141. schadźowanka z nowymaj režiseromaj so wotměła

Budyšin (jb/SN). Jakub Wowčer a Maksimilian Kral měještaj na 141. schadźowance sobotu wječor w Budyšinje prěni raz jako režiseraj wotežku w rukomaj. Młodaj Serbaj žněještaj tójšto přikleska, byrnjež wosrjedź programa indirektnje tež sylnu kritiku přiwzać dyrbjałoj.

Budyska „Króna“ bě derje pjelnjena a krótko po sedmich wotewrě předsyda Domowiny Dawid Statnik program. Lětuša moderatorka bě Hańžka Šimanec z Chrósćic/Lipska. Młoda studentka drje njebě přehusto na jewišću, je pak stajnje jasnje wurjekujo, z přiměrjenej spěšnosću a w dobrej serbšćinje hosći po wječorje wjedła. Po spočatnym spěwje skupiny SerBeat, kotraž postara so wo mjezyhudźbu, wo přewody kaž tež wo wječorne reje, běchu studenća z Drježdźan na rjedźe. W swojim kabareće předstajichu Serbow, kotřiž měnja, zo do serbskeje Łužicy dale a wjac Němcow ćěka, tak zo serbšćina pomału woteměra. Na šćipate wašnje z krótkej widejowej sekwencu běchu paralele k tuchwilnej situaciji ćěkancow w Němskej a předsudki domoródnych přećiwo nim spóznajomne.