow – něhdźe 60 wjace hač loni – zapodali. Wosebity fokus leži na paskach z Pólskeje, kotrež njejsu tam kritiskeho wobsaha dla zjawnje spěchowali.
Urban nowy šef sakskeje AfD
Wojerecy. Nowy krajny předsyda sakskeje AfD je Jörg Urban, zdobom předsyda frakcije strony w Sakskim krajnym sejmje. Delegaća kónctydźenskeho zjězda we Wojerecach su jeho do zastojnstwa wuzwolili, po tym zo bě dotalna předsydka Frauke Petry loni w septembru ze strony wustupiła. Urban chcył, zo stanje so AfD při wólbach krajneho sejma 2019 z najsylnišej politiskej mocu kraja.
Angažement za přirodowědu
