Wubědźowanje młodych serbskich hudźbnych talentow

Budyšin (CRM/SN). Wospjet zarjadowa Serbski ludowy ansambl ze Załožbu za serbski lud minjeny pjatk wubědźowanje młodych serbskich hudźbnych talentow. 33 hudźbnych šulerkow a šulerjow kaž tež chór Lipa Bórkowskeje šule w Błótach běše přeprošenje sćěhowało. Někotre kónčiny běchu hódnje zastupjene, tola z Delan so nichtó njewobdźěli. Wězo je wysoki niwow poskitkow wažny, tola na druhej stronje je pódla być hižo jara wjele. Fachowej jury přisłušachu z Tanju Donatec, Jadwigu Wjeńkec-Simonowej, Dieterom Kempu a Karlheinzom Starku hudźbnicy, kotřiž zamóža hudźbny dorost jara derje posudźować. Myta wozjewja so na koncerće 1. meje. „Situacija na polu hudźbneho dorosta je tu pola nas w Serbach chabłaca, štož wotpowěduje powšitkownemu trendej w Němskej. Bohužel pak njerozsudźa so ći wosebje talentowani a nadměru pilni hustodosć za studij hudźby, dokelž widźa we wuměłskim powołanju přewulke socialne riziko“, praji koncertna spěwarka a hudźbna pedagogowka Tanja Donatec.