XI. mjezynarodny folklorny festiwal so bliži

Chrósćicy (SN/CoR). „Nadźijamy so, zo wšitko tak budźe, kaž sej to předstajamy. Snano so samo prěni raz w 20lětnych stawiznach folklorneho festiwala stanje, zo woprawdźe wšitke skupiny z wukraja přijědu, kotrež su so přizjewili“, rjekny dźens dopołdnja předsyda přihotowanskeho wuběrka Marko Kowar na nowinarskej konferency na Chróšćanskim gmejnskim zarjedźe. Tam budźe za čas XI. mjezynarodneho folklorneho festi­wa­la „Łužica 2015“ wot 9. do 12 julija organizaciska centrala zaměstnjena. Dwanaće ansamblow – z Indiskeje, Mexika, Paraguayja, Georgiskeje, Estiskeje, ze Słowjenskeje, Słowakskeje, Madźarskeje, Čěske­je a Pólskeje – je dotal připrajiło. Dohromady liča ze 700 wobdźělnikami a z wjace hač 300 pomocnikami.