Psy słušeja za powjaz
Město Wojerecy ma nowy policajski porjad z jasnymi rjadowanjemi
Wojerecy (AK/SN). Zanjerodźenja chce město Wojerecy přichodnje konsekwentnišo chłostać. „Kołowokoło kontejnerow za škleńcu a papjeru mamy stajnje zaso problemy z čistotu. Dotal smědźachu ludźo tam swoje wěcy wot 6 do 20 hodź. wotbyć, nětko je to wotydźenja wot 7 do 19 hodź. dowolene. Hač to mjenje hary wuskutkuje, dyrbimy wočaknyć“, podšmórny zamołwity za porjad a wěstotu w měsće Götz Gleiche, jako su tele dny nowy policajski porjad rozłožili. Tón płaći hižo wot 19. meje. Po dźesać lětach dyrbjachu dotalny předźěłać.
Nowy policajski porjad je z Budyskim wokrjesom runje tak wothłosowany kaž z pjeć měšćanskimi dźělemi. „Někotre wobstejnosće smy nowe přiwzali, někotre pak smy bjez narunanja šmórnyli“, Götz Gleiche rjekny. Tak njeje do porjada hižo zapisane, hač a hdźe směš swoje awto myć, zo je zakazane ničeje kóčki picować a zo maja wobydlerjo swoje strašne zwěrjata přizjewić. „W tymle dypku mějachmy minjene dźesać lět jeničke naprašowanje. To rjaduje nětko wokrjes“, tak Gleiche.
Skónčnje dosć ćišća w syći
Róžant (JK/SN). Dlěje hač dźesać lět su domjacnosće při Róžeńčanskej Putniskej šćežce na nowy wodowód a z nim zwjazany čujomny wyši ćišć w syći čakali. Prěni raz wuradźowali běchu wo tym, ponowić wodowód k zastaranju domjacnosćow na Putniskej šćežce, hižo w lěće 2005. Na wonym posedźenju z wobydlerjemi tehdyši jednaćel Kamjenskeho zastaranskeho zawoda EWAG přilubi, ručež móžno, wodowód k zastaranju domjacnosćow na mjenowanym puću ponowić. Tamniše domjacnosće su hišće přizamknjene dźělej něhdyšeje wjesneje syće.
Wobydlerjo dóstawaja drje kaž wšitcy druzy Róžeńčenjo swoju wodu z Kamjenca, ale přez železnu rołu, kotraž je po lětach zezerzawjena a jara mało wody přepušća. Domjacnosće mějachu zdźěla tak mało wody, zo njemóžachu so ani w samsnym času kupać abo dušować. Tež płokawy a wopłokowanske mašiny dyrbjachu wěstoty dla w nocy běžeć. Kónc lěta 2015 mějachu wobydlerjo samo dwójce krótko za sobu cyły dźeń bjez wody wutrać, dokelž bě so roła puknyła.
Na Boršći lětsa wjacore změny
Kamjenscy młodostni su po wšěm zdaću sylnišo z Boršću zwjazani, hač sej to čłowjek mysli. Tohodla so lětsa samo z tradicionalnymi prawidłami na swjedźenju rozžohnuja.
Kamjenc (UM/SN). Njech nichtó njepraji, zo so młodostni jeno za swój handy zajimuja. W Kamjencu dyrbja njewočakowaneho angažementa młodych ludźi dla stare tradicije we wobłuku Boršće, kotraž wotměje so wot 18. do 24. awgusta, změnić. „Poprawom so wobdźělenje šulerjow na přećahomaj z 8. lětnikom skónči“, rozłožuje předsyda spěchowanskeho towarstwa swjedźenja Volker Schmidt. W tej starobje maja woni wosebity priwileg a njesu chorhoje, kotrež jednotliwe lětniki dźěla. To pochadźa z časa, w kotrychž bě šulski čas po wosom lětach nimo. Tónraz budźe tomu hinak. „Mnozy šulerjo 9., 10. a 11. lětnika sej přejachu znowa sobu činić směć. Tohodla woni lětsa chorhoje ponjesu, 8. lětnik so w ćahomaj bóle zady sobu zarjaduje. Dohromady liči Volker Schmidt z něhdźe 1 400 šulerjemi, kotřiž so na ćahomaj wobdźěla.
