Podstupim/Budyšin (SN/JK/MiR). K rozsudej hłowneho wuběrka Krajneho sejma Braniborskeje, přihłosować přistupej gmejny Łukojce (Wiesengrund) serbskemu sydlenskemu rumej, su so politikarjo wobeju krajow chwalobnje wuprajili.

Braniborski kulturny statny sekretar Martin Gorholt wobhladuje próstwu Łukojc jako wuslědk lońšeho nowelěrowanja Serbskeho zakonja. Braniborskej komunje Kalawa a Lubin stej tohorunja próstwu wo přistup k serbskemu sydlenskemu rumej stajiłoj. „Serbska rěč a kultura stej bytostnej za južny dźěl Braniborskeje a přinošujetej zaměrnje k atraktiwiće regiona“, wujasni Gorholt rozsud komunow. Předsyda braniborskeje Rady za serbske naležnosće Torsten Mak rje­kny na naprašowanje našeho wječornika: „Rozsud gmejny Łukojce nas radźićelow jara wjeseli. Čłonka rady Uta Henšelowa wudźeržuje ze zastupjerjemi dalšich wo­krjesow, městow a gmejnow zwisk. Chcemy jich pohnuć, wo přistupje k serbskemu sydlenskemu rumej rozmyslować.“