Swjedźeń ke kóncej posćenja
Budyšin (CS/SN). Ramona Scholz je jedna z Budyšanow, kotřiž so jako kmótřa wo swójby ćěkancow staraja. Něhdźe lěto wěnuje so wona swójbje Afa ze Syriskeje. To su Ahmed Afa, mandźelska Zhour Abed Raboh kaž tež dźěći Enaam, Salwan a Ahad. Mjeztym zo Ahmed Afa hižo dwě lěće w Budyšinje bydli, su mandźelska a dźěći hakle lěto tu. Holcy mjeztym hižo nimale perfektnje němsce rěčitej.
Budyscy kmótřa swjećachu minjeny pjatk wječor w Kamjentnym domje z něhdźe 150 ludźimi swjedźeń, z kotrymž kónča muslimojo ramadan-posćenje. Swjeća to z hudźbu, rejemi a wězo ze słódnymi jědźemi. Za to bě kóžda swójba něšto do Kamjentneho domu sobu přinjesła. Kamjentny dom přewostaji wulkej ličbje dźěći, kotrež so na swjedźenju wobdźělichu, najwšelakoriše hry. Wo napoje postara so towarstwo „Witajće do Budyšina“.
Trjebaja dołhodobny koncept
Wojerecy (AK/SN). Swój směrodajny koncept měło město Wojerecy dale wuwiwać a při tym stare a nowe město kaž tež tak mjenowane Halštrowske koleno runohódnje zapřijeć. Město měło kulojte blido k prašenjam hospodarskeho a měšćanskeho wuwića wutworić. To je wuslědk njedawneje wobydlerskeje zhromadźizny z něhdźe 80 zajimcami.
„Za kulojtym blidom měli sobudźěłaćerjo města, komunalnych předewzaćow a zarjadnišćow sedźeć“, namjetowaše Harald Wukasch z wobydlerskeje iniciatiwy Wysokodom při kolenu. Hłowna tema wobydlerskeje zhromadźizny bě, kak móhło město swojich wobydlerjow do diskusije wo wuwiću Wojerec zapřijeć. Zakład toho měło wusměrjenje města być, rjekny architektka Doris Baumeister, kotraž je wobydlerski centrum Piwarska hasa 1 planowała. Dalši wažny dypk je, kak móhli młodych ludźi za tule diskusiju zdobyć. Na wobydlerskej zhromadźiznje znajmjeńša je młódša generacija dospołnje pobrachowała.
Konjacy dorost wuspěšny
Hubert Wróbl z Carlom championat žrěbjatow w Moritzburgu dobył
Moritzburg/Wotrow (BeW/SN). Wyskacy to aplaws z tribunow jěchanišća sakskeje krajneje kobłarnje w Moritzburgu za žrěbjo ze serbskeho konjenca. Prěni raz móžeše Hubert Wróbl lětsa w swojim Wotrowskim konjencu žrěbjo na swět witać. Jenož něšto měsacow pozdźišo steješe wón minjenu njedźelu ze swojim Carlom před sudniskej komisiju młodych žrěbcow (Hengstfohlen) Sakskeje. A je dobył.
Hižo před dwěmaj njedźelomaj bě so Wróblec žrěbjo na regionalnej přehladce w Jěžowje wulkotnje prezentowało. Z tehdy docpětym druhim městnom so wone za championat w Moritzburgu skwalifikowa. Zo pak so tam mjez 35 najlěpšimi přesadźi, z tym Hubert Wróbl ze žanej mysličku ličił njebě. „To je naše prěnje žrěbjo. Nimamy z nim hišće žane nazhonjenja, a nětko je tak wulkotnje wotrěznyło. To njemóžeš scyła tak prawje wěrić“, powěda Hubert Wróbl.
Nosy na dźěle rubiško
Ministerka wo modelowej praksy přeswědčena
Budyski wokrjes kroči při medicinskim zastaranju ćěkancow a požadarjow azyla nowe puće. Sakska ministerka za strowotnistwo, socialne naležnosće, młodźinu a integraciju Barbara Klepsch (CDU) je so wo tym přeswědčiła.
Budyšin (SN/MiR). Nimo modeloweje praksy w Budyskej chorowni wobstejitej tež w Biskopicach a Wojerecach praksy, kotrejž so wo pacientow z mjenowaneju wobłukow staratej. Tak wolóžeja kliniki předewšěm lěkarjow na wsach. Nětko přichadźeja potrjecheni hnydom do nuzoweje přijimarnje chorownje a dóstawaja tam zakładne zastaranje w samsnej kwaliće kaž kóždy němski pacient. „Za to je Budyski wokrjes jako nošer wosebite zrěčenje ze zjednoćenstwom kasowych lěkarjow wotzamknył“, rozłoži nawodnica strowotniskeho zarjada Budyskeho wokrjesa dr. Ilona Walther.
Krótkopowěsće (13.07.16)
Akcije přećiwo internetnej hidźe
Lipsk. We wobłuku wšoněmskeje akcije přećiwo hidypołnym komentaram w interneće je policija dźensa w Sakskej wjacore bydlenja přepytała. Kaž rěčnica operatiwneho wotwobaranskeho centruma w Lipsku zdźěli, běchu tež bydlenja we wuchodnej Sakskej potrjechene. Slědźenja měrja so přećiwo 60 podhladnym w 14 zwjazkowych krajach.
