Strašne mandariny

Słona Boršć. Wjace hač 23 tonow mandarinow w drjewjanych kašćikach transportowaše nakładne awto, kotrež su sej zastojnicy wobchadneje słužby awtodróhoweho policajskeho rewěra zawčera­wšim na wotpočnišću Hornja Łužica při awtodróze A 4 blisko Słoneje Boršće bliže wobhladali. Kašćiki pod planu tak mjenowaneho­ sedłoweho připowěšaka ze žanymi­ pasami zawěsćene njeběchu a, kaž policija zdźěli, to tež na městnje změnić njemóžachu. Zastojnicy tuž 67lětnemu šoferej dalšu jězbu zakazachu, tak zo dyrbješe transportne přede­wzaće hinaše jězdźidło pósłać, na kotrež kašćiki z woblubowanymi južnymi płodami překładowachu. Šofer nakładneho awta drje dyrbi nětko runje tak pokutu płaćić kaž jeho 44lětny šef, kiž bě jemu słužbny nadawk za jězbu dał.

Tójšto dopisow z prawym wuhódanjom hodowneje křižowki Serbskich Nowin „Wupyšeny hodowny štom“ smy minjene dny do redakcije dóstali. Fortuna je slědowacych dobyćerjow wulosowała: Na zastupnej lisćikaj za premjeru noweje inscenacije Němsko-Serbskeho ludoweho dźiwadła „Za brězami“ 11. měrca na hłownym jewišću smě so Jadwiga Dyrlichowa z Chrósćic wjeselić. W Ludowym nakładnistwje Domowina wušłu knihu „Warić z Tomašom“ přewostajimy Sylwiji Čornakec z Miłoćic. A darmotnje do Budyskeho kina hić smědźa Celina Knopec z Kozarc, Sonja Krječmarjowa z Budyšina a Bosćij Ješka z Chelna. Myta přichodne dny připósćelemy.

Hamorska gmejna podpěruje wohnjowych wobornikow w Rychwałdźe

Hamor (AK/SN). W Rychwałdskej wohnjowobornej gratowni chce Hamorska gmejna třěšny poschod na wukubłansku rumnosć wutwarić. „Tak spjelnimy wjelelětne přeće wohnjowych wobornikow. Smy wo naležnosći hižo wjacore razy diskutowali“, podšmórny nawodnica twarskeho zarjada Cortina Kokles na zašłym posedźenju Hamorskeje gmejnskeje rady. Naprawu za rekonstrukciju gratownje su radźićeljo jednohłósnje wobzamknyli. Projekt płaći dohromady 40 000 eurow. Štwórćinu toho zaruna gmejna, tamne 75 procentow su spěchowanske srědki swobodneho stata, kotrež přewostaja po wohnjowobornych směrnicach sakskeho nutřkowneho ministerstwa.

Budyšin (CS/SN). Lěpše wuměnjenja sobudźěłaćerjam a wopytowarjam skići nowy běrow Budyskich měšćanskich wodźerjow, zaměstnjeny nětko w rumnosćach něhdyšeho frizerskeho salona na Mja­sowych wikach. Dotal bě wón w susodnej Žonopowej manufakturje a muzeju, hdźež pak běchu rumnosće jara wuske.

W nowym domicilu mataj Manfred Lüdtke a Kathrin Kunth swoje pisanske blido. Wonaj domoródnych runje tak kaž turistow wěcywustojnje poradźujetaj. Nimo wodźenjow po Budyšinje, a to k wšelakim temam, poskićataj a posrědkujetaj zajimcam tež wulětne pokiwy za blišu­ wokolinu přez cyły hornjołužiski region hač do Błótow. Wotpowědnu nowu brošurku dóstanu Budyšenjo a hosćo mjez druhim w turistiskej informaciji při radnicy. W terminowej a wobsahowej přehladce mjez druhim steji, zo poručeja lětsa dalše měšćanske wodźenje. Pod hesłom „woborne město“ steja twjerdźizny w srjedźišću kaž tohorunja twarske stawizny města nad Sprjewju.