Pjenjezy tuchwilu najlěpša pomoc
Na dźeń wotewrjenych duri přeproša njedźelu, 4. septembra, Błohašečanska zwěrjatownja. Tam nadźijeja so prawje wjele wopytowarjow, přetož bědźa so z napjatym połoženjom.
Błohašecy (SN/MWj). Wonkownje wuprudźa Błohašečanska zwěrjatownja při statnej dróze S 100 runjewon měrny zaćišć. Na wulkim dworje lědma někoho wuhladaš, jenož někotry psy znazdala šćowkać słyšiš. Za kulisami pak maja sobudźěłaćerjo dosć starosćow, kaž čłonka předsydstwa zwěrinoškitneho towarstwa Nicole Schmidt přeradźa. Tuchwilu staraja so tam wo něhdźe sto kóčkow, wo dźesać psow a někotre dalše skoćata. Mjeztym zo je kapacita kóčkow wućežena, móhli hač do 30 psow přiwzać. To pak wokomiknje móžno njeje, dokelž maja ze zawjedźenjom minimalneje mzdy mjenje sobudźěłaćerjow. „Smy dźě jeničce wot darow žiwi a njemóžemy sej nětko hižo telko sobudźěłaćerjow dowolić. Tež spěchowanske móžnosće su wobmjezowane“, praji Nicole Schmidt.
Móst nad Klóšterskej wodu w Lipju w Pančicach-Kukowje bu při ...
Třičarowa wyša šula ma nastać
Kubłanska krajina města Wojerec so přichodne lěta bytostnje změni. Dwě dotalnej wyšej šuli matej so zawrěć a za to jedna centralna wutworić. Nadawk, tole planować, je měšćanska rada wčera rozdała.
Wojerecy (AK/SN). Na terenje wot lěta 2002 prózdneho a dźensa pod škitom pomnikow stejaceho Konrada Zusoweho gymnazija ma třičarowa wyša šula nastać. K tomu je so Wojerowska měšćanska rada na swojim wčerawšim posedźenju wuznała. Z jednym napřećiwnym a jednym wzdatym hłosom rozdachu nadawk, twarjenje a nutřkowne rumnosće planować.
Najprjedy maja so prěnje tři wukonowe fazy přewjesć, potajkim zakładne planowanje, předplanowanje a naćisk. Tole ma dohromady 319 000 eurow płaćić. „Dalše wukonowe fazy slěduja potom krok po kroku wotwisnosnje wot spěchowanskich srědkow“, rozłoži wyši měšćanosta Stefan Skora (CDU).
Krótkopowěsće (31.08.16)
Inwestuja do noweho labora
Budyšin. Sakska inwestuje do Budyskeje powołanskeje akademije 5,9 milionow eurow za nowy labor. Tole zdźěli wčera statny managament za imobilije a twarstwo w Drježdźanach. Nowotwar z cyłkownje 1 000 kwadratnymi metrami wužitneje płoniny ma hač k zymskemu semestrej 2017/2018 nastać a studentam moderne techniske wuměnjenja skićić.
Wot lěta 2017 mjenje płaćić
Berlin/Budyšin. Na wodźerjow awtow w Budyskim wokrjesu čaka klětu lěpše zastopnjowanje jich rukowanskeho zawěsćenja. Tole zdźěli dźensa Němska zawěsćenska towaršnosć w Berlinje. Mjez druhim płaći wolóženje tež za Rudnohorinski wokrjes. We wšěch tamnych wokrjesach Sakskeje wostanje wšitko při starym. Zakład zastopnjowanja twori škodowa bilanca po njezbožach.
