Dalekubłanje rěčnikow
Chrósćicy. Na Chróšćanskej farje přewjedu jutře, sobotu, wot 9 hodź. dalekubłanje za wšěch, kotřiž w Serbskim rozhłosu nabožne słowo k dnjej rěča. Tak wotměja rěčne zwučowanja z logopedku, zwučowanja z mikrofonom kaž tež dźěło na tekstach, při čimž póńdźe wo spisanje, jadriwosć, žórła a dalše.
Kak štomy wurězować
Bjedrichecy. Štóž chce nawuknyć, kak ma štomy prawje wurězować, ma k tomu jutře wot 9 do 12 hodź. w Bjedrichečanskej (Friedersdorf) přirodoškitnej staciji přiležnosć. Lothar Halke z Nišćanskeho zahrodnistwa zajimcam w seminarje rozkładźe a pokaza, kotre profesionalne wurězowanske techniki su móžne.
Ze Serbskej reju rejwać
Njebjelčicy. Na Njebjelčanskej gmejnskej žurli wotměje so jutře wot 16 hodź. „dźeń rejwanskeje lipy“. Po přednošku prof. Andreasa Zehnsdorfa z Lipska wo tradiciji rejwanskeje lipy w srjedźnej Němskej, po diskusiji a kofejpiću chcedźa tam wot 17.30 hodź. zhromadnje rejwać. Skupina Serbska reja pokaza zajimcam wšelke serbske ludowe reje. Štóž chce, móže sej rady instrument sobu přinjesć a ze skupinu sobu hudźić.
