Luxemburg (dpa/SN). Nutřkowni ministrojo čłonskich statow Europskeje unije su so dźensa w Luxemburgu zetkali, zo bychu wo wjele lět haćenej reformje azyloweje politiki EU wuradźowali. Dokelž njemóžachu so kraje dotal na rozdźělenje ćěkancow po krajach EU dojednać, steji reforma wot lěta 2016 faktisce na blaku. Předewšěm wuchodeuropske kraje kaž Madźarska a Pólska a naposledk tež Awstriska su přećiwo zawjazowacej kwoće. Je to poslednje zetkanje ministrow do wjerška EU kónc junija.

Smjertne wopory wulkana dla

Guatemala-City (dpa/SN). Ličba smjertnych woporow po wudyrjenju wohenjoweho wulkana w Guatemali je na 65 rozrostła. 46 wosobow so nimo toho zrani, kaž katastrofowy škit kraja zdźěla. Ně­hdźe 3 200 ludźi dyrbjachu ewakuować, po tym zo bě wulkan zawčerawšim, njedźelu, wudyrił. Při tym je znajmjeńša jednu wjes w dalokej měrje zničił. Prezident kraja Jimmy Morales wukaza mjeztym nuzowy staw. Wulkan bě dźensa dale aktiwny, byrnjež w słabšej formje.

SPD žada sej wuběrk

Waršawa (dpa/SN). Zwjazkowy prezident Frank-Walter Steinmeier je dźensa a jutře na statnym wopyće w Pólskej. W srjedźišću steji konferenca k 100. róčnicy znowazdobyća njewotwisnosće Pólskeje 1918. Tam chce Steinmeier na temu „Pólska a Němska w Europje“ rěčeć. Na zetkanju ze statnym prezidentom Andrzejom Dudu pak budu bjezdwěla tež aktualne ćeže w němsko-pólskich poćahach tema rozmołwy. Tak wumjetuje EU narodnokonserwatiwnemu knježerstwu we Waršawje, zo z justicnej reformu zasady prawniskeho stata rani. Tež w politice ćěkancam napřećo matej Němska a Pólska dospołnje rozdźělne nastajenje. Pólske knježerstwo so wot zwjazkoweho knježerstwa žadanemu rozdźělowanju ćěkancow spjećuje a chce tež twarej noweho płunowoda Nord Stream 2 zadźěwać.

Wien (dpa/SN). Ruski prezident Wladimir Putin je bjezposrědnje do swojeho wopyta w Awstriskej Europskej uniji pozitiwne signale słał. Ruska njeje na tym zajimowana Europu wosłabić. „Chcemy, zo je EU zjednoćena a hospodarsce sylna, dokelž je nam z wažnym wikowanskim a hospodarskim partnerom“, rjekny Putin žurnalistam awstriskeho rozhłosa ORF na předwječoru dźeń trajaceho wopyta we Wienje. Tam wočakowaše 65lětneho dźensa zwjazkowy kancler Sebastian Kurz. Poměr mjez EU a Ruskej je napjaty. Europa Ruskej wumjetuje, zo je sej połkupu Krim přiswojiła a podpěruje separatistow na wuchodźe Ukrainy.

Berlin (dpa/SN). Bywši předsyda SPD Martin Schulz ma zadźerženje noweho wulkopósłanca USA w Němskej Richarda Grenella za njemóžne a so nadźija, zo jeho bórze wotwołaja. „Štož tón muž čini, je bjez runjeća w mjezynarodnej diplomatiji“, rjekny Schulz powěsćerni dpa. Město toho zo by w hóstnym kraju neutralny był, zadźerži so Grenell kaž zastupnik politiskeho hibanja. W rozmołwje z nowinarjemi bě wón namołwjał, konserwatiwne mocy w Europje zesylnić. Nimo toho je awstriskeho prawicarskopopulistiskeho kanclera Sebastiana Kurza do ameriskeho wulkopósłanstwa přeprosył, hdźež jeho 13. junija k jědźi wočakuje.

Wosebje zadźiwane je zwjazkowe knježerstwo na wuprajenje Grenella reagowało, zo měli konserwatiwne mocy w Europje sylnišo skutkować a so „politiskim klasam“ spjećować, kotrež postajeja, štó w kraju knježi a štó nic. Frakciska předsydka Lěwicy w zwjazkowm sejmje Sahra Wagenknecht žada sej jeho hnydomne wupokazanje, dokelž njeje jako diplomat dlěje akceptabelny.