Dwě powěsći stej mje tutón tydźeń wosebje jimałoj. Prěnja powěsć – wona je mje jara zwjeseliła – su wuslědki mjezywólbow w USA. Demokraća su sej we woběmaj komoromaj kongresa wjetšinu sydłow zdobyli. Za Donalda Trumpa, kotryž běše wólby wusko ze swojej wosobu zwjazał, bě rezultat kaž plista mjezwoči. Wólbne prognozy wšak běchu tute wuslědki wěšćili. Dźensa, w času jara efektiwnych techniskich móžnosćow wowliwowanja wolerjow we wirtuelnym swěće, pak móžemy so na tajke prognozy lědma hišće spušćeć. Pozitiwny přikład za to je wólbny wuspěch lěweho brazilskeho prezidenta Lule da Silvy před měsacom. W prěnim wólbnym kole běše wón dwaj procentaj za swojim politiskim prawo-konserwatiwnym konkurentom Flávijom Bolsonarom. Jeho zbožo běše, zo Bolsonaro absolutnu wjetšinu njedocpě. Wočiwidnje pak běše wuslědk přiwisnikow Lule da Silvy wubudźił. W běhu něšto njedźel hač do rozsudneho wólbneho koła so jim poradźi, wjace hač milion hłosow „organizować“, a to předewšěm z pomocu socialnych syćow.





