Drježdźany (dpa/SN). W Sakskej je ličba kradnjenych awtow a wotpowědnych pospytow loni dale woteběrała. Po statistice krajneho kriminalneho zarjada (LKA) w Drježdźanach su loni 1 396 zwjetša drohotnych awtow jako kradnjene registrowali, lěta 2017 bě jich 1 794 a 2016 hišće 1 837. Něhdźe štwórćinu wozow móžachu zaso namakać, wjetšinu w Pólskej. Někotre z nich zwěsćichu, prjedy hač běchu­ wobsedźerjo policiju informowali.

Cyłkownje 34 awtow su w Pólskej namakali, 13 w Čěskej a 23 w Němskej, nimale połojcu z nich dźeń po kradnjenju. Skućićelow móža nětko tež za mjezu zajeć. Zwjetša zasudźa jich potom k wjelelětnemu jastwu. „Paduši njemóža tež za mjezu wjace wěsći być, zo jich njelepja“, rjekny rěčnik LKA.

Choćebuz (dpa/SN). Braniborski ministerski prezident Dietmar Woidke (SPD) je wobsadźenje bagrow we Łužiskich brunicowych jamach přez přećiwnikow brunicy zasudźił. „To ma něšto z nadutosću a arogancu činić“, rjekny Woidke wčera w rozmołwje z komunalnymi politikarjemi w Choćebuzu, kaž statna kenclija zdźěli. „Tole so demokratiskim prawidłam dospołnje spřećiwja.“

Wobswětowi aktiwisća běchu w Janšojcach a w jamje Wjelcej-juh bagry wobsadźili a sej hnydomne skónčenje wudobywanja brunicy žadali. Na transparentach zwuraznichu swoje přesłapjenje hladajo na wuslědki wuradźowanja wuhloweje komisije.

Měšćanostka Grodka Christine Herntier (bjezstronska) aktiwistam wumjetowaše, zo ze swojim postupowanjom wobydlerjow regiona znjeměrnjeja. Wuhlowa komisija, kotrejž Herntier přisłuša, bě namjetowała, zmilinjenje brunicy najpozdźišo w lěće 2038 skónčić. Z pjenježnej podpěru wjacorych miliardow eurow chcedźa strukturnu změnu podpěrować.

Marko Šiman: Nowe myslenje za železnisku infrastrukturu trěbne

Budyšin (SN/at). Na tych, kotřiž kónčnu rozprawu komisije za rozrost, strukturnu změnu a dźěło kritizuja, Budyski krajny zapósłanc Marko Šiman (CDU) njeposka. „Měli na tym dźěłać a něšto na nohi stajić­“, rjekny wón, „a to prawje bórze, wšako pjenjezy su. Kak to za tři abo štyri lěta budźe, nichtó njewě.“

Polěpšenje łužiskeje wobchadneje infrastruktury je Šimanej dale wažny wobłuk. „Tež, hdyž so za rozšěrjenje awtodróhi A 4 zasadźuju, je mi železnica wažna“, rjekny Šiman minjeny pjatk nowinarjam w Budyšinje. Po jeho słowach je nowe myslenje za železnisku infrastrukturu trěbne. Wón potwjerdźi, čehodla ma wu­twar čary Drježdźany–Zhorjelc za tempo 160 za prawy: „Potom móža regionalne ćahi tam hišće jězdźić a wobstejace zastanišća posłužować. Njeměli na potomnikow zabyć a wšo wotstronić.“ To by so w tym padźe stało, hdyž wu­kmanja čaru za ICE-ćahi.

Wo městno na parkowanišću kupnicy biłoj staj so Němc a Nižozemjan w delnjosakskim Bunde. Samo žonje wobeju so wobdźělištej, policija zdźěli. Započało bě so wšitko z werbalnym rozestajenjom mjez 54lětnym Nižozemjanom a 48lětnym Němcom. Jedyn z wobeju bě so hižo na městno stupił, kotrež sej tež druhi žadaše. Skónčnje z pjasćemi do so biještaj, runje tak kaž žonje. Po informacijach policije wosta při snadnych zranjenjach.

Z akciju „ćopły pulower“ chce zakładna šula w Düsseldorfje wuspytać, kak móhli energiju lutować. Pjatk su starši namołwjeni, dźěći w ćopłej drasće do šule pósłać. Tole bě spočatnje iritacije zbudźiło, dokelž so mnozy starosćachu, zo so dźěći nazymnja. Redukować chcedźa tepjenje jenož wo tři stopnje. Nimo toho maja dźěći­ pjatk, posledni dźeń do prózdnin, tak a tak jenož tři hodźiny wučby.