Předstajenje na hrajersce a technisce wysokim niwowje
Chrósćicy (aha/SN). W běhu dweju lětdźesatkow je so Towarstwo Cyrila a Metoda po 1995 a 2000 znowa wo předstajenje pasiona postarało. 240 hrajerjow, spěwarjow, rejwarjow a hudźbnikow je sobotu wječor na premjernym zarjadowanju něhdźe 500 ludźi zahoriło, pokazujo z wuměłskej dokonjanosću skutkowanje, ćerpjenje, křižowanje a zrowastanjenje Jězusa Chrystusa. Pod režiju Tomaša Cyža, Michała Cyža, Pětra Za- hrodnika a pod cyłkownym nawodom Jurja Špitanka dožiwichu wopytowarjo dwuhodźinske předstajenje pod hesłom „Wy sće swětło swěta“ (Mt 5,14). Kmótřistwo nad lětušej pasionskej hru přewzał bě japoštołski administrator Drježdźansko-Mišnjanskeho biskopstwa dr. Heiner Koch, kiž dźakownje zwurazni, „zo Serbja ze swojej wěru, kulturu, rěči a wotewrjenosću naše biskopstwo kaž tež naš kraj wobohaćeja“.