Budyšin (SN/at). Tři bytostne wobłuki chce Harald Baumann-Hasske jako direktny kandidat SPD we wólbnym wo­krjesu 56 za nowy sakski sejm wolerjam wosebje rozjimać. Nastupajo kubłanje wot dźěćaceho dnjoweho přebywanišća hač k wysokej šuli budźe tuchwilny krajny zapósłanc na połoženje w hortach skedźbnjeć. Nimo strowotnistwa/hladanja je wobchad třeće tajke polo. Próstwy za šěsćčarowy wutwar awtodróhi A 4 su drje zapodate. Za elektrifikaciju železniskeju čarow Choćebuz–Zhorjelc a Drježdźany–Zhorjelc žada sej direktny kan­didat we wobłuku procesa strukturneje změny zjednorjene planowanske prawo za trěbne wudospołnjenje łužiskeje infrastruktury. Baumannej-Hasskemu pak je hišće něšto wažne: Ze šěrokopasmowym wutwarom w Budyskim wokrjesu přiběra po jeho měnjenju šansa, so tu wo pilotowy projekt za awtonomne jězdźenje prócować, za čimž tči wozydło bjez šofera. We wjesnym rumje móhło to alter­natiwa we wosobowym bliskowobchadźe być. Po słowach Baumanna-Hasski je tež trjeba, wjace formow direktneje demokratije w Sakskej nałožować.

Drježdźany/Budyšin (SN/at). Dokelž so serbskorěčne rumy dale pozhubjeja, je trjeba serbske kubłanje ewaluěrować. UNO woznamjeni 2019 tuž jako „lěto indi­genych rěčow“, zo by na jich wohrožacy staw pokazała. Na to skedźbni za­pósłanc Sakskeho krajneho sejma Hajko Kozel (Lěwica) wčera w nowinskej zdźělence. W Atlasu wohroženych rěčow UNESCO stej delnjo- a hornjoserbšćina w schodźenku 2 jako wohroženej za­stopnjowanej. To rěka, zo dźeń a mjenje rěčnikow serbšćinu jako maćeršćinu wuknje, wona hrozy w běhu mało generacijow wotemrěć.

„Posudk pokazuje, zo njebu prawo serbskeho ludu na swójsku rěč dotal kwalitatiwnje dosahajcy zwoprawdźene“, Kozel piše. Nawjazujo na list nawodow serbskich zarjadnišćow, kotrychž starosći woteběraca ličba tych, kotřiž serbšćinu na wysokim niwowje wob­knježa a sej napra­wy přećiwo pozhubjenju serbskorěčnych rumow pominaja, žada sej za­pósłanc „za Saksku po braniborskim mustrje hnydomnu ewaluaciju kwality serbskeho kubłanja“.

Lěwica žada sej za serbski sydlenski rum, kubłanje konsekwentnje reformować, zo by serbšćina wyši status dóstała.

Berlin (dpa/SN). Zwjazkowy wonkowny minister Heiko Maas (SPD) je so dźensa na tři dny trajacy wopyt do USA podał. We Washingtonje wočakuje jeho wonkowny minister Mike Pompeo. Z nim chce Maas zrěčenje wo zakazu atomarnych raketow srjedźneje distancy roz­jimać, kotrež je wohrožene. Nimo toho póńdźe wo wójnu w Syriskej, wo politiku Iranej napřećo a wo wjele diskutowany nowy płunowód mjez Ruskej a Němskej.

Młodostni wočakuja bamža

Panama (dpa/SN). Bamž Franciskus je po puću na swětowy zjězd młodźiny w Panamje. Mašina nawody katolskeje cyr­kwje je dźensa dopołdnja z Roma wotlećała. Franciskusa wočakuja wječor w Panamje. Po informacijach Vatikana chce jeho něhdźe 2 000 wěriwych na lětanišću witać. Zetkanje katolskeje młodźiny swěta z wjele zarjadowanjemi traje hač do njedźele. Prěni króć bamž srjedźoameriski kraj wopyta.

Putin a Erdoğan wuradźowałoj

Berlin (dpa/SN). Krótko do najskerje rozsudneho posedźenja tak mjenowaneje wuhloweje komisije su wodźace zwjazki hospodarstwa před poćežowanjom wjacorych miliardow eurow warnowali, dyrbjał-li so kónc zmilinjenja brunicy přespěšnje zwoprawdźić. „Politisce pospěšena redukcija“ zmilinjenja brunicy by hač do lěta 2030 přidatne kóšty znajmjeńša 14 hač do 54 miliardow eurow zawinowała, rěka we wčera wozjewjenym zhromadnym stejišću zwjazkow BDI, DIHK a BDA, złožowacym so na přepytowanje poradźowanskeho předewzaća Aurora Energy Research.

Wočakowane wyše kóšty nastanu w prěnim rjedźe přez wyše płaćizny miliny, štož by předewzaća kaž tež priwatne domjacnosće trjechiło. Zwjazki sej tuž žadaja,­ přiběrace płaćizny miliny z pomocu srědkow zwjazkoweho etata we wobjimje dweju miliardow eurow wob lěto wurunać. Bjez tajkeje kompensacije by Němska „politisce ćěrjenych“ přibě­racych płaćiznow miliny dla jako ho­spodarske stejnišćo­ „najwjetše škody“ poćerpjeła, zdźěli prezident industrij­neho zwjazka BDI Dieter Kempf.