„Trjebamy něšto nowe, něšto zajimawe! Chