Wosobina swjateho Měrćina steji za skromnosć, lubosć k blišemu a zhromadnosć. To su hódnoty, kotrež dźensniši dźeń často paruju. Předewšěm tute hódnoty měli sej dźensa bóle wažić.
Wone njejsu hižo samozrozumliwe. Wězo su tuchwilu mnozy ludźo chětro njespokojni. Za to je hladajo na towaršnosć a politiku dosć přičinow. Stupace kóšty za žiwjenje, financielne starosće, změny w towaršnosći a strach před přichodom su realne a dyrbja so chutnje brać. Snano pak dyrbjeli tež jónu na to hladać, što wšitko mamy, štož su sej minjene generacije sprócniwje wuwojowali.
Přiwšěm widźu kritisce, hdyž so njespokojnosć a hněw přiběrajcy na to wusměrjeja, AfD podpěrać. Njespokojnosć njeměła k tomu wjesć, zo so politiske přilubjenja a jich móžne konsekwency bjez prašenjow přewozmu. Protestne wólby wšak awtomatisce problemy njerozrisaja, kotrež ludźi zaběraja.





