Pokiwy (15.11.19)

pjatk, 15. nowembera 2019
artikl hódnoćić
(0 )

Gospelowy oratorij w cyrkwi

Budyšin. Jutře, sobotu, w 19 hodź. a njedźelu, 17. nowembra, w 16 hodź. su za­jimcy do Budyskeje­ Marje-Marćineje cyrkwje na gospelowy oratorij „Prince of peace“ přeprošeni. Hudźbu postajeja chórowe a orchestrowe pasaže w stilu jazza, gospela, bluesa hač ke grego­rianskemu choralej. Koncert wuhotuja ewangelske kantorstwo tachantskeje cyrkwje, orchester SLA a bigband pod nawo­dom cyrkwinskeho hudźbneho di­rek­tora Michaela Vettera.

Dalše Smochčanske jewišćo

Smochćicy. We wobłuku Smochčanskeho jewišća wuhotuje kwartet Amaryllis jutře, 16. nowembra, w 19.30 hodź. koncert w Smochčanskim Domje biskopa Bena. Na programje steja smyčkowe kwartety Franza Schuberta, Bele Bartóka a Ludwiga van Beethovena.

Wosebite wodźenje

Narć. Wojerowski hród a měšćan­ski muzej přeprošatej jutře wot 13 hodź. na wosebite wodźenje po wo­pomnišću za wójnskich jatych w Narću. Na awtentiskim městnje móža sej wo­pytowarjo stawizny lěhwa wuhnatych wuwědomić.

Předstaja komediju dalši króć

Sulšecy. Po wuspěšnej premjerje minjeny kónc tydźenja w Šunowskej Fabrik­skej hospodźe wjesela so čłonojo lajskeje dźiwadłoweje skupiny Šunow-Konjecy na dalše předstajenje komedije „Ludźo, njedźiwajće so“. Te budźe njedźelu, 17. nowembra, w 16 hodź., w kulturnym domje delnich Sulšec. Na Chróšćanskej Krawčikec žurli pokazaja spektakl njedźelu, 8. decembra. Tež tam budźe móžno simultany přełožk wužiwać.

Do ateljeja załožić

Slepo. Njedźelu, 17. nowembra, su zajimcy wot 10 do 16 hodź. na dźeń wote­wrjeneho ateljeja w Slepom přeprošeni. Na wopyt wjeseli so w swojim drjewowym ateljeju Gudrun Feuerriegel. Nimo hižo znatych předstaja wona tež nowe skulptury, a to w přijomnym ambienće při kapce wina.

Koncert w Starej hospodźe

Pančicy-Kukow. Je hižo z tradiciju, zo kónči so slěd nazymskich koncertow kóžde lěto w Pančicach-Kukowje. Tuž su lubowarjo do tamnišeje Stareje hospody witani, a to přichodnu wutoru, 19. nowembra, w 19.30 hodź. Wjeselić móža so na­ Židźinski chór.

Přeprošeja na akademiju

Budyšin. Składnostnje 200. narodnin Jaroměra Hendricha Imiša přednošuje serbski superintendent Jan Malink štwórtk, 21. nowembra, w 19.30 hodź. w Budyskim hosćencu „Wjelbik“, Žitna 7, na temu „,Ta razna postawa mi nochce z hłowy‘ – Imišowe skutkowanje za Serbstwo a cyrkej“. Přednošk budźe w serbskej rěči, zastup darmotny.

Na kermušne reje

Radwor/Smjerdźaca. Jutře, sobotu, su Radworčenjo a wšitcy dalši zajimcy a přećeljo na kermušne reje do Radworskeje „Meje“ přeprošeni. Wot 20 hodź. zahudźi tam kapała SerBeat. Tydźeń pozdźišo, sobotu, 23. nowembra, w 19.30 hodź. su Smjerdźečenjo a jich hosćo na reje do tamnišeho kulturneho domu přeprošeni. K delanskej kermuši, w běhu lěta poslednjej, budźe znata a woblubowana kapała Privileg k rejam hrać.

Rěčna swětłownja

Wojerecy. Na přichodnu serbskorěčnu dźěłarničku we Wojerecach pod hesłom „Rěčna swětłownja“ přeprošuje Gabriela Linakowa. Zetkanje wotměje so wutoru, 19. nowembra, w 17.30 hodź. we Wojerowskim hosćencu „Andulino“ při tor­hošću.

wozjewjene w: Pokiwy
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND