Zarjadniski zwjazk Při Klóšterskej ­wodźe wukonja zarjadniske dźěło ­za pjeć serbskich gmejnow, kotrež jón financuja. Kajke lěto 2025 w zarjadniskim zwjazku bě a što jón lětsa woča­kuje, wot tym je so Marian Wjeńka z jeho předsydu Stefanom Andersom rozmołwjał.

Knježe Anderso, před lětom sće w našim wječorniku připowědźił, zo lěto 2025 cyle tak turbulentne kaž 2024 njebudźe. Je so tale předpowědź zwoprawdźiła?

S. Anders: Nic cyle. Spočatk zašłeho lěta wšak je nas reforma ležownostneho dawka jara zaběrała. To dyrbjachmy wjele komunikacije z wobydlerjemi zmištrować. Kónc februara sćěhowachu dočasne wólby zwjazkoweho sejma. Spočatk lěta bě tuž dosć turbulentny. W běhu dalšeho lěta pak nas Bohu dźak žane njewočakowane podawki překwapili njejsu.

Sće hižo wothłós dóstał, kak so nowy di­gitalny přewodnik po klóštrje Marijina hwězda a serbskich gmejnach přiwozmje? Na nim wšak bě zarjadniski zwjazk wobdźěleny.