Policija (30.11.16)
Awtowe kolesa w mobilu našli
Přiwčicy. Dobry čuch měješe póndźelu wječor zhromadna skupina sakskeje a zwjazkoweje policije, jako kontrolowaše na awtodróhowym parkowanišću při A 4 blisko Přiwćic w Litawskej přizjewjeny bydlenski mobil. W nim namakachu dohromady 60 zdźěla nowe kompletne awtowe kolesa w hódnoće něhdźe 20 000 eurow. Z camperom jěducaj mužej w starobje 33 a 42 lět njemóžeštaj rjec, zwotkel kolesa mataj. Po wšěm zdaću běštaj je něhdźe pokradnyłoj. Kriminalna policija pad nětko přepytuje.
Wjace swobodnych městnow
Nowe dźěło sposrědkować traje zdźěla dlěje hač štwórć lěta
Budyšin (CK/SN). Sobudźěłaćerjo Budyskeje agentury za dźěło móža tuchwilu 3 766 swobodnych městnow z winowatostnym socialnym zawěsćenjom poskićeć. To su 21,3 procenty wjace hač loni w tym času. Lěta 2014 bě jich samo jenož 1 920 poskitkow. Wulka ličba swobodnych dźěłowych městnow wotbłyšćuje pozitiwne wuwiće na dźěłowych wikach, rjekny dźensa Ilona Winge-Paul z nawodnistwa dźěłoweje agentury. Najwjace dźěłowych městnow poskićichu w nowembru předewzaća za hospodarske posłužby, z předźěłaceho přemysła, ze strowotnistwa a wikowanja.
Metalowe hrajki wuwabjeja zajim
Njeswačidło (ML/SN). Metalotwarske kašćiki, modele parnicow a parnicowych lokomotiwow kaž tež wšelake dalše metalowe hrajki, zwjetša z časa NDR, móža sej wopytowarjo w hodownej wustajeńcy Njeswačanskeho domizniskeho muzeja wobhladać. Budyski zběraćel tajkich hrajkow Matthias Stein kaž tež bratraj Tom a Ronny Kutschke ze Šešowa, mějićelej wobchoda a porjedźernje kolesow a motorskich, su eksponaty za přehladku přewostajili. Wona wuwabja čiły zajim dźěći, ale tež druhich wopytowarjow.
Nowy kružny wobchad na Budyskej Schliebenowej nabywa poněčim ...
Policija (29.11.16)
Praskotaki na awto mjetali
Budyšin. Harowali a při tym tež hišće wosobowe awto wobškodźili su młodźi ludźo w nocy na njedźelu w Budyskej Strowotnej studni. Na Nagelowej mjetachu woni silwesterske praskotaki na VW Passat. Škoda na awće wučinja 2 000 eurow, kaž je to wobsedźer wobličił. Při prěnim přepytowanju wuslědźi policija třoch podhladnych muži w starobje 21, 22 a 29 lět. W bydlenju 29lětneho namakachu zastojnicy 315 praskotakow, kotrež njeběchu z wěstotnej značku BAM woznamjenjene, a sćazachu je.
Zwón ma dale zwonić
Wjesna rada chce w Konječanskej kapałce nowu techniku připrawić
Konjecy (aha/SN). Wjesna rada Šunow-Konjecy je wšěch wobydlerjow na swoje wčerawše posedźenje do Konječanskeho towarstwoweho domu „Delany“ přeprosyła. Mjeztym dwě lěće wukonja Frank Šołta zamołwitu funkciju wjesneho předstejićerja. Po jeho słowach maja tam wjacore chutne naležnosće rozrisać, a to nanajspěšnišo.
