Policija (20.07.17)
Nimale štyri promile intus měł
Chrjebja. Jako bě wutoru připołdnju w Chrjebi 31lětny na Hamorskej dróze z kolesa padnył, bjez toho zo by jeho něchtó storčił, zawołachu pasanća policiju. Zastojnicy Běłowodźanskeje policajskeje direkcije nochcychu swojim wočam wěrić, widźo na měrjenskim nastroju, zo ma muž 3,78 promilow alkohola w kreji. Wón dyrbi nětko z chłostanjom pjanosće we wobchadźe dla ličić.
Z 91 km/h po wsy
Lěskej. W Lěskeji pola Hućiny su policisća wutoru rano spěšnosć měrili. Hdźež je 50 km/h dowolenych, smaleše jedyn ze šoferow na B 156 z 91 km/h po wsy. Wodźer Mercedesa budźe nětko měsac bjez jězbneje dowolnosće, ma 200 eurow pokuty płaćić a dóstanje dypkaj do Flensburgskeje centralneje kartaje zapisanej. W běhu dweju hodźin registrowachu na woběmaj stronomaj dróhi wjace hač 1 200 awtow. Kóždy dźesaty šofer bě spěšnišo po puću, hač dowolene.
Susodźa sej njepřezjedni
Noworjadowanje ležownosćow njemóža wšelkich ćežow dla zakónčić
Budyšin (SN/mwe). Poprawom dyrbjało noworjadowanje ležownosćow w Budyskim wokrjesu dawno zakónčene być. Přeco zaso pak dochadźa k nowym ćežam a maličkosćam, kotrež procedury haća, hdźež sej samo zamołwići často žaneje praweje rady njewědźa. To wotbłyšćuje tež naprašowanje Serbskich Nowin na wokrjes.
W jednotliwym wopisuje nowinska rěčnica Budyskeho krajnoradneho zarjada Sabine Rötschke tuchwilnu situaciju jako tajku: Noworjadowanje wokoło Prěčec a z tym zwjazane postupowanje noworjadowanja ležownosćow, kaž wuměrjenje zahonow, polow, zahrodow atd., je so znowa zahajiło a zarjadniski pomocnik zamołwitu instancu wokrjesa podpěruje. „Najprjedy maja so wobdźělenske daty aktualizować a dojednanja pruwować a w datym padźe z wobdźělnikami wujednać“, z krajnoradneho zarjada dale rěka, „nimo toho přewjedźe wobdźělenska zhromadźizna po wšěm zdaću lětsa w třećim kwartalu nowowólby, zo by předsydstwo wudospołniła.“
Thomas Aust a Riko Pohl (wotlěwa) plestrujetaj před Chróšćanskej ...
Tyši jeho, zo je so ptačina zhubiła
W swojej lětušej dowolowej seriji předstajamy wosoby, kotrež na někajkežkuli wašnje stawizny a přirodu zachowuja, zo starožitnosće zběraja a je zdźěla zjawnosći spřistupnjeja.
Do Radworja jěducy wuhladaš za Chasowom dwurěčny pućnik, pokazowacy na „Lěsny park“. Dalši skedźbnja na njón po Młynskich chěžach za železniskim nasypom. Zapołožił je powučnu idylku 70lětny Radworčan Ludwig Sachsa.
Přepytowanja zastajene
Rakecy/Zhorjelc (SN/JaW). Policija je přepytowanja nastupajo móranja na wjesnych taflach w Rakecach zastajiła. Wo tym informowaše wčera nawječor nowinski rěčnik Zhorjelskeje policajskeje direkcije Thomas Knaup redakciju SN.
„Móranja na wjesnych taflach pola Rakec njeje nichtó jako njeskutk policiji přizjewił“, zdźěli Knaup na naprašowanje. Rakečanski wobydlerski policist je slědźił a po naprašowanju w gmejnskim zarjedźe zhonił, zo buchu wjacore tafle pomórane a polěpjene. Dokładnu ličbu pak tež gmejna mjenować njemóžeše. „Mjeztym su njeznaći nalěpki a móranja zaso wotstronili, bjez toho zo bychu škodu zawostajili. Při kontroli taflow njezwěsći policist hižo žanežkuli nalěpki a tež žanežkuli wobškodźenje na nich“, nowinski rěčnik wuswětli.
„Po tuchwilnych dopóznaćach tuž žane chłostajomne jednanje njepředleži. Přiwšěm móže polěpjenje wjesnych taflow přestupjenje porjada być, kotrež ma přisłušna gmejna přepytować“, rjekny Thomas Knaup našemu wječornikej.
Zaběraja so z ideju pomnika
K zakónčenju bojow Druheje swětoweje wójny w aprylu 1945 steješe fronta mjez němskim a ruskim wójskom w Koslowje. Někotři wjesnjenjo chcedźa k spomnjeću na to pomnik stajić.
