Kulow (UH/SN). Rjane dožiwjenje za lubowarjow partyjow bě minjeny kónc tydźenja dwudnjowski festiwal při Kulowskim měšćanskim haće, kotryž je třěšny zwjazk Kulowskich młodźinskich klubow organizował. „Naš klub, wobstejacy ze zastupjerjow wšelakich młodźinskich skupin města, takrjec namjety za wólnočasnu zaběru koordinuje. Po tym su wězo pilni pomocnicy při zwoprawdźenju idejow trěbni“, rozłoži Filip Koplanski, kiž je po­ Symanje Michałku wot lońšeho nowembra­ předsyda kluba.

Dźakowano dobremu zhromadnemu dźěłu, ale tež dźakowano wulkomyslnej podpěrje regionalnych firmow jako sponsorow móžachu lětuši štwórty festiwal trochu wulkomyslnišo planować. Tak njejsu sej jeno serbsku hudźbnu kapału Logarhythmus přeprosyli, ale su tež nadregionalnje­ znate formacije přeswědčić móhli so w Kulowje předstajić. Mjeztym zo zličichu minjene lěta na wobě­maj wječoromaj­ dohromady něhdźe 700 wopytowarjow, chcychu lětsa hranicu tysac hosći překročić, štož so na kóncu tež poradźi­, kaž Filip Koplanski wobkrući.

Awto połne narunankow

Zhorjelc. Na awtodróze A 4 pola Zhorjelca su policisća w nocy na njedźelu 39lětneho muža zajeli, kiž chcyše po wšěm zdaću pokradnjene dźěle awtow do Pólskeje dowjezć. W jeho transporteru typa Mercedes Vito namakachu zastojnicy wjacore kašćiki z najwšelakorišimi naru­nankami. Mjez druhim běchu to wodźi­dła, airbagi, armaturowe tafle a nawi­gaciske nastroje. Wone pochadźachu ze znajmjeńša 30 wosobowych awtow BMW, VW a Mercedes a mějachu hód­notu wjacorych dźesaćitysacow eurow.

Hamorska gmejna dale w ćežkim hospodarskim połoženju

Hamor (AK/SN). Z ćežkim hospodarskim połoženjom gmejny Hamor su so wčera jeje radźićeljo zaběrali. Zo móhli hospodarski plan 2016 zawěsćić, bjerje komuna lětsa sydom milionow eurow kasoweho kredita. „Dotal smy dwaj milionaj eurow přetrjebali, zo móhli wšitke nadawki zmištrować“, podšmórny komornica Stefanie Arndt na posedźenju radźićelow. Kasowy kredit zaruči kmanosć płaćenja gmejny. Hamor dyrbi lětsa energijowemu koncernej Vattenfall 10,3 miliony eurow přemysłoweho dawka wróćić. Naje­bać prekerne połoženje Hamorska gmejna lětsa někotre wažne přede­wzaća zwoprawdźi. Tak přizamknu w Delnim Wujězdźe dalše domjacnosće wopłóčkowej syći a staraja so wo dalše turistiske wu­wiće Bjerwałdskeho jězora. Hamorske šulske twarjenje budźe energetisce saněrowane.

Šulske stawizny Radworja sahaja hač do srjedź 16. lětstotka, jako mějachu tam drje jednu z prěnich wjesnych šulow w serbskej kónčinje. Jako prěni wučer mjenuje so Valentin Jorlla, kiž skutko­waše w Radworju hač do 1597 nimale połsta lět. Hač do lěta 1632 slědowaše Valentin Nachtengall. Kubłanišćo steješe w tym času blisko stareje cyrkwje.