Wotnětka su přizjewjenja za kóždolětne dojutrowne akciske dny za zběranje wotpadkow móžne. W Budyskim wokrjesu Sophia Hauswald akciju koordinuje. Wona je sobudźěłaćerka přirodoweje centrale wokrjesa ze sydłom w Njeswačanskim hrodźe. Milan Pawlik je so z njej rozmołwjał.

Štó móže so na akciskich dnjach wobdźělić a kak so zajimcy najlěpje přizjewja?

S. Hauswald: Zasadnje móže so kóžda skupina pola nas přizjewić, wšojedne hač je samo-organizowana, hač šulska rjadownja, towarstwo abo gmejna. Wona ma přizjewjenski formular wupjelnić, hdźež zdźěli, hdy, hdźe a kak chce wotpadki w přirodźe zběrać. Přizjewjenja měli nam hač do 13. februara předležeć. Formular nadeńdu zajimcy na našej internetnej stronje www.naturzentrale-bautzen.de. Sčasom do termina sćelemy wobdźělnikam t. mj. starterowy set. Wón wobsahuje mjez druhim informaciski material kaž tež rukajcy a měchi za zběranje wotpadkow. Jeli trjeba organizujemy za nich wotpadkowy kontejner.

Kak dołho akciske dny hižo přewjedujeće?