Krótkopowěsće (12.12.17)
Braniborska za škit mjeńšin
Podstupim. Kulturna statna sekretarka Ulrike Gutheil je wčera w funkciji jako społnomócnjena za naležnosće Serbow w Braniborskej wobydlersku iniciatiwu Minority SafePack podpisa. Zdobom wona w mjenje krajneho knježerstwa namołwja so akciji přizamknyć.
Šiman a Ermer přisydnikaj
Lubij. Marko Šiman z Budyšina jako jenički Serb a Roland Ermer z Njedźichowa zastupujetaj Budyski wokrjesny zwjazk CDU jako přisydnikaj w nowym krajnym předsydstwje sakskeje unije. Delegaća zjězda CDU su jeju minjenu sobotu w Lubiju wuzwolili. Matthiasej Grahlej z Wachauwa dowěrichu zastojnstwo krajneho pokładnika. To zdobom rěka, zo wón jako jenički z CDU w Budyskim wokrjesu prezidijej krajneje strony přisłuša.
Hospodarstwo derje funguje
Prawočan pokal prěnjeho turněra dobył
Wěteńca (mz/SN). Prěni škotowy turněr we Wěteńcy su njedawno přewjedli. Mikławš Zahon přeprosy sej na njón młódšich kaž tež staršich přećelow zbliska a zdaloka, zo bychu najlěpšeho škotowarja wječora zwěsćili. Cyłkownje wobdźěli so 15 kartyplacarjow. Po tym zo bě po prěnim kole ze 14 wobdźělnikami dobyćer wječora z 2 218 dypkami hižo nimale wěsty, popřachu sej přestawku z ćopłym přikuskom. Po tym napjatosć na wuslědk druheho koła widźomnje přiběraše. Nic naposledk pola pjatnateho hrajerja, kiž so hakle druhemu kołu přidruži. Jemu přiznachu přerězk dypkow prěnjeho koła ze šwarnymaj 1 002 dypkomaj. W druhim kole wotměchu za pjeć blidami ze stajnje třomi škotowarjemi 36 hrow.
Po wikach koncert w cyrkwi
Policija (11.12.17)
Pokradnjene awto so paliło
Lešawa. W nocy wot pjatka na sobotu je so w Lešawje blisko Haslowa BMW palił. Po tym zo bě někajki wubuch słyšała, spěchaše 59lětna k awtu, z kotrehož so hižo sylnje kurješe a kotrež so na to zapali. Wohnjowi wobornicy płomjenja zhašachu. Žonu dyrbjachu zajědojćenja kura dla do chorownje dowjezć. Po slědźenjach policije so wukopa, zo bě něchtó BMW pjatk w Biskopicach pokradnył.
Třo ćežkozranjeni
Słona Boršć. Jako chcyše wodźer nakładneho awta sobotu dopołdnja pola Słoneje Boršće ze S 106 na awtodróhu wotbočić, wón napřećo přijěducy Renault přewidźa. Dóńdźe k zražce, při kotrejž so třo we wosobowym awće ćežko zranichu.
Wo měšćanskim wohenju
Budyšin. Zahubna katastrofa w stawiznach Budyšina, měšćanski woheń lěta 1634, budźe tema přednoška jutře, wutoru, w 19 hodź. w Budyskim archiwnym zwjazku na Hrodowskej 12. Stawiznar Richard Fürtig porěči wo tym, kak so wulki woheń w měšćanskich chronikach wotbłyšćuje a kak wo nim rozprawjeja. Zastup je darmotny.
Na koncert a bjesadu
Berlin. 175. serbske blido w Berlinje wotměje so srjedu, 13. decembra. Zarjadowanje započnje so w 15 hodź. z wopytom koncerta w katedrali swj. Jadwigi. Z Hornjeje Łužicy pochadźacy tachantski organist Tomaš Žur hudźi na Klaisowych pišćelach kompozicije Bacha a Regera. Po koncerće podadźa so wšitcy na serbsku adwentnu bjesadu do hosćenca EINSTEIN KAFFEE na Friedrichowej 206.