Něhdźe 100 000 eurow nałožuje Worklečanska gmejna tuchwilu za ...
Předań lětanišća schwalena
Chinski inwestor chce w Rózborku elektroawta produkować
Zhorjelc (UM/SN). Rózborske lětanišćo bórze předaja. To je Zhorjelski wokrjesny sejmik na swojim minjenym posedźenju schwalił. Nowy wobsedźer budźe předewzaće Delon Automotive tzwr, wotnožka chinskeho koncerna Bejing WKW Automotive, kotrež chce na ležownosći awtomobilowu twornju natwarić. Zjawna debata wo tym žana njebě. Ze swojim rozsudom sćěhowaše wokrjesny sejmik poručenje zaměroweho zwjazka lětanišćo, kotryž ležownosć wobhospodarja.
Prěni twarski wotrězk wopřijima dotalne jako lětanišćo wužiwane ležownosće. Něhdźe 162 hektarow wulki areal su na připowěsnjenej karće jako „hnydom wužiwajomny“ deklarowali, dokelž wobsedźi jón zaměrowy zwjazk. Druhi twarski wotrězk wobsteji z „rozšěrjenych płonin“, kotrež su tohorunja we wobsydstwje zwjazka. Třeći twarski wotrězk su přenajate a ze solarnymi modulemi wobtwarjene ležownosće. Cyłkownje jedna so wo 365 hektarow.
Jako wukubłarnja dorosta mjez najlěpšimi Němskeje (2)
Konjacy sportowy centrum Lipowa wyšina w Hornjej Boršći na kromje Budyšina pyta w Hornjej Łužicy po wšěm zdaću swojeho runjeća. 17 hektarow wulki areal ze swětłej jěchanskej halu a městnom za 75 koni wobsteji hakle wot lěta 2002 a słuša dźensa k najlěpšim jěchanskim centrumam Němskeje. To ma Andreas Busch, kiž hromadźe ze swojim bratrom Ralfom zawod nawjeduje, čorne na běłym. Hromadźe z dźewjeć dalšimi jěchanskimi připrawami doby Lipowa wyšina loni dorostowe wubědźowanje, na kotrymž bě so nimale 300 jěchanskich dworow wobdźěliło.
Krótkopowěsće (05.07.17)
Kardinal Meisner njeboh
Köln. Kardinal Joachim Meisner je njeboh. Bywši Kölnski arcybiskop je dźensa rano na dowolu w Bad Füssingenje 83lětny zemrěł, kaž rěčnik arcybiskopstwa w Kölnje informuje. We Wrócławju rodźeny Meisner steješe 25 lět, wot 1989 hač do 2014, na čole najwjetšeho biskopstwa Němskeje. 1985 je wón Ralbičanskich křižerjow w Kulowje witał.
Dźesaćo hišće w chorowni
Drježdźany/Münchberg. Po ćežkim busowym njezbožu z 18 mortwymi na awtodróze A 9 w hornjej Frankskej je hišće dźesać zranjenych ze Sakskeje w chorowni. Dotal móžachu 16 zranjenych pušćić, socialne ministerstwo w Drježdźanach zdźěla. Inferno bě 26 ludźi ze Sakskeje a Braniborskeje přežiwiło.
Uma Thurman w Čěskej
Karlovy Vary. Nětčiši 52. lětnik Mjezynarodneho filmoweho festiwala w Karlovych Varach móže so z wopytom wjacorych wusahowacych dźiwadźelnikow a filmowych wuměłcow hordźić. Jako wulkeho „stara“ su lětsa organizatorojo swětoznatu amerisku hrajerku Umu Thurman přeprosyli. Na swjedźenskim programje w Karlovych Varach přija wona Myto prezidenta festiwala.
