Policija (19.07.16)
Tragika na čarje
Mjez Šěrachowom a Korzymjom je wčera popołdnju ćah Trilex 67lětneho muža sobu hrabnył, kiž bě njejapcy na kolije běžał, jako so ćah bližeše. Najebać hnydomne borzdźenje njezamó wodźer njezbožu zadźěwać. Ćah muža něhdźe 50 metrow sobu wlečeše. 67lětny zražku njepřežiwi. Pasažěrojo a wodźer ćaha wostachu njezranjeni. Jednočarowy wotrězk wostanje nachwilnje zawrjeny. Kriminalna policija pad nětko přepytuje.
Wotstawk njedodźerželi
Na awtodróze A4 njedaloko Połčničanskeje wotbóčki je wčera popołdnju k zražce třoch nakładnych awtow dóšło. Šofer Volva njedźiwaše na Iveco, kotryž před nim jědźeše, a zrazy do njeho. Dalši šofer situaciju njespózna a prasny na to ze swojim Iveco do znjezboženeju awtow. Cyłkowna škoda na jězdźidłach wučinja něhdźe 19 000 eurow.
Přizamkuja wopłóčkowu syć
Wustajeńcu klankow rozšěriła
W Nowym Měsće nad Sprjewju wustaja Nicole Peto klanki k najwšelakorišim bajkam a podawkam. Zdźěla z techniku wuhotowane skutkuja wone do scenow zestajane jara žiwe.
Kubłanišćo po Bjarnatu Krawcu pomjenowane było
Hakle 1770 zawjedźechu w Hornjej Łužicy powšitkownu šulsku winowatosć. Hižo do toho pak mějachu w Rakecach wučerja, kiž bě runočasnje jako organist cyrkwje přistajeny. Ryćerkublerjo wšak njewidźachu žanu trěbnosć, zo swojim poddanam šulske kubłanje zmóžnja. W lěće 1840 bě hišće tak, zo njemóžeše wulki dźěl wobydlerjow Rakec a wokoliny swoje mjeno pisać. Wo tym swědči dokument, na kotrymž běchu po zběhnjenju roboćanstwa mnozy jeničce z třomi křižikami podpisali.
Štomy zdźěla chore byli
Korjenje lipow špatny staw dróhi a hněw dźěłaćerjow zawinowali
Sernjany/Róžant (jh/JK/SN). Krajnoradny zarjad Budyšin je minjenej pjatk a sobotu při ponowjenju dróhi wšitke lipy pola Sernjan podrězać dał a nimo toho postajił, zo maja tam po zakónčenju twarskich dźěłow 24 nowych štomow sadźić. Njedosahaca wěstota korjenjow je k tomu wjedła, zo dyrbjachu lipy pušćeć. Wjacore wjetše korjenje dyrbjachu w zašłych tydźenjach při twarskich dźěłach wotstronić, zo bychu nowe wodowody pod pućom dosć městna měli. Při podrězanju štomow twarscy dźěłaćerjo Wehnertec firmy z Hórkow zwěsćichu, zo bě to prawy rozsud krajnoradneho zarjada. Někotre lipy woprawdźe hižo wěsće w zemi njestejachu. Nimo toho spóznachu wodźerjo motorskich piłow hakle při podrězanju, zo běchu někotre štomy tež hižo dudławe. „Podrězanje bě trěbne. Za wotběh našich twarskich dźěłow pak tale akcija runjewon spomóžna njebě. Dźěłamy tu hižo wjacore tydźenje. Lipy běchu nam při twarskich dźěłach stajnje zadźěwki. Nětko hižo nic ...“, měnješe jedyn z twarskich dźěłaćerjow.
Krótkopowěsće (18.07.16)
Teslu do Kamjenca wabić
Palo Alto/Kamjenc. Sakska chce Teslu wabić, w Kamjencu zawod baterijowych bańkow twarić. Dokelž chce ameriski twarc elektroawtow w Europje inwestować, bě jemu sakski statny sekretar Hartmut Mangold při rozmołwach w Kaliforniskej Kamjenc namjetował, rozprawja MDR. Zasydlenje móhła Sakska z hač do 15 procentami spěchować. Tesla zhotowja jako jenički zawod e-awta z dosahom (Reichweite) wjac hač 400 kilometrow.
Literarne myto Drježdźanjance
Drježdźany. Sakske literarne myto 2016 dóstanje Drježdźanska spisowaćelka Franziska Gerstenberg. 5 500 eurow hódne myto spožča 37lětnej za socialnokritisku twórbu „Tak dołho po tym – dawno hižo njewěrne“. To zdźěla ministerstwo za wuměłstwo w Drježdźanach. Gerstenberg běchu hižo wospjet wuznamjenili, mjez druhim lěta 2013 ze Lessingowym spěchowanskim mytom.
