Rada za serbske naležnosće Braniborskeje je na swojim wutornym posedźenju w Podstupimje dobre wuwiće nastupajo nałožowanje nowelěrowaneho braniborskeho Serbskeho zakonja zwěsćiła.
Podstupim (SN/MiR). Tuchwilu zaběraja so čłonojo Rady za serbske naležnosće Braniborskeje ze změnu zarjadniskich předpisow po nowelěrowanju Serbskeho zakonja. Radźićelam dźe mjez druhim wo serbski šulski předpis. „Wjackróć smy so w ministerstwje za kubłanje, młodźinu a sport (MBJS) naprašowali, hdy ma so to stać“, rjekny předsyda serbskeje rady a wučer na Choćebuskim Delnjoserbskim gymnaziju Torsten Mak. „Dotal pak mějachmy zaćišć, zo nas zarjady stajnje jenož tróštuja.“ Tuchwilu wšak płaći w Kraju Braniborskej hišće wersija předpisa z lěta 2000. Wutoru nětko je ministerstwo radźićelam přichodne wuradźowanske terminy mjenowało, štož maja woni za krok po puću k nowelěrowanju. Hižo w januaru chce dźěłowa skupina za serbske kubłanske naležnosće w MBJS šulski předpis rozjimać.