Pinca pod nětčišej zahrodu něhdy kupjel stareje fary była
Nimo cyrkwjow su tež farske domy něme swědki stawiznow. Ze swojej lětnjej seriju so po serbskich a dwurěčnych katolskich a ewangelskich wosadach rozhladujemy a někotre fary předstajimy – dźensa Hodźijsku.
Byrnjež drje za zažnu dobu srjedźowěka žane dokładne ličby za farski dom w Hodźiju njepředleželi, wjacore zapiski na załoženje Hodźijskeje wosady pokazuja. Wone sahaja do časa skutkowanja swjateho Bena, Mišnjanskeho biskopa wot lěta 1066 do 1106. Wón je na městnje dźensnišeje fary załožił biskopski wudwór, kotryž jeho mać wobhospodarješe. Rozsudne za to, wutworić cyrkwinsku wosadu a wukonjeć dušepastyrske dźěło přez fararja, běchu stabilne hospodarske zakłady. Wšako wěriwi cyrkwinske dawki w dźensnišim zmysle njepłaćachu. Na wsy bě farar runočasnje nawoda ratarskeho kubła. Kak prěnjotne twary na farskim dworje wupadachu, drje njehodźi so dźensa rjec. Z wěstosću pak pokazuja stare murje za tamnišej bróžnju, wuhotowane z třělnicami (Schießscharten), na pózdni srjedźowěk.
Twarjeni a murja ponowjene
Wjacore naprawy w Budyskim jastwje wotzamknjene
Budyšin (SN/MWj). Sakski minister za justicu Sebastian Gemkow (CDU) přepoda wčera w Budyskim jastwje ponowjenej jastwowej twarjeni a ponowjenu murju. W domje 1 stej nětko wuchodny a zapadny dźěl saněrowanej. Tež přetwar domu 2 za škitnu jatbu (Sicherheitsverwahrung) je wotzamknjeny. Za tele naprawy su dohromady 37,2 milionaj eurow wudali. Cyłkownje je Sakska wot lěta 1991 něhdźe 100 milionow eurow do Budyskeho jastwa inwestowała. „Twarske wuměnjenja moderneho jastwa maja na jednym boku wšitkim wěstotnym žadanjam wotpowědować, na tamnym boku pak tež jatych motiwować swoje žiwjenje změnić. Ze zakónčenjom twarskich dźěłow wotpowěduje Budyske jastwo nětko modernemu a humanemu zarjadnišću“, rjekny Sebastian Gemkow.
Wunošk šlagroweje nocy za dźěći a młodostnych
Njeswačidło (LR/SN). Tež jědnata šlagrowa nóc w parku Njeswačanskeho barokneho hrodu bě sobotu znowa połny wuspěch. Byrnjež temperatury skerje ke kupanju wabili, přińdźechu wopytowarjo po stach. Witali su jich sportowče w baroknych kostimach. Wuhotowar mjeztym derje znateho a woblubowaneho zarjadowanja bě znowa Njeswačanske sportowe towarstwo Módro-běłych. Dokelž bě předpředań zastupnych lisćikow dosć dobra, móžachu na tónle wječor měrnje zhladować, rjekny předsyda towarstwa Frank Fliegner. Za njeho a wšitkich pomocnikow je šlagrowa nóc mjeztym nimale rutina. Kóždy wotrjad sportoweho towarstwa wě, kotre nadawki a dźěła maja so hdy a hdźe zdokonjeć.
Dokelž so šlagrowa nóc stajnje prěnju sobotu pražnika wotměwa, je to mnohim bywšim Njeswačanam kruty termin, so tónle wječor „doma“ z přećelemi zetkać a zhromadnje swjećić. Tež busowe předewzaća maja Njeswačansku šlagrowu nóc w swojim programje a poskićeja wosebite jězby. Hosći zabawješe lětsa šěsć šlagrowych spěwarkow a spěwarjow, mjez druhim Linda Hesse a Ina Colada.
Njewšědne chłódne městno měli
Policija (06.07.15)
Běła Woda. Wuchowansku słužbu a policiju wołachu wčera připołdnju na Liebknechtowu w Běłej Wodźe. Tam běchu wobydlerjo žonu namakali, lěkar pak móžeše jenož hišće jeje smjerć zwěsćić. Při prěnich přepytowanjach so wukopa, zo bě žona po wšěm zdaću z balkona bydlenja na štwórtym poschodźe padnyła. Jedna so wo 56lětnu wusydlenču, kotraž w Běłej Wodźe bydleše. Kriminalna policija nětko wobstejnosće, kotrež běchu k smjerći žony wjedli, bliže přepytuje. Tež złóstnistwo při tym njewu- zamkuja.
Dočasne wjeselo na festiwal
Hudźbna akademija SLA swoje wuslědki prezentowała
Chrósćicy (CRM/SN). Dźěćacy chór Sołobiki, dźěćaca rejwanska skupina Łužičanka kaž tež dźěćacy balet prezentowachu wčera popołdnju w Chróšćanskej wjacezaměrowej hali „Jednota“ swoje wuslědki we wobłuku wukubłanja na hudźbnej akademiji Serbskeho ludoweho ansambla Budyšin. „Něhdźe 350 dźěći zaběra so we wšelakich skupinach ze spěwanjom. Fachowcy je tohorunja na polu hłósneho kubłanja wuwučuja. A dalše 200 dźěći wšelakich starobnych skupin dóstawa fundamentalne wukubłanje w rejowanju.“ Takle zrysowa intendantka SLA Milena Vettrainowa skrótka rozměr dźěła swojeho domu z wuměłskim dorostom. Wona pak njedźakowaše so jeno zajimowanym dźěćom a jich angažowanym staršim, ale wosebje tež šěsć přitomnym wuměłcam-pedagogam.
Ministerka njejapcy zazwoniła
Na jubilejnym 40. wjesnym swjedźenju w Nowej Wjesce je předsyda towarstwa Wjesna zhromadnosć Křesćan Korjeńk wčera hosći, kotrychž njebě horce wjedro zatrašiło, w kopatym połnym stanje na połdrahodźinski zabawny program witać móhł.
Nowa Wjeska (aha/SN). W dwaceći programowych dypkach předstaji něhdźe 35 sobuskutkowacych Nowowješćanske wjesne žiwjenje. Najmłódši bě hakle šěsć lět a ze 76 lětami bě drje Jan Pjech najstarši. Manuela Čornakowa, Kathrin Pěčcyna, Monika Klimantowa a Milena Korjeńkec běchu wšěm znate podawki a wjerški w běhu lěta kaž póstnicy, mejemjetanje a hodowne wiki do zajimaweho cyłka zestajeli. Akterojo poslednjeho wobraza běchu rumpodichojo, kotřiž drje so při 40 stopnjach w stanje w swojej drasće najbóle poćachu. Město horceho wina pak mějachu w swojich škleńcach zawěsće zymne napoje.
Něhdźe 400 přihladowarjow je pjatk wječor koncert wjacorych ...
Krótkopowěsće (06.07.15)
Lětnja šula wotprajena
Lipsk. Serbska lětnja šula lětsa wupadnje. Tole zdźěla prof. dr. Edward Wornar z Instituta za sorabistiku Lipšćanskeje uniwersity. Dotal je so jedna jenička wosoba přizjewiła. „Tohodla smy nětko wobzamkli, zo lětnju šulu wotprajimy“, wón piše. Připrajenu pomoc z Čěskeje za klětušu lětnju šulu chcedźa za přihot noweho kursa wužić.
Hilbert nowy měšćanosta
Drježdźany. Politikar FDP Dirk Hilbert je nowy wyši měšćanosta Drježdźan. Wón přesadźi so we wčerawšim druhim kole wólbow z 54,2 procentomaj přećiwo sakskej ministerce za wědomosć EvjeMariji Stange (SPD), kotraž dósta 44 proc. hłosow. Na wólbach wobdźěli so 42,7 proc. ludźi. Hilbert bě kandidat towarstwa Njewotwisni wobydlerjo.
Wobsah žiwidłow rozdźělny
Praha. Wobsah tyzow žiwidłow ze samsnym mjenom móže w Němskej a Čěskej rozdźělny być. Tole su čěscy posudźowarjo wuslědźili. Woni zwěsćichu tajki zjaw w cyłkownje 24 padach. Tak je jogurt Activia w Němskej tučniši. Porno tomu je kwalita mjasa w konserwach w Němskej lěpša hač w Čěskej. Firmy wopodstatnjeja to z rozdźělnymi słodami w krajach.
Krótkopowěsće (03.07.15)
Nětko online rešeršować
Budyšin. Archiwowane kubła města Budyšina hodźa so nětko online rešeršować. To zmóžnja nowe perspektiwy, přeslědźić regionalne stawizny. Něhdźe dwě třećinje cyłeho wobstatka stej online přistupnej. W Budyskim statnym archiwje chowa so 2,7 regionalnych kilometrow aktow, 1 500 wopismow a 6 600 kartow z minjenych sydom lětstotkow.
Folklorna lawina zahajena
Choćebuz. Mjeztym 15. folklorna lawina je so dźensa w Delnjej Łužicy zahajiła. Sta wobdźělnikow ćehnješe we wulkej paradźe po Choćebuzu. Přizjewiło bě so 400 hudźbnikow a rejwarjow z 13 krajow, kaž zarjadowarjo zdźěleja. Staciji lětušeho festiwala stej nimo Choćebuza tež Baršć a Lubnjow. Folklorna lawina traje hač do njedźele, 5. julija.
Planowanje projekta běži
Zhorjelc. Přihoty za znowawotewrjenje Zhorjelskeje kupnicy derje postupuja. Tuchwilu dźěła skupina projektoweho nawody Jürgena Friedela na planowanju dowolnosćow. Paralelnje k tomu wjedu rozmołwy z móžnymi wotnajerjemi. W domje budźe luksus runje tak zaměstnjeny kaž kupjomne wěcy. Nazymu 2017 chcedźa kupnicu wotewrěć.