Wustaja swoje wobrazy
Zatykane roły dyrbja wurjedźić
Róžant (aha/SN). Mjeztym hižo dlěje hač měsac na lěwej stronje mjez Smjerdźacej a Łazkom z minibagrom hłuboke hrjebje ryja. Tež wjacore traktory ze wšelakorej techniku su tam zasadźene. Přičina je, zo njeměješe agrarne towarstwo SORABIA na płoninje něhdźe pjeć hektarow w minjenych lětach žadyn abo lědma wunošk, dokelž tam stajnje dlěši čas woda steješe. Potrjechene polo běchu 1973 meliorěrowali. Drenažowe roły dyrbjachu běžnje hladać a po potrjebje rjedźić. Za to mějachu brigadu, kotraž so na prodrustwowych honach wot Nuknicy hač do Delan wo to staraše. Po přewróće so wo roły w zemi lědma hišće starachu, a tak je po lětdźesatkach zdźěla korjenje bliskich štomow a wosebje tež tam bywaca železna ruda zatykachu.
Trjebaja wjace wobornikow
Budyska měšćanska rada je nětko rozsudźiła, w přichodnych lětach 13 přidatnych wohnjowych wobornikow přistajić. Hewak wěstota wobydlerjow zaručena njeje.
Budyšin (CK/SN). Z jednohłósnje wobzamknjenym wohnjowobornym planom je Budyska měšćanska rada na swojim zašłym posedźenju tomu přihłosowała, wjace personala za powołansku wohnjowu woboru města přistajić. W 20 procentach wšitkich zasadźenjow njeje zaručene, zo su wobornicy w běhu wosom mjeńšin po alarmje na městnje wohenja abo njezboža, rozłoži měšćanski wohnjowy mišter Markus Bergander. Budyskich wobornikow wołaja w běhu lěta k 550 zasadźenjam. Při tym jedna so zwjetša wo technisku pomoc, na přikład po wobchadnym njezbožu, abo hdyž maja so něhdźe w nuzowym padźe durje wočinić.
Zabawjeli so a pomhali
Wjele připóznaća za koncert skupiny PoŠtyrjoch a jeje přećelow
Jaseńca (SN/MWj). Kopatej połnej běštej garaža a před njej stan na Rynčec statoku w Jaseńcy, hdźež staj Florian Rynč a spěwna skupina PoŠtyrjoch sobotu wječor mjeztym hižo sedmy raz beneficny koncert wuhotowałoj. Program skićeše dobru měšeńcu mjez znatymi a nowymi pěsnjemi skupiny, w kotrejž skutkuja Krystof a Jan Rjeda, Beno Hojer a Marek Rjelka. Tak dožiwi po tradicionalnym spěwnym zaćahu titl „Po štyrjoch žno je“ swoju premjeru. Tekst na znatu melodiju Marianny Rosenberg spisał bě Jan Rjeda. Z jeho pjera pochadźeja tohorunja linki znatych spěwow kaž „Do piwa dam“ abo „Jurij“. Z hosćom bě lětsa Sorbian Art Trio, wustupowace tónkróć jako štwórtka ze Symanom Hejdušku, Janom Brězanom, Symanom Handrikom a Jurjom Hantušom. Młodźi hudźbnicy zanjesechu instrumentalne runje tak kaž spěwne kruchi a přeprosychu publikum na wulki koncert pod hesłom „Trio a kumple“ 30. decembra w Radworskej „Meji.
Krótkopowěsće (11.12.17)
Lětsa wjac turistow
Budyšin. Ličba wopytowarjow sprjewineho města je lětsa znowa lochce přiběrała. To wozjewja město Budyšin. Wot spočatka lěta měješe Budyšin 57 656 hosći, štož su něhdźe 2,4 procenty wjac hač loni w samsnym času – a to, byrnjež město njeluboznych podawkow minjeneho lěta skerje w špatnym swětle stało. Zregistrowali su tohorunja 1,9 procentow wjac přenocowanjow w Budyšinje.
Sakska poslednja
Gütersloh. Sakska wobsadźi w studiji Bertelsmannoweje załožby „Socialna zwjazanosć w Němskej 2017“ poslednje městno. W telefoniskim naprašowanju bě so něhdźe 5 000 wobdźělnikow k temam, kaž dowěra k sobučłowjekam a institucijam, začuwanje sprawnosće a pomocliwosće wuprajiło. W Drježdźanach, Zhorjelcu a Budyšinje je socialna zwjazanosć hišće snadniša hač w krajnym přerězku.
Sćicha nakupować
Policija (08.12.17)
Dnjowe dochody fuk
Wojerecy. Přez pódlanske durje bě so wčera rano njeznaty do Wojerowskeho hosćenca zadobył. Tam hrabny sej na tejce ležacu móšnju z dnjowymi dochodami a so zaso zhubi. 53lětny mějićel hosćenca trochuje škodu na 760 eurow.