Sagan wostanje wuzamknjeny
Mjez Serbami a Němcami připóznaty był
Něhdyšeho Wojerowskeho wyšeho měšćanostu Horsta-Dietera Brähmiga su wčera we Wojerecach pochowali. Do toho mějachu přiwuzni, bywši kolegojo a přećeljo składnosć, so z nim rozžohnować. Brähmig bě 27. junija po dołhej ćežkej chorosći 78lětny zemrěł.
Horst-Dieter Brähmig narodźi so 23. oktobra 1938 we Wojerecach. Šulu wuchodźiwši da so wón w chorowni města na lěkarsko-techniskeho asistenta wukubłać. Wot lěta 1969 skutkowaše we wšelakich zastojnstwach strowotnistwa a energijownistwa we Wojerowskej radnicy. Po lěće 1990 přewza nawodnistwo w přemysłowym a wobchadnym zarjadnistwje. Runočasnje bě wón frakciski předsyda PDS we Wojerowskej měšćanskej radźe.
1994 wuzwolichu wobydlerjo města Brähmiga za měšćanostu, prěnjeho zastupjerja Lěwicy scyła. Zastojnstwo měšćanosty, pozdźišo wyšeho měšćanosty, wukonješe hač do wotchada na wuměnk w lěće 2006. Za čas jeho zastojnstwa dožiwichu Wojerecy tak wažnej podawkaj kaž bjezwokrjesnosć 1996 a Dźeń Saksow 1998.
Krótkopowěsće (04.07.17)
Mólby Lohsy wupožčili
Budyšin. Muzej Budyšin je ze swójskeje wustajency nimale wšitke twórby molerja Carla Lohsy (1895–1965) Hamburgskemu Ernsta Barlachowemu domej za wosebitu přehladku wupožčił. Galeriju mólbow w Budyskim muzeju su tohodla přetworili, kaž wottam rěka. Na městnje mólbow Lohsy wisaja nětko wobrazy Horsta Bachmanna (1927–2007).
Dalše miliony přepokazane
Drježdźany. Sakska dyrbi za swoju bywšu krajnu banku dalše pjenjezy nałožić. W druhim kwartalu lěta je swobodny stat ze swojeho garantijoweho fondsa 18,6 milionow eurow Badensko-württembergskej krajnej bance jako nowej wobsedźerce přepokazał, zdźěla financne ministerstwo. Krajnu banku běchu 2007 předali, rukujo z 2,75 miliardami eurow za rizika.
Wopominaja wopory komunizma
Praha. Na fasadach štyrjoch domow čěskeje stolicy připrawichu njedawno wopominanske taflički. Na nich steja mjena kaž tež wosobinske daty za čas komunizma wotprawjenych wosobow. „Na kopolaki“ podobny dopomnjenski projekt „Poslednja adresa“, załoženy přez organizaciju Memorial w Ruskej, so tak tež w Čěskej republice rozšěrja.
3 504 kilometry z kolesom w 21 dnjach po puću
Na wulku Tour de France nastajichu so minjenu sobotu štyrjo přećeljo z Kulowa a wokoliny. Runje tak kaž profije so woni hač do 23. julija w Francoskej a susodnych krajach na tele sportowe wužadanje podali.
Kulow (bl/SN). Swój trochu njewšědny dyrdomdej mjenuja „le charity tour de france 2017“. Z pomocu darićelow wokoło Kulowa nazběrachu hižo 3 135 eurow. Tele a nadźijomnje dalše pjenjezy přewostaja woni potom pomocnemu skutkej „On the move“, kotryž w Keniji najwšelakoriše organizacije spěchuje a projekty zwoprawdźa. Z nimi wobydlerjow wo psychiskich chorosćach informuja a tak akceptancu tworja. Mjez druhim chcedźa tam porjedźernju kolesow, wukubłanišćo a biblioteku natwarić.