Koslow (SN/MiR). 80 procentow statokow a domskich w Koslowje bě po wojowanjach zničenych. Jědnaće młodych wjesnjanow je jako wojak zahinyło, jeničce z Budarjec swójby běchu to štyrjo. „Na to njesměmy zabyć. Dyrbimy młodych ludźi, wosebje tež přichodne generacije na stawizny našeho regiona skedźbnić“, powěda Koslowčanka Wórša Pašcyna. „Runje nětko, hdyž so prawicarske a nacionalsocialistiske zmyslenje wospjet w towaršnosći šěri, je to jara wažne.“
Z jěchanskich turněrow někotryžkuli pokal sobu přinjesł (4)
Mnohim křižerjam staj Dieter Graf a jeho jěchanski dwór w Jěžowje pola Kamjenca derje znataj. Hižo wjele lět Graf křižerjam konje wupožča, při čimž na to dźiwa, zo so křižerjo do jutrow z konjemi zeznajomjeja a z nimi jěchać zwučuja, zo bychu so konje a jěcharjo na so zwučili.
Z konjacym sportom je Dieter Graf hižo 1975 jako hobby započał. Samsny čas dźěłaše jako weterinarny inženjer w Liebenauskim dejnym kombinaće, štož je jemu hač do dźensnišeho w dobrym pomjatku. Po politiskim přewróće dyrbješe runja druhim inženjeram nazhonić, zo w nowej towaršnosći powołanje weterinarneho inženjera njeznaja. Tuž so z dźewjeć konjemi zesamostatni, kotrež bě wot tehdyšeho prodrustwa přewzał. 1993 natwari sej nowy konjenc z jěchansku halu „na zelenej łuce“ w Jěžowje.
Krótkopowěsće (19.07.17)
Basnje Chěžki běłorusce wušli
Minsk. Šěsć basnjow Jurja Chěžki je Mikola Mjetlickij znowa do běłorušćiny přenjesł. Mjez druhim su to Dundakowa pěseń“, „Zelene zet“ a „Kak lochko so to spi“. Basnje su přełožki z originala. Pomoc a interlinearne přełožki poda Kajrat Bakbergenow. Wozjewjene su basnje w časopisu za literaturu a publicistiku „Sozwučije“ (Harmonija) w Minsku.
Wólbne namjety zapodali
Budyšin. Za wólby 19. němskeho zwjazkoweho sejma 24. septembra 2017 předleža we wólbnym wokrjesu 156 – Budyšin I – namjety wosom stron a jednoho jednotliwca. Wo přizwolenju tychle namjetow rozsudźi wokrjesny wólbny wuběrk na zjawnym posedźenju pjatk, 28. julija, w 11 hodź. w Budyskim krajnoradnym zarjedźe, Dwórnišćowa 9, stwa 210.
Wjace pjenjez muzejam
Za kwasnu jědź njewšědny to chwatk był
Bywši zwjazkowy kancler Helmut Kohl, kiž je 16. julija zemrěł, bě 1991 Hornju Łužicu a Radwor wopytał (SN 19. junija w nekrologu za zemrěteho wo tym rozprawjachu). Jako tehdyši hosćencar Radworskeje „Meje“ ma Měrćin Wagner k podawkej wosobinski poćah. Tule podawa wón swoje dopomnjenki na wopyt kanclera.
Wopyt zwjazkoweho kanclera Helmuta Kohla (CDU) 3. julija 1991 w Radworju ma tež předstawiznu. Ratar Gottfried Haschke z Großhennersdorfa bu w měrcu 1990 do Ludoweje komory NDR woleny a bě ze zjednoćenjom němskeju statow do zwjazkoweho sejma přešoł. Tam sta so z parlamentariskim statnym sekretarom pod ratarskim ministrom Ignazom Kiechlu w knježerstwje kanclera Helmuta Kohla.
Jazzowa legenda w sotrowni
Mały Wjelkow (CS/SN). Kulturny organizator Mike Salomon bě tež lětsa zaso za kulturne lěćo w Małowjelkowskej sotrowni wobšěrny a wotměnjawy program zestajał. Minjenu sobotu je w přepjelnjenym twarjenju před wjace hač 100 přihladowarjemi jazzowa legenda Pascal von Wroblewsky swój program předstajiła. W dwuhodźinskim koncerće hódnoćeše wona ze swojimi improwizacijemi wosebje Johanna Sebastiana Bacha. Publikum bě wulce zahorjeny a wužada sej tež wot hudźbnikow Michija Winklera a Reimera Hentschki přidawk.
Nowa mjećawa po puću
Budyšin (SN). Někotre dny mjeztym wukonja mała nowa mjećawa CityCat 2020 XL w Budyšinje swoju słužbu. Nastroj njeje jenož optisce něšto za wóčko, mašina je tež enormne dźěłowe wolóženje. Wšako rjedźa z modernej mašinu měšćanske chódniki a kolesowarske šćežki kaž tež zjawne městnosće. Wuhotowana je CityCat z wjacorymi chošćemi a 300literskim tankom wody.
