Wo swojej słužbje blišemu porěčał
Smječkecy (TŠ/SN). Njenapadnje, bjez signalow a z normalnej spěšnosću je wotydźenja wosebite lěkarske awto w Hamburgu po puću. Zastanje stajnje w samsnym času na samsnych městnach: při dwórnišću, při přistawje, w měsćanskich dźělach kaž St. Pauli – wšudźe, hdźež so bjezdomni zetkawaja. A kóždu srjedu sedźi w tymle awtobusu tež serbski lěkar dr. Stanij Nawka. Mobilna lěkarska słužba mjenuje so tale pomoc Carity we wulkoměsće, kotrež je w tym nastupanju po cyłej Němskej znate. Wčera pak běše Stanij Nawka w Smječkecach, zo by tam na přeprošenje Tadeja Šimana, nawody Domu swj. Jana, wo swojej čestnohamtskej słužbje rozprawjał, kotruž mjeztym hižo 20 lět wukonja.
Němčanski wjesny klub je minjenu sobotu hromadźe z wohnjowej woboru ...
Krótkopowěsće (30.01.17)
Wustajeńcu Nageloweje wotewrěli
Mišno. Pod hesłom „bilder und filmbilder“ su wčera we Wuměłstwowym towarstwje Mišno wustajeńcu z twórbami Maje Nageloweje a jeje filmoweho partnera Juliusa Günzela wotewrěli. Hač do 4. měrca je přehladka přistupna. Na poslednim dnju budźe filmowe předstajenje, ke kotremuž poda dr. Grit Lemke zawod.
Inflacija w Sakskej přiběrała
Kamjenc. Inflacija je w Sakskej w januaru na wjace hač dwaj procentaj přiběrała. Po dotalnych wobličenjach su so płaćizny přerěznje wo 2,3 procenty zwyšili, statistiski krajny zarjad w Kamjencu zdźěla. Hłownje zamołwite za to su přiběrace płaćizny žiwidłow (3,6 proc.) a energijowy wobłuk (6,3 proc.) Tež popłatki za pěstowarnje a wotpadki su so zwyšili.
Dróhi zalodźene byli
Mnichow. Strašny lód na dróhach je dźensa rano w srjedźnej a južnej Němskej nadróžny wobchad masiwnje haćił. Na awtodróze A 3 w delnjej Frankskej je wjace hač dźesać awtow do so zrazyło. Němska wjedrarnja je wjacore warnowanja wozjewiła. Wječor wočakuja dešć a z tym zwisowacy strašny lód na dróhach tež we wuchodnej Sakskej.
Cigarety dla z awtodróhi zjěł
Na třoch runinach pokazuja wuwiće kompjutera
Wojerecy (UH/SN). Po třoch lětach twarskeho a přihotowanskeho časa su sobotu we Wojerecach nowy Zusowy kompjuterowy muzej ZCOM swjatočnje wotewrěli. W přitomnosći mnoho hosći rjekny Wojerowski wyši měšćanosta Stefan Skora (CDU): „Sym sej wěsty, zo nastanje tule žiwy komunikaciski centrum za wšitke generacije. Runje tam, hdźež so stare a nowe město zetkatej, přinošuje ZCOM k dobremu wuwiću našeho města.“
Policija (30.01.17)
Woheń horceho popjeła dla
Hornja Kina. Dokelž bě wobydler w Hornjej Kinje horcy popjeł do plastoweho wotpadkoweho sudobja sypnył, je so w nocy na njedźelu sudobjo palić započało. Wětřika dla přeskočichu płomjenja na staplowane palne drjewo při garaži, na čož so třěcha a zadnja sćěna garaže wobškodźištej. K hašenju přichwata 35 kameradow ze sydom jězdźidłami. Škoda wučinja něhdźe 4 000 eurow.
Hodownym štomam božemje dali
Hodowny čas so w tutym tydźenju „oficialnje“ skónči. Někotryžkuli je swój hodowny štom hižo z bydlenja wzał. Što so z nim po času pychi stanje, je jara rozdźělne.
