Přesadźuja swinje
Přez hrjebju pomocny móst stajili
Koblicy (AK/SN). Z wulkim kranom a z podpěru mnohich čestnohamtskich pomocnikow techniskeho pomocneho skutka su minjenu sobotu w Koblicach 15 metrow dołhi a tři metry šěroki pomocny móst přez tak mjenowanu Kobličansku hrjebju stajili. „Wón je nuznje trěbny, zo móžemy dalše saněrowanske naprawy při wuchodnym dźělu Hórnikečanskeho jězora přihotować“, rozłoži Jens Kieschnick, wěcywobdźěłar za hórnistwo Łazowskeje gmejny a Kobličanski wjesny předstejićer.
Stary móst nad hrjebju pochadźa z lěta 1956 a je wusłuženy. Na kóncu smědźachu jón jenož hišće z wahu hač do třoch tonow poćežować. Nowy móst hač do dźesać razow telko wudźerži. Po nim pojědu na přikład nakładne awta, kotrež podrězane štomy abo zbytki wottorhanych twarjenjow transportuja. Dalše přiwjezu twaršćizny za prowizoriske puće k saněrowanskim městnam.
Pomocny móst přez Kobličansku hrjebju bě najjednoriša warianta. Hewak bychu dospołnje nowy móst natwarić dyrbjeli, štož njeby jenož wjele dróše było, ale by předewšěm tež dlěje trało.
Dźěćom dźiwadło hrali
Ylvi, małka holca z Flake, bu rubjena. Wikingojo hnydom wědźachu, štó za tym tči: „hrozny Sven“. Wón je najwjetši njepřećel wikingow. Jemu hodźi so wšitko přicpěwać. Halvar da přikaz, płachty čołma nastajeć a so z połnej paru do spěcha dać, prjedy hač so holčce Ylvi něšto stanje. Wiki, najmłódši wobydler z Flake a syn nawjedowarja wikingow, kradnje so na wulki čołm najebać zakaz nana, zo by sobu pomhał swoju najlěpšu přećelku wuswobodźić.
Hač su wikingojo swojich přećiwnikow hišće w prawym času přemóhli, móžeše minjeny tydźeń nimale 300 pěstowarskich a hortowych dźěći z Budyskeho wokrjesa dožiwić. Tole zmóžni jim 21 šulerjow a šulerkow rjadownje S15v Budyskeje Serbskeje fachoweje šule za socialnu pedagogiku, kotřiž/kotrež so na statnje připóznateho kubłarja/připóznatu kubłarku wukubłuja. Woni su tuchwilu w druhim wukubłanskim lěće.
Sprjewine město bjez dołha
Ze solidnym hospodarskim planom póńdźe město Budyšin do noweho lěta. Najebać přihłosowanje wšitkich měšćanskich radźićelow pak jewi so tež kritika, dokelž čuja so woni přemało zapřijeći.
Budyšin (CK/SN). Z přiražku wosom milionow eurow podpěruje město Budyšin w lěće 2017 dźěło swobodnych nošerjow pěstowarnjow a dnjowych maćerjow. To je 679 000 eurow wjace hač lětsa. Dohromady změje sprjewine město w hospodarskim planje klětu 15,5 milionow eurow za hladanje dźěći zaplanowane. Za 7,9 milionow eurow chcedźa puće ponowić, škit před wulkej wodu polěpšić, Fichtowu šulu modernizować a gratownju za Delnjokinjansku wohnjowu woboru twarić. Z 926 000 eurami spěchuja Němsko-Serbske ludowe dźiwadło a 207 000 eurow wudadźa za Kamjentny dom a jeho dźěćace a młodźinske dźěło. To su někotre ličby z 826 stron wopřijaceho hospodarskeho plana 2017. Kaž wočakowane su jón měšćanscy radźićeljo na swojim poslednim posedźenju lěta 2016 jednohłósnje schwalili.
Husyca hłowne myto była
Radwor (BHR/SN). Team Radworskeho hosćenca „Meja“ pod nawodom mějićelki Katleń Wawrikoweje je dźeń do štwórteho adwenta prěnje dohodowne wiki chłóšćenkow zarjadował. Bjezposrědnje po zakónčenju žiweho adwentneho woknješka při gmejnskim křižu na nawsy zetkachu so starši, dźěći a nahladna ličba wjesnjanow před hosćencom. A poskitkow bě tam dosć, za kóždeho něšto.