Zatajany pralěs
Po předpisach so měć
Z města k wjesnemu hrodej
Městno w dnjowym přebywanišću budźe dróše
Wulka Dubrawa (CK/SN). Wot 1. oktobra 2016 podróši so we Wulkodubrawskej gmejnje staršiski přinošk za městno w žłobiku na 210 eurow, w pěstowarni na 120 eurow a w horće na 70 eurow wob měsac. Tole je wjetšina gmejnskeje rady na swojim wčerawšim posedźenju wobzamknyła. Přirunujo z tamnymi gmejnami leži Wulka Dubrawa w srjedźnym polu, rěkaše ze zarjadnistwa. Wone wobkrući zwyšenje předewšěm z rozrosćenymi personalnymi wudawkami. Po słowach wjesnjanosty Lutza Mörby (njestronjan) pak při tym ani hišće wobličili njejsu, zo wot lěta 2017 hišće wjace personala trjebaja, dokelž so tak mjenowany hladanski kluč změni. Dohromady płaći zastaranje dźěći w dnjowych přebywanišćach Wulkeje Dubrawy a wokolnych wsow lětsa 950 000 eurow, štož sej Sakska, gmejna a starši dźěla. Nimo swojeho podźěla přewostaji gmejna přidatnje 100 000 eurow.
Skupinje zhromadnje rejwałoj
Brětnja (UH/SN). Z mnohimi wjerškami wotměchu minjeny kónc tydźenja w Brětni 40. němsko-serbski wjesny swjedźeń. Z wothłosom běchu wjesny předstejićer Lothar Kujaš a jeho sobuorganizatorojo jara spokojom. „Zastupjerjo wšitkich towarstwow wědźa, što ma so činić. A tak je nam wjeselo, tajke zarjadowanja organizować“, praji Kujaš, sam čłon drastoweje a rejwanskeje skupiny.
K zahajenju swjedźenja wobhladachu sej film wo wuwiću Brětnje, při čimž sej wopytowarjo wuwědomichu, što je minjene lětdźesatki we wsy nastało. Wjeršk bě njedźelny pisany program. Byrnjež chětro horco było, su dorosćeni kaž tež dorost Brětnjanskeje drastoweje a rejwanskeje skupiny w serbskej narodnej drasće wjesne tradicije a nałožki předstajili. Překwapjenka bě zhromadna reja Brětnjanskeho dorostoweho cyłka z Čornochołmčanskej dźěćacej rejwanskej skupinu.
Poskitk přesnadny był
Tež druhe přesadźowanje Worklečanskeho hosćenca bjez wuslědka
Budyšin (SN/MWj). Marlies Hüllowa je dale wobsedźerka Worklečanskeho hosćenca „Ke kupowemu hatej“. Po prěnim nanuzowanym přesadźowanju spočatk junija tež wčerawši druhi termin na Budyskim zarjadniskim sudnistwje žadyn wuslědk přinjesł njeje.
Suma a wuměnjenje, pod kotrymž móhł něchtó hosćenc kupić, běštej samsnej kaž spočatk junija. Objekt ma cyłkownu wobchadnu hódnotu 162 000 eurow. Znajmjeńša połojcu toho měł zajimc poskićić. Ludowa banka pak na kóncu rozsudźi, hač poskitk přiwozmje. Wona dźě je Worklečanskej korčmarce kredit 316 000 eurow dała.
Přesadźowanje wjeršk było
Budyšin (CS/SN). Tak horco bě posledni kónc tydźenja awgusta zrědka. To je so wot minjeneho pjatka hač do njedźele na swjedźeń při Budyskej Starej wodarni z tym wuskutkowało, zo je wodnjo wočiwidnje mjenje wopytowarjow hač tamne lěta přišło. Wječorne zarjadowanja porno tomu běchu derje wopytane, wobkrući wotnajer Stareje wodarnje Tilo Rosjat.
Stajny garant je na přikład Conni Wolf ze swojej kapału, kotraž staraše so pjatk wječor wo spodobnu hudźbu. Klankodźiwadźelnik Ekkehart Heute, kiž jako Wenzel Röhrscheidt wodźenja po měsće poskića, bě samsny wječor trochu přesłapjeny. Ani jenički hósć nochcyše so na wodźenju wobdźělić. Za to měješe wón na swojim dworje Pod Hrodom na klankodźiwadłowym swjedźenju stajnje dosć přihladowarjow. Tam bě tež chłódnišo a přijomnišo hač horjeka na Serbskim kěrchowje.
