Złotaki a slěbornaki fuk

Wojerecy. We wobłuku měnjenskeje bursy pjenjez stej njeznatej wosobje sobotu dopołdnja we Wojerowskej Łužiskej hali čerwjeny tablet z dohromady dwanaće drohotnymi pjenjezami pokradnyłoj. Při tym jedna so wo štyri złotaki a wosom slěbornakow. Jich cyłkownu hódnotu trochuja na 20 000 eurow. Jedyn ze skućićelow zapleće wobsedźerja pjenjez do rozmołwy, mjeztym je sej dalša wosoba tablet wzała a so z nim wotsaliła.

Smjertnje zbjezbožiła

Hory. Při wobchadnym njezbožu na dróze z Noweje Łuki do Ptačec je sobotu wječor 51lětna žona žiwjenje přisadźiła. Z dotal njeznateje přičiny zajědźe wona ze swojim Mercedesom w prawej křiwicy na lěwy bok dróhi a prasny do dweju štomow. Při sylnej zražce zleća žona z awta a hišće na městnje njezboža zemrě.

Chrósćicy. Za XII. mjezynarodny folklorny festiwal „Łužica 2017“ je so dźensa předpředań zastupnych lisćikow zapo­čała. Kartki poskićeja Budyska Serbska kulturna informacija, Chróšćanski časnikar Jürgen Njek a Ralbičanska kwětkarnja „Kostrjanc“. Kombilisćik za zarjadowanja sobotu, 24. junija, a njedźelu, 25. junija, w Chrósćicach płaći za dorosćenych w předpředani 13 eurow, při wječornej kasy 18 eurow, potuńšene lisćiki za šulerjow, studentow a zbrašenych w předpředani pjeć a při wječornej kasy šěsć eurow. Za swjedźenske zahajenje z galaprogramom štwórtk, 22. junija, w 19.30 hodź. na Budyskim hrodźe předawa Němsko-Serbske ludowe dźiwadło. Tele lisćiki płaća za dorosćenych w předpředani wosom, při wječornej kasy dwanaće eurow, potuńšene pjeć resp. dźewjeć eurow. Štóž chce swójbny lisćik kupić, ma swójbny pas předpołožić.

Na mejemjetanju Worklečanskeju šulow wjedro klubu činiło

Worklecy (BW/SN). Wo lětušim mejemjetanju Worklečanskeje zakładneje a wyšeje šule „Michał Hórnik“ drje budu na kubłanišćomaj hišće dołho rěčeć. Nic dokelž bě snano wosebje wjele porow abo zo su sej něšto noweho wumyslili, ale dokelž tónraz wjedro mócnje klubu činješe, čehoždla bě wjele improwizaciskeho wuměłstwa trěbne.

Při Hamorskim pobrjohu Bjerwałd­skeho jězora su wčera nowy hosćenc wotewrěli. Zdobom předstajichu tam plany za dalše předewzaća, kotrež přichodny­ čas planuja.

Hamor (JoS/SN). Při Bjerwałdskim jězoru so tójšto hiba. Tole bě wuslědk wčerawšeje nowinarskeje rozmołwy z Arminom Hoffmannom, jednaćelom firmy Hotelowy a dožiwjenski park Hornja Łužica tzwr, a z Hamorskim wjesnjanostu Achimom Junkerom (CDU). „Z nowym inwestorom smy dobreho partnera našli“, chwaleše wjesnjanosta. Wčerawše wotewrjenje noweho hosćenca „Kombüse“ je jenož jedne z wjetšich předewzaćow. Hač do klětušeho nalěća ma dalši hosćenc nastać. Dale ma wot měrca 2018 pasažěrska łódź po jězoru jězdźić. Nimo toho stej jězorowy hotel a prózdninske sydlišćo planowanej. Zaměr je, Bjerwałdski jězor tak wutwarić, zo je wón we wokruhu 140 kilometrow za wulětnikarjow jedna z prěnich adresow, kotrež móžeš za hodźinu z awtom docpěć. „Hač do lěta 2022 stanje so Bjerwałdski jězor z naj­woblubowanišim lětnim wulětnišćom Sakskeje“, je Armin Hoffmann přeswědčeny.