Muske spěwne towarstwo Hornja Hórka je njedawno na swój tradicionalny dworowy koncert do tamnišeje sportownje přeprosyło. Koncert wuhotowachu 18 muži, spěwna skupinka młodostnych kaž tež 32 dźěći šulskeho chóra Hor­njohórčanskeje zakładneje šule. Nimale 160 zajimcow je přichwatało.

Koncert zahaji muski chór z hymnu na Hornju Hórku a ze znatymi domizniskimi spěwami, ale tež z dwěmaj nowymaj pěsnjomaj. Kaž hižo wjele lět přewodźeše jich Jan Chlebníček na keyboardźe. Moderaciju ze zdźěla rymowacymi so stawizničkami běše dirigentka Marika Matthes-Hartmann přewzała. Dźěćacy chór pod nawodom hudźbneho wučerja Michaela Klöppela předstaji wjele lubjacy program. Tež tón so publikumej jara spodobaše. Slědowaše rjad spěwow šěsć młodostnych, kotřiž nimale wšitcy na instrumenće hraja. Swoje spěwy woni přednjesechu w jendźelskej rěči, jedyn tež w francoskej.

Pěška ćežko zranjena

Běła Woda. Dwě rentnarce běštej zawčerawšim na wobchadnym njezbožu w Běłej Wodźe wobdźělenej. 80lětna wodźerka Toyoty chcyše na křižowanišću nalěwo wotbočić, njewobkedźbowaše pak, zo tam runje 76lětna žona při ampli za pěškow puć přeprěči, a zrazy do njeje. Pěška­ so při tym ćežko zrani. Ju dyr­bjachu runje tak do chorownje dowjezć kaž 80lětnu, kotraž poćerpje šok. Škoda na awće wučinja tysac eurow.

Architekturne wubědźowanje njeje bjez wobmyslenjow

Róžant (JK/SN). Gmejnscy radźićeljo Ralbic-Róžanta wobzamknychu na swojim minjenym posedźenju, zahajić prócowanja wo twar noweje pěstowarnje. Tučasne wuměnjenja a kapacita w Ralbicach a Smjerdźacej žadanjam a přiběracej ličbje­ dźěći hižo njewotpowěduja. Kak chutna situacija je, podšmórny wulki angažement­ młodych maćerjow, kotrež su na wuradźowanju gmejnskeje rady hišće raz potwjerdźili z gmejnu zaměrnje wo nowotwarje jednać.

Gmejna pak tuchwilu pjenježnje kmana njeje, wužadacy nadawk zwoprawdźić. Nowotwar pěstowarnje by, wobkedźbujo aktualne žadanja a twarske wuměnjenja, něhdźe 2,5 milionow eurow płaćił. Podpěra ze stron stata njeje wotwidźeć. Kaž wjesnjanosta Hubertus Ryćer (CDU) radźićelam zdźěli, ma swobodny stat tučasnje lětnje jenož 1,1 milion eurow za twar pěstowarnjow po wšej Sakskej předwidźany. W Drježdźanach předleži hižo 46 próstwow wo podpěru při nowotwarje pěstowarnjow.

Přirada za serbske naležnosće města Wojerec so dale za to zasadźa, zo by serbšćina w zjawnosći prezentna była. W tymle zmysle su nětko wočiwidny krok dale přišli.

Wojerecy (AK/SN). Po nastorku přirady za serbske naležbnosće města Wojerec ma Jana Arnošta Smolerjowa dróha wot zawčerawšeho dwurěčne pomjenowanje. Manfred Robel a Maik Sachon z firmy Feindura staj nadróžnu tafličku w přitomnosći sobudźěłaćerjow měšćanskeho zarjadnistwa připrawiłoj. Přidatna taflička skedźbnja na serbskeho prócowarja Jana Arnošta Smolerja (1816–1884). „Dokelž ma wón wulke zasłužby jako wuwiwar a spěchowar serbskeje rěče, smy přidatnu tafličku jeno serbsce popisać dali“, podšmórny referent Domowiny a zastupowacy předsyda Wojerowskeje serbskeje přirady Werner Sroka. W krótkej narěči hódnoćeše wón Smolerja jako mnohostronsku wosobinu a jako budźerja serbskeho narodneho wědomja. „Jako Serbja so wjeselimy, zo je město Wojerecy po nim dróhu pomjenowało a so nětko tež wo dwurěčne wuhotowanje nadróžneje tafle postarało.“