Tak chcedźa zaručić, zo zwón na Konječanskej kapałce tež přichodnje trójce wob dźeń zwoni – rano w šesćich, připołdnju w dwanaćich a wječor w šesćich. Regina Šołćina na to skedźbni, zo čini so to wot lěta 1894, jako bu kapałka w nowogotiskim stilu ze swojim 20 kilogramow ćežkim zwonom wot biskopa Ludwiga Wahla poswjećena. Twar płaćeše tehdy něšto wjace hač 4 000 hriwnow. Swoju pod pomnikoškitom stejacu drohoćinku sej Konječenjo přewšo waža.
Hdźež dźěło wozboža
Jónu wob lěto ma zjawnosć składnosć, sej w Pančicach-Kukowje dźěłarnje swjateho Michała wobhladać. Wosebje w najnowšim času tam stajnje něšto noweho nazhonješ.
Pančicy-Kukow (JK/SN). Dźěłarnja swjateho Michała w Pančicach-Kukowje bě minjeny pjatk swoje wrota zajimcam zaso šěroko wotewrěła. Hosćo dźěłarnje sej najwšelakoriše zaběry zbrašenych wobhladachu a běchu sej po tym přezjedni, zo stej dźěło a kreatiwne tworjenje jara dobra móžnosć, zbrašenych zapřijeć do wužitneho skutkowanja. Widźomne a čujomne wjeselo a hordosć zaběranych zbrašenych stej wuraz wuspěšneje integracije a posrědkuja začuće, zo su zbrašeni na swoje wašnje zbožowni.
Wša česć!
Krótkopowěsće (29.11.16)
Škarakaj do jastwa
Budyšin. K jastwu dweju a poł lěta resp. třoch lět je Budyske hamtske sudnistwio wčera młodeju muži w starobje 21 lět zasudźiło. Wonaj běštaj w februaru při wohenju w bywšim hotelu „Husarenhof“ dźěło wohnjowych wobornikow myliłoj a so přikazam policije spřećiwjałoj. Do chłostanja zapřija sudnistwo dalše njeskutki, kaž padustwo a zranjenje ćěła.
Wuradźuja wo matematice
Drježdźany. Fachowcy ze wšitkich zwjazkowych krajow a Awstriskeje wuradźuja dźensa a jutře w Drježdźanach wo přichodźe maturitneho pruwowanja w matematice. W srjedźišću steji, kak móhło maturitne pruwowanje w matematice w lěće 2030 wupadać, informuje kultusowe ministerstwo. Zaměr je, nadawki po wšej Němskej dołhodobnje na samsnej runinje přibližić.
Hans-Joachim Wolfram njeboh
Krótkopowěsće (28.11.16)
Z fotami Jürgena Maćija
Drježdźany. Pod hesłom „Pódla był – fotografije z NDRskeho časa“ wustajeja fotografojo Frank Höhler, Thomas Kläber, Georg Krause a Jürgen Maćij tuchwilu w rumnosćach přichodneho NDRskeho muzeja w Drježdźanskim Simmelowym nakupnišću na Albertowym naměsće. Hač do 14. januara je wustajeńca přistupna.
Maja nowu nawodnicu
Choćebuz. Uta Henšelowa stanje so z nowej nawodnicu Šule za delnjoserbsku rěč a kulturu w Choćebuzu. 1. februara wona nowe zastojnstwo nastupi, rozprawja delnjoserbski rozhłós RBB. Lubnjowčanka, kotraž skutkuje hišće jako regionalna rěčnica Domowiny w Delnjej Łužicy, přewozmje nawodnistwo kubłanišća wot Marje Elikowskeje-Winkleroweje, kiž so kónc lěta na wuměnk poda.
Telekom pruwuje nadpad
Berlin/Bonn. Po masiwnych hawarijach internetnych přizamkow Němskeje Telekom předewzaće pruwuje, hač móhło so wo nadpad hackerow zwonka předewzaća jednać. Wotpowědne pokiwy je Telekom wot fachowcow dóstała. Potrjechenych je něhdźe 900 000 internetnych routerow. To su nastroje, kotrež zmóžnjeja zwisk do interneta.