Tež lětsa překwapichu čłonojo młodźinskeho kluba Konjecy/Šunow ...
Policija (19.12.16)
Hudźby dla so storkali
Budyšin. K rozestajenju mjez šěsć młodymi ćěkancami a runje telko domoródnymi je sobotu wječor na Budyskich Wjacławskich wikach dóšło. Přičina najskerje bě, zo měješe jedyn z migrantow hudźbu z handyja wótře nastajeju. Po werbalnym rozestajenju młodostni do so storkachu. Ćěkancy so na to wotsalichu.
Mjenje je druhdy wjace
Do rjadu lětušich dohodownych koncertow zarjadowa so tež wčerawši beneficny w Chróšćanskej wosadnej cyrkwi. W derje pjelnjenym Božim domje dožiwichu wosadni a zajimcy wotměnjawy poskitk adwentnych serbskich kěrlušow a młodźinskich spěwow.
Chrósćicy (JK/SN). Spěwy a hudźbne kruchi młodostnych dekanata zarjadowachu so derje do nyšpora, kotryž je z wěriwymi farar Daniel Dziekiewicz swjećił. W běhu nyšpora jimaše so Christina Pólkec słowa a rozłoži přitomnym zaměr beneficneho zarjadowanja. Dokelž bě hižo w lětomaj 2012 a 2013 dlěši čas w Malawiju dźěłała, znaje wona tamniše poměry a konkretnu potrjebu. Po lětsa zakónčenym wukubłanja na babu poda so młodostna z Kulowca w januaru do misionskeje chorownje „St. Gabriel’s Hospital“ w Namitete, něhdźe 60 kilometrow wot stolicy Lilongwe zdaleneje, hdźež budźe wosom tydźenjow na porodowej staciji pomhać.
W zajimje kulturneje mnohotnosće
Budyski wokrjes ma jako prěni Sakskeje směrnicy kulturneho spěchowanja. Wokrjesny sejmik je dźens tydźenja předłohu schwalił, kotraž rjaduje přizwolenje srědkow z hornca etata wokrjesa a płaći wot 1. januara 2017.
Budyšin (SN/at). Potrjebje za kulturne spěchowanje w Budyskim wokrjesu njemóže kulturny konwent Hornja Łužica-Delnja Šleska často wotpowědować. To zaleži na tym, zo zapodate próstwy jeho spěchowanskim narokam njewotpowěduja abo zo prosće pjenjezy njedosahaja. Budyskemu wokrjesnemu zarjadnistwu pak je wažne, aktiwity towarstwow a dalšich cyłkow financielnje podpěrać. Wšako jich skutkowanje k tomu přinošuje młodostnym abo socialnje słabšim zmysłapołnu wólnočasnu zaběru zmóžnić. Hižo w septembrje wobzamknychu wokrjesni radźićeljo, podpěru kulturnych aktiwitow wot 24 000 na 100 000 eurow zwyšić.
Krótkopowěsće (19.12.16)
Přećiwo hidźe demonstrowali
Drježdźany. Wjace hač tysac ludźi je wčera w Drježdźanskim Zwingeru přećiwo hidźe na wukrajnikow demonstrowało. Při tym zasadźeše so sakska kultusowa ministerka Brunhild Kurth (CDU) za česćowny wobchad z wukrajnymi sobuwobydlerjemi najebać rěčne mjezy. Tež Drježdźanski wyši měšćanosta Dirk Hilbert (FDP) so wobdźěli.
Twarja nowy elektriski Golf
Drježdźany. W škleńčanej manufakturje awtotwarca Volkswagen w Drježdźanach přihotuja tuchwilu twar noweho elektriskeho Golfa. Spočatk januara maja so produkciske wotběhi pruwować, kaž rěčnik VW dźensa zdźěli. W aprylu potom chcedźa prěnje wozy předać. Spočatnje ma tam wšědnje 35 awtow nastać. Za to maja 300 sobudźěłaćerjow.
Brošurka rozebrana
Drježdźany. Wot sakskeho krajneho knježerstwa wudata brošurka z artiklemi wustawy w arabšćinje je nimale rozebrana. Wot prěnjeho nakłada 15 000 eksemplarow maja runje hišće tysac, informuje socialne ministerstwo w Drježdźanach. Brošurka za požadarjow azyla wobsahuje prěnje 20 artiklow Zakładneho zakonja w němčinje a arabšćinje.
