Spodobna hodźina rozpominanja
Baćoń (aha/SN). Jako staj na kóncu lěta 2004 Uwe Macka a jeho mandźelska Marija prěni raz w Baćońskej wosadnej cyrkwi wuhotowałoj swjatočny meditatiwny koncert, bě to wopytowarjam z nimale wšitkich wosadow wokřewjace dožiwjenje. Tehdy poradźeny pospyt je so mjeztym z dobrej tradiciju stał. Tak móžeše sobotu na poslednim dnju lěta 2016 Baćoński farar Gerat Wornar w połnej wobsadźenej cyrkwi witać zajimcow na 13. rozpominanski nyšpor na proze do noweho lěta. Wo hudźbne poskitki postara so tónraz swójba Klemensa Čórlicha z Kulowa.
Pod nawodom 19lětneho Lukasa Čórlicha zanjesechu jeho nan Klemens a sotře, 17lětna Thea a 15lětna Greta, z wuměłskej dokonjanosću „Přadła je Marja kudźałku“, „Kral w žłobiku“ a dalše twórby. Na prěčnymaj pišćałkomaj zahorištej Thea a Greta z „Andantinom espressivo“ Benoita Tranquillea Berbiguiera runje tak kaž Lukas na pišćelach z „Ave Maria“ Jana Pawoła Nagela. K rozmyslowanju pohnuwachu přitomnych w Božim domje modlitwa wo radosć kaž tež próstwy, poćahowace so na aktualnu swětowu situaciju. Přednjesłoj stej je Franciska Hojerowa a Klawdija Hejdušcyna.
Policija (02.01.17)
Tragedija spočatk lěta
Ottendorf-Okrilla. Při wobchadnym njezbožu na awtodróze A 4 je wčera muž žiwjenje přisadźił. Blisko Ottendorfa-Okrille bě něhdźe w 21.15 hodź. wodźer VW Passata z dotal njeznateje přičiny wotzady do Peugeota zajěł. Wobě jězdźidle jědźeštej najprjedy nalěwo a po tym naprawo, hdźež so Peugeot zwróći. Jeho 28lětna wodźerka so ćežko zrani, jeje sobujěducy pak hišće na městnje njezboža zemrě.
Policiju 161 razow wołali
Zhorjelc. Wot silwestra we 18 hodź. hač do Noweho lěta w 6 hodź. su w Budyskim a Zhorjelskim wokrjesu 161 razow policiju wołali. Zwjetša dyrbjachu rozestajenja mjez swójbnymi a znatymi złahodźić, 17 razow jednaše so wo wobškodźenje wěcow, 13 razow wo zranjenje ćěła a 20 razow wo mjeńši woheń.
Emma a Karl faworitaj
Budyšin (SN). Wjace dźěći a mjenje wěrowanjow, to je – krótkoprajene – statistiska bilanca Budyskeho stawnistwa minjeneho lěta. Tak su tam 899 porodow registrowali. To je 148 wjace hač lěto do toho, jako bě so 751 holcow a hólcow narodźiło. Wosebje woblubowane běchu w lěće 2016 holče předmjena Emma (13), Sophie (12) kaž tež Marie a Mia (11). Pola hólcow nawjeduja lisćinu mjenow Karl (13), Leon (11) kaž tež Jonas a Oskar (10).
Na stawnistwje w sukelnicy, we Weigangowej wili a na Hušćanskim hrodźe su Budyscy stawnicy loni dohromady 210 mandźelstwow a jedne žiwjenske partnerstwo zwěrowali. Je to tróšku mjenje hač lěto do toho, jako běchu hišće 236 wěrowanjow zličili. Najwoblubowaniši dźeń za kwas bě 16. junij 2016, na kotrymž je so wosom porikow zwěrować dało. To wuskutkowa so tež na statistiku, wšako bě junij ze 37 zmandźelenjemi najsylniši měsac, slěduje september z 29. Hač do 28. decembra registrowaše stawnistwo 903 smjertne pady.
Krótkopowěsće (02.01.17)
Prěni sněh so našoł
Lipsk. W Sakskej, Saksko-Anhaltskej a Durinskej je so minjenu nóc prěni sněh tuteje zymy našoł. Po informacijach Němskeje wjedrarnje bě so wokoło 3 hodź. sněžić započało. Sněh drje nas přichodne dny dale přewodźa. Temperaturow wokoło nule dla hroža wječor a w nocy hładke dróhi, wjedrarjo warnja.
Norowirus w Sakskej
Drježdźany. Sakska je kónc lěta žołmu schorjenjow na norowirus dožiwiła. Jeničce wot kónca nowembra hač do srjedź decembra registrowachu 1 100 nowych schorjenjow, Roberta Kochowy institut zdźěli. Loni w samsnym času mějachu porno tomu 590 padow. Natykliwy wirus, zawinowacy ćežku židlawu a bluwanje, wohroža předewšěm dźěći a starych ludźi.
Češa a Słowacy hromadźe
Praha/Bratislava. Posledni dźeń lěta 2016 zetkachu so wospjet Češa a Słowacy na namjeznej horje Velká Javořina/Veľká Javorina w Běłych Karpatach. Tule tradiciju zhromadnosće a symbolisce dale začuwaneje wzajomosće haja hižo wot dźělenja Čěskosłowakskeje 1993. Z něhdźe 5 000 ludźimi mějachu tónraz rekordne wobdźělenje.
Předsyda Sokoła přestanje
Policija (30.12.16)
Z praskotakami škodu načinili
Wojerecy. Byrnjež silwesterske praskotaki a rakety hakle jutře a njedźelu dowolene byli, worakawcy z tym po wšěm zdaću zaso raz čakać njemóža. Zawčerawšim wječor su njeznaći we Wojerecach w bydlenskim domje na Budyskej aleji praskotaki zapalili a je zdźěla do listowych kašćikow mjetali. Te so při tym runje tak skóncowachu kaž posłužowanska tafla lifta w samsnym domje. Wěcnu škodu trochuje policija na 400 eurow.
Swjedźenjowali a inwestowali
Tež w Kulowje nachila so na podawki bohate a intensiwne lěto
Kulow (AK/SN). Lětuši 15. Krabatowy swjedźeń srjedź awgusta w Kulowje bě jasne wuznaće k serbskim korjenjam a k dwurěčnosći. Tole podšmórnje měšćanosta Markus Posch (CDU) w swojim zhladowanju na lěto 2016. Serbske chóry, rejwanske skupiny a towarstwa běchu zapřijate. Dźěći Krabatoweje zakładneje šule su serbski kwasny ćah předstajili. Tež pućniki na swjedźenišću, moderacija programow, stawizniske přednoški a regionalna konferenca skedźbnjachu na serbske korjenje regiona. „Wažny impuls za mnje bě, zo měli spěchowanske móžnosće přichodnje mnohostronsce wužiwać a so jako region zhromadnišo prezentować“, w zhladowanju dale rěka.
Dźěćom hodowne přeća spjelnili
Tole móže přikład być
Krótkopowěsće (30.12.16)
Tilich za lěpše mjeno Sakskeje
Drježdźany. Sakski ministerski prezident Stanisław Tilich (CDU) so nadźija, zo swobodny stat po namócnosćach přećiwo wukrajnikam a prawicarskich krawalach swoje mjeno poněčim zaso polěpši. Dopóznaće, zo bě „wohidna mjeńšina“ dobre mjeno kraja do błóta steptała, je jemu „hórke dopóznaće lěta 2016“, rjekny Tilich powěsćerni dpa.
Nadźijeja so polěpšenja
Drježdźany. Plahowarjo dejkow so nadźijeja, zo so połoženje na mlokowych wikach klětu polěpši. „2016 bě plahowarjam dejkow najćeše lěto po přewróće“, praješe hłowny jednaćel krajneho zwjazka ratarjow, Manfred Uhlemann nowinarjam. Mnohe zawody běchu w swojej eksistency wohrožene, dokelž „je mlokowa kriza njewšědnje dołho trała“.
Wosada za hłuchich
Krótkopowěsće (29.12.16)
Tójšto dźiwiny třělili
Dubrjenk. Hońtwjerske drustwo Dubrjenk přewjedźe wčera pod nawodom dr. Pětra Brězana ze Sulšec pola Kulowa – wotnajerja tamnišich lěsow – 26. hońtwu mjez hodami a Nowym lětom. Wobdźěliło je so 44 honjerjow a 42 hońtwjerjow, telko kaž hišće ženje do toho. Tež ličbu třělenych kruchow dźiwiny njejsu minjene 25 lět w Dubrjenku hišće měli. Wčera ležachu tam dwě jelenicy, dwanaće dźiwich swini a jedna liška.
Škitne naprawy dale polěpšić
Drježdźany. Sakska je lětsa 178 milionow eurow za škitne naprawy přećiwo wulkej wodźe nałožiła. Wudali su pjenjezy za twarske objekty w srjedźnej Sakskej a Rudnych horinach, kaž minister za wobswět Thomas Schmidt (CDU) zdźěli. Klětu planuja runje telko spěchowanskich srědkow. Potom chcedźa mjez druhim nasypy podłu rěki Čorneho Halštrowa ponowić.
Něšto mjenje nadpadow
Wiesbaden. Ličba nadpadow na domy požadarjow azyla je lětsa snadnje woteběrała. Kaž Zwjazkowy kriminalny zarjad informuje, su hač do 27. decembra 921 njeskutkow zličili. Loni bě jich 1 031. We 867 padach je policija prawicarskoekstremistiski pozadk zwěsćiła.