Dalše sylne njewjedra
Waršawa. Wulke zliwki su minjenu nóc we Waršawje dwě staciji metro zapławili. Po nachwilnym zawrjenju móžachu jej zaso wotewrěć, rozprawja sćelak TVN24. Dwaj dnjej trajace njewjedra su pólsku stolicu dotal wosebje trjechili. Dróhi a pincy stejachu pod wodu. W měsće wudyri wobchadny chaos. Wichor je třěchi 170 domskich wobškodźił.
T-shirt škita žiwjenje
Policija (12.07.16)
Transporter z kolesami fuk
Słona Boršć. Na awtodróhowym wotpočnišću Hornja Łužica pola Słoneje Boršće su njeznaći zawčerawšim popołdnju běły Renault Master pokradnyli. Na dwě lěće starym jězdźidle z pólskim čisłom bě 52 nowych kolesow nakładowane. 38lětny šofer bě po puću do Mnichowa, hdźež měješe kolesa přepodać. Rubiznu trochuja na něhdźe 82 000 eurow.
Paducha awta lepili
Němcy. Při wobchadnej kontroli w Němcach je policija zawčerawšim rano pozdatneho paducha awta lepiła. Po tym zo běchu wodźerja Golfa zadźerželi, so wukopa, zo bu jězdźidło w nocy na minjeny pjatk z garaže we Wulkich Ždźarach pokradnjene. Golf njebě scyła přizjewjeny a jeho čisle njeběštej płaćiwej.
Zahoriće a kreatiwnje dźiwadźelili
9 000 ludźi je cyłkownje 15 předstajenjow lětušich Krabatowych swjedźenskich hrow widźało. Sobotu su so lajskim hrajerjam, ale tež wšitkim dalšim pomocnikam dźakowali.
Čorny Chołmc (AK/SN). We Wojerowskej serbskej dźěłanskej drasće poskićowaštej Heidi a Edith Grögerec na Krabatowych swjedźenskich hrach bowlu a lód, rumowaštej sudobjo a wotpadki. „Tajke čestnohamtske dźěło skruća zhromadnosć“, rjeknyštej wonej sobotu na dźaknym zarjadowanju. Wonej słušeštej k tym, kotřiž su so lětsa za Krabatowe swjedźenske dny angažowali.
9 000 ludźi je 15 předstajenjow widźało. A woni njeběchu jeno z Němskeje, ale tež ze Šwicarskeje, Awstriskeje a samo z Norwegskeje. „Naše hesło wot wšeho spočatka bě, zo wjes dźiwadło hraje“, rjekny intendant Peter Siebecke minjenu sobotu. „Tole chcemy tež dale wobkedźbować.“ Wosom powołanskim dźiwadźelnikam poboku bě 85 lajkow. Pjatnaćo z nich mějachu wjetše abo mjeńše pasaže rěčeć. Zasadźenych bě dalšich 40 pomocnikow, kotřiž poskićachu napoje a jědźe, starachu so wo porjad na parkowanišću abo mazachu pomazki.
Nasdala: Plany zaćisnjene
Frakcija Swobodnych wolerjow list Budyskemu wokrjesej njepodpisała
Wojerecy (SN/MWj). List Wojerowskeho wyšeho měšćanosty Stefana Skory (CDU) a předsydow frakcijow měšćanskeje rady – Lěwicy, CDU, SPD a Aktiwne Wojerecy – Budyskemu wokrjesej, w kotrymž dźe wo ležownostnu koncepciju wokrjesa (SN rozprawjachu), bě njetrjebawši, dokelž najnowše wuwiće w tymle nastupanju njewobkedźbuje. „Tohodla njejsmy jako Swobodni wolerjo list podpisali“, rjekny na naprašowanje čłon jich frakcije Dirk Nasdala, kiž je zdobom předsyda frakcije Swobodnych wolerjow Budyskeho wokrjesneho sejmika.
Intensiwny kurs čěšćiny
Budyšin. Rěčny centrum WITAJ zarjaduje lětsa zaso intensiwny kurs čěšćiny za Serbow w Chrósćicach – a to wot 1. do 6. awgusta. Čech Pavel Šlechta budźe wšědnje šěsć hodźin wuwučować. Po popołdnjach budu čěscy hóstni referenća w jich maćeršćinje k čěskej kulturje a stawiznam přednošować. Nimo wulěta do Čěskeje su zabawne wječorki planowane. Zajimcy njech so přizjewja w Rěčnym centrumje WITAJ pod telefonowym čisłom 03591 550400 abo z mejlku pod . Na swojej internetnej stronje www.recny-centrumwitaj.de podawa RCW dokładniše informacije a program.
Floristika za cyrkwje
Smochćicy. Floristiski kurs přewjedźe Smochčanski Dom biskopa Bena sobotu, 20. awgusta. Wobdźělnicy w kursu nawuknu, kak móža ze słónčnych róžow, trawow a dalšich přirodnych materialijow pychu za wołtarje a dalše městnosće w cyrkwi zhotowić. Kurs nawjeduje floristka Silvia Jonas. Přizjewjenja přijimuja hač do 20. julija pod telefonowym čisłom 035935/ 220 abo e-mailnje pod adresu .