18 awtow wobškodźenych
Z fachowym nawodom po škitanej krajinje
Brětnja/Michałki (HH/SN). „Na pućowanja do přirody, bjezposrědnje před domjacymi durjemi so zrědka abo scyła njenastajam. Jeli pak nazhonity fachowc tajke wuprawy nawjeduje, nazhoniš wjele zajimaweho“, praji Heidrun Biesold ze Sepic. Podobnje mysleše 30 dalšich lubowarjow přirody, jako so njedźelu rano zhromadnje z Hagenom Rothmannom, nawodu Kulowskeje městneje skupiny němskeho přirodoškitneho zwjazka (NABU) na puć po Dubrjenskim bahnu nastajichu. Při rjanym wjedrje pućowachu po 1 700 hektarow wulkej, třećej najwjetšej přirodoškitnej płoninje Sakskeje. Za dowolowy a prózdninski čas poskića Kulowska skupina NABU organizowane pućowanja po Dubrjenskim bahnu. Na 4,5 kilometrow dołhej čarje po přirodoškitnej krajinje dóstachu wobdźělnicy pola Michałkow z wuhladneje wěže přehlad wo bahnu. Dale dźěše podłu łučinow hač k hatam pola Klóšterskeje Noweje Wsy. Po puću rozłoži Hagen Rothmann wobdźělnikam zajimawostki wo nastaću a tuchwilnym stawje škitneho pasma.
Mnohe dróhi ponowjeja
Budyšin (SN). Na mnohich wotrězkach dróhow we wokrjesu tučasnje twarja. Kaž krajny zarjad za dróhotwar a wobchad (LASuV) w Budyšinje zdźěli, wužiwaja přijomne lětnje wjedro za naprawy, zo bychu jězdnje wobnowjeli a wuporjedźeli. Tak ponowjeja tuchwilu dróhu z Noweje Jaseńcy do Bóšic. Twarske naprawy na wjesnymaj pućomaj w Rakojdach a Minakale zahaja w awgusće. Nimo zakła- dneho wuporjedźenja jězdnje składu tam wokrjesne zawody nowy wodowód. Zaměrowy zwjazk za wopłóčki Mała Sprjewja přizamknje w tym zwisku ležownosće zjawnej wopłóčkowej syći. Energijowe předewzaće ENSO wuměni milinowody. Tež Telekom wužiwa składnosć dróhotwara, zo by na městnje kładła roły za instalaciju kablow k lěpšemu zastaranju z internetom.
W Biskopicach započnu w awgusće wo- krjesnu dróhu K 7260 twarić, a to jako podlěšenje Drebnitzčanskeho puća. Tam nastanje z nowej jězdnju tež nowy chódnik.
Policija (18.07.16)
Z kolesom do latarnje a do sćěny
W nocy na njedźelu jědźeše kolesowar po Židowskej w Budyšinje. Njemějo pak hižo kontrolu nad kołom zrazy do latarnje a na to do sćěny. Při tym so zrani, zo dyrbjachu jeho do Budyskeje chorownje dowjezć. Tam postajichu, zo ma so krej 42lětneho na móžny podźěl alkohola přepytować. Wotběh njezboža je wobchadonjezbožowa słužba přepytowała.
Motorske pokradnyli
Njeznaći zadobychu so w Biskopicach do zamknjeneje garaže a pokradnychu motorske w hódnoće 2 400 eurow. W garaži wotstajenu sněhowu frezu a kófr z gratom paduši tohorunja sobu wzachu. Nimo toho načinichu škodu 800 eurow.
Rebelojo so njepodadźa
Towarstwo žada sej jasnosć k wotběhej saněrowanskich dźěłow
Wulke Ždźary (AK/SN). Wot lěta 2013 aktiwne towarstwo Rebelojo Hórnikečanskeho jězora žada sej jasny a zawjazowacy wotběh saněrowanskich naprawow jamy wot Łužiskeje a srjedźoněmskeje towaršnosće hórnistwoweho zarjadnistwa (LMBV). „Zo ma jězor wosom lět kompletnje zawrjeny wostać, njemóžemy akceptować“, podšmórny předsyda Werner Petrick sobotu na sobustawskej zhromadźiznje we Wulkich Ždźarach.
Před wosom tydźenjemi zapoda towarstwo Sakskemu wyšemu hórniskemu zarjadej Freiberg próstwu, wotewrěć kupanski přibrjóh we Wulkich Ždźarach. Znajmjeńša za kupanskej sezonje 2016 a 2017 měł wotrězk přistupny być. „W tym času tam žane zhusćenja njepřewjeduja“, Werner Petrick wuwjedźe. „Wot nazymy 2016 hač dosrjedź lěta 2017 budu to po informacijach LMBV jeno přihotowanske dźěła. Towarstwo napomina, tutón čas wužiwać a wo dalšim postupowanju dokładnje rozmyslować. „Bohužel njebu naša próstwa, kupanski pobrjóh zaso wotewrěć, přizwolena“, předsyda towarstwa wobžarowaše.
