Policija (06.12.16)
Na lětanišću dźiwinu picowali
Klukš. Na startowej a přizemjenskej čarje Klukšanskeho lětanišća běchu njeznaći minjene tydźenje kukuricu a žito rozsypali. Tak přiwabichu woni dźiwinu, kotraž je tam wulke škody načiniła. Rozborkana čara woznamjenja za startowace a přizemjace lětadła wulki strach. Tohodla přizjewichu tónle pad nětko policiji. Ta přepytuje strašneho wobwliwowanja lětanskeho wobchada dla. Swědcy, kotřiž su snano něšto podhladneho wobkedźbowali, njech přizjewja so pod telefonowym čisłom 03591/ 35 60.
Planuja kulojte wołtarnišćo
Lipšćanski architekturny běrow wubědźowanje wosady dobył
Budyšin (CS/SN). Silvia Schellenberg-Thaut a Sebastian Thaut z Lipšćanskeho běrowa Atelier ST staj dobyłoj wubědźowanje, kotrež bě Budyska ewangelska wosada swj. Pětra za nowowuhotowanje wołtarnišća w ewangelskim dźělu tachantskeje cyrkwje wupisała. Tam staj architektaj wčera swój naćisk předstajiłoj. Kaž farar Christian Tiede rjekny, pak móža předewzaće hakle zwoprawdźić započeć, hdyž budu pišćele ewangelskeho dźěla Božeho domu dosaněrowane. To ma hišće něhdźe lěto trać. Tež wo financowanju přetwara ewangelskeho wołtarnišća móža hakle potom konkretnje rozmyslować. Farar Tiede so nadźija, zo móža po móžnosći prawje wjele darićelow za projekt zahorić. Na jutřišim posedźenju cyrkwinskeho předstejićerstwa budu wo předewzaću hišće raz diskutować. Myslička, wołtarnišćo kulojte wuhotować, bě hižo do toho rozdźělne měnjenja wuwabiła.
Pytaja kupca za „Krónu“
Zo ma so Budyska „Króna“ předać, je wyši měšćanosta po wšěm zdaću wědźał. To jemu měšćanska rada za zło bjerje. Ahrens znapřećiwja, zo zjawna diskusija jenož płaćiznu dowysoka ćěri.
Budyšin (CK/SN). Budyska měšćanska hala Króna ma so předać. „Zo město na njej žadyn zajim nima, njetrjechi.“ Z tymile słowami reagowaše wyši měšćanosta Alexander Ahrens (njestronjan) na zašłym posedźenju měšćanskeje rady na wuprajenje wobsedźerja imobilije. Tón bě po wšěm zdaću zaćišć zbudźił, zo je to zamołwitym w radnicy wšojedne. Tomu pak tak njeje, praji Ahrens. „Za město je to jara zajimawy teren. My so zajimujemy, ale nic za tule płaćiznu“, wón podšmórny.
Swobodni wolerjo podpěruja Hariga
Budyšin (K/SN). Frakcija Swobodnych wolerjow Budyskeho wokrjesneho sejmika w aktualnej debaće wo planowanu rozmołwu krajneho rady Michaela Hariga (CDU) ze zastupnikom prawicarskeje NPD Harigej hladajo na kritiku ze stron Lěwicy a Zelenych rjap skruća. „To so nawodnym politikarjam tuteju stron zdawa, krajnemu radźe směć předpisować, z kim ma rěčeć. Wotpohlad Hariga maja samo za přičinu, wuhnać jeho ze zastojnstwa“, w lisće rěka. „Ignoranca toho pak ničo k rozrisanju problema njepřinošuje. W našej towaršnosći mamy dobre nazhonjenja, přewinyć ćeže z rozmołwami. Z puća sej hić konflikt jeno zesylnja. Je trjeba ze zastupnikom NPD kontrowersnje a wěcownje so rozestajeć.“
Dawid Statnik, zapósłanc Serbskeho wolerskeho zjednoćenstwa a předsyda Domowiny, poziciju frakcije podpěruje: „Demokratija dyrbi to wudźeržeć. Tak mamy składnosć, stronje NPD swoju demokratisku poziciju rozłožić.“
Krótkopowěsće (06.12.16)
Tilich za wotsunjenje
Drježdźany. Sakski ministerski prezident Stanisław Tilich (CDU) je so za to wuprajił, kriminelnych młodostnych požadarjow azyla do jich domizny wróćo pósłać, hdyž su wina na ćežkim njeskutku. Pozadk je pad wumocowaneje a morjeneje studentki w badensko-württembergskim Freiburgu. Njeskutka podhladny je 17lětny ćěkanc z Afghanistana.
