SLA a Nowa łužiska filharmonija koncertujetej na hudźbnych dnjach

Smochćicy (SN/CoR). „Wjeselu so jara, zo je so nam tónraz zešlachćiło, hnydom wobaj łužiskej orchestraj za lětuše Smochčanske hudźbne dny zdobyć“, podšmórny rektor tamnišeho Domu biskopa Bena, dr. Peter-Paul Straube, na wčerawšej nowinarskej konferency. Běše-li minjene lěta z wašnjom, zo předstaji pak Serbski ludowy ansambl pak Nowa łužiska filharmonija wosebity program na woblubowanym zarjadowanju pod hołym njebjom, změja tam lětsa nowum, zo ćělesy runohódnje k jónkrótnemu hudźbnemu wjerškej regiona přinošujetej. Wot 3. do 5. julija přeprošuje čestnohamtsce skutkowace mustwo wokoło předsydki towarstwa Via Regia Margitty Luttner zaso na Smochčanske hudźbne dny na arealu Domu biskopa Bena. „Zo smy sej nowych sponsorow zdobyć móhli a zo zastupne lisćiki nětko tež w Lubiju, Biskopicach kaž tež w SLA předawaja, je tež dobra powěsć“, so Margitt Luttner raduje­. Za transport steji zaso shuttle-bus při Budyskim hotelu „Best Western“ k dispoziciji.