Chrósćicy (JK/SN). W mnohich wsach je z dobrej tradiciju, hodowne štomy zhromadnje spalić a to zwjazać z małej zabawu. Tak činja to tež hižo mnohe lěta w Chrósćicach, hdźež organizuje wjesna wohnjowa wobora přijomny wječor. Wosebje młode swójby z dźěćimi su wčera wječor tutón poskitk wužili a swój štom ke gratowni sobu přinjesli, zo bychu jón wot fachowcow pod dohladom spalić dali. Hromada štomow hladajcy rosćeše. Tež Poukalecy běchu swój štom sobu přinjesli. „Tak znajmjeńša wěmy, hdźe štom wotbudźemy, a dźěći maja z toho přidatne wjeselo“, praji młoda mać. Wšelaki staw štomow zawini zdźěla tołsty, kusaty kur, kotryž pak wětřik do bliskich polow wotnjese. Přihladujo spalenju štomow dachu sej wjesnjenjo horce wino a dalše napoje, kiž čłonojo wohnjoweje wobory poskićachu, ale tež słódne kuski z grila słodźeć.
Pytaja zahrodowe meble
Budyšin. Za swoju nowu inscenaciju „Za brězami“ pyta Němsko-Serbske ludowe dźiwadło owalne běłe zahrodowe blido a šěsć zahrodowych stólcow z plasty. Štóž tajke meble ma a chcył je dźiwadłu přewostajić, njech přizjewi so pod telefonowym čisłom 03591/ 598 451 10 abo e-mailnje pod .
Poradźuja schorjenych
Budyšin. Tumorowe poradźowanišćo Budyskeho wokrjesa je wotnětka tež zaso we Wojerecach a Budyšinje wobsadźene. Psychoonkologiski poradźowanski poskitk je dowěrliwy a darmotny. Fachowcy poradźuja potrjechenych telefonisce, doma abo w chorowni wo socialnoprawniskich a psychologiskich prašenjach. Wojerowske poradźowanišćo je na Hrodowym naměsće 2, Budyske na Dwórnišćowej 9. Dalšej městnje stej w Kamjencu na Macherowej 55 a w Radebergu na hasy Heidestraße 70.
Komuž chce so swinjeća
Policija (27.01.17)
Pytaja swědkow njezboža
Mučow. K wobchadnemu njezbožu zawčerawšim wječor w Mučowje pyta policija swědkow. 81lětna žona nóžkowaše něhdźe w 17.30 hodź. na kromje wokrjesneje dróhi, kotraž z Kulowa do wsy wjedźe. Na špatnje wobswětlenym městnje blisko bywšeje šule je z dotal njeznateje přičiny 63lětny wodźer Forda do njeje zajěł a ju ćežko zranił, tak zo dyrbjachu žonu do chorownje dowjezć. Wěcna škoda na awće wučinja něhdźe 1 000 eurow. Zo móhli přičiny zražki přepytować, wobchowachu sej zastojnicy dźěle drasty rentnarki kaž tež awto. W zwisku z wobdźěłanjom njezboža pyta policija swědkow, kiž su zražku wobkedźbowali abo kotřiž běchu žonu do toho při dróze widźeli. Nimo toho pytaja pokazki na wašnje jězdźenja Forda. Pokiwy přijimuje awtodróhowy policajski rewěr pod telefonowym čisłom 03591/ 36 70, ale tež kóždy druhi policajski běrow.
Planuja nowe awtomaty
Budyšin (CK/SN). Z kreditnej kartku abo z handyjom při parkowanskim awtomaće zapłaćić ma přichodnje tež w Budyšinje móžno być. Awtomaty měli nimo toho drobne pjenjezy wudawać móc a wjacerěčnje wuhotowane być. Dokelž w sprjewinym měsće tuchwilu nastajene awtomaty hižo načasne njejsu, zasadźa so frakcija FDP měšćanskeje rady za to je ponowić. Na zašłym posedźenju radźićelow je předsyda frakcije Mike Hauschild zarjadnistwo napominał, sej wotpowědne poskitki wobstarać.