PISA: Němska lětsa špatniša
Berlin. Němska je so w mjezynarodnym přirunowanju šulerskich wukonow „Pisa 2015“ pohubjeńšiła, wosta pak w prěnjej třećinje najlěpšich krajow organizacije OECD. 15lětni šulerjo mějachu při najnowšim přepytowanju w přirodowědnych přemjetach a w matematice špatniše wuslědki hač loni. Porno tomu su so w čitanju snadnje polěpšili, kaž dźensa z Berlina zdźělichu.
Wopačna powěsć rozbudźa
Jutře žane rěčne hodźiny
Pančicy-Kukow. Štóž ma přichodne dny něšto w přizjewjenskim zarjedźe zarjadniskeho zwjazka Při Klóšterskej wodźe wobstarać, njech wobkedźbuje, zo tam jutře, 6. decembra, žane rěčne hodźiny njezměja.
Wopyta pěstowarnje
Pančicy-Kukow (SN). Tradicionelnje zapósłanc Sakskeho krajneho sejma Alojs Mikławšk (CDU) dohodowny čas wužiwa, zo by pěstowarnje swojeho regiona wopytał. Tak so wón zdobom za dźěło a angažement kubłarkow dźakuje. Prěnja bě dźensa dopołdnja pěstowarnja w Pančicach-Kukowje w nošerstwje Křesćansko-socialneho kubłanskeho skutka. Tam přepoda wón wobrazowe ramiki z ćěsta, kotrež móža dźěći hodownje wupyšić. Za najkreatiwniši wobraz smědźa dźěći Zelnakec pjekarnju w Pančicach-Kukowje wopytać.
Policija (05.12.16)
Hala so wotpaliła
Wojerecy. Wšo druhe hač měrny druhi adwent mějachu wohnjowi wobornicy wčera nawječor we Wojerecach. W industrijowej kónčinje bě woheń w prózdnej, 15 króć 30 metrow wulkej hali wudyrił. Jako wobornicy přijědźechu, běchu so płomjenja hižo po wšej hali rozpřestrěli. Dokelž twarjenje hižo wuchować njemóžachu, so woni rozsudźichu ju pod kontrolu wotpalić dać. Strach za wobydlerjow při tym žadyn njewobsteješe. Zasadźenych bě dohromady 15 wohnjowobornych jězdźidłow z wjace hač 50 kameradami z Wojerec, Hórnikec a Ćiska. Kelko škody je woheń načinił, njehodźi so hišće rjec. Kriminalna policija za přičinami slědźi. Dźensa bě fachowc wohnjoweje wobory na městnje, zo by za móžnymi slědami pytał.
Serbske blido z hudźbu
Wóń klóštra sej sobu domoj wzać
Pančicy-Kukow (SN/MWj). Nowu a wosebitu swěčku su sobotu prěni raz na dohodownych wikach w klóštrje Marijinej hwězdźe w Pančicach-Kukowje prezentowali. Nastała bě wona w dźěłarnjach za zbrašenych swj. Michała, kaž jeje nawoda Andreas Ošika tójšto zajimcam w klóšterskim wobchodźe rozłoži. Z krótkim nyšporom je farar Tomasz Dawidowski swěčku sobotu požohnował.
Wuchadźišćo noweho produkta bě prašenje, za čim klóšter wonja. Za Andreasa Ošiku, kiž bě tu sam něšto lět ministrant, su to hłownje woruch, drjewo a knihi. A wóń tychle třoch su spytali do wosebiteje swěčki zapřijeć. Kupc dóstanje ju na keramiskim talerju, nastatym w dźěłarni za zbrašenych. Połkulowaty pčolacy wósk tež bjez zapaleneje swěčki zajimawje wonja. Tale wóń so hišće zesylni, hdyž tak mjenowanu čajowu swěčku zaswěćiš. Tole móhło runje nětko spodobny hodowny darik być, kotryž poskićeja w Pančičansko-Kukowskim klóšterskim wobchodźe runje tak kaž w dźěłarnjach za zbrašenych swj. Michała.
Město podpěruje dyrdomdejnišćo
Běła Woda (AK/SN). Ze 17 000 eurami chce město Běła Woda dźěćacy wočerstwjenski centrum Při Brusniku, tak mjenowany KiEZ podpěrać. To je měšćanska rada tele dny jednohłósnje schwaliła. 17 000 eurow pochadźeja z lětušeho dojednanja města z Vattenfallom za wosebite projektowe spěchowanje. Na te wašnje zaručeja za natwar dyrdomdejskeho hrajkanišća swójski podźěl towarstwa, kotrež so wo wočerstwjenišćo stara. Dyrdomdejnišćo płaći dohromady 74 000 eurow. 70 procentow z toho spěchuje Sakska, 30 procentow kóštow zaruna towarstwo jako swójski podźěl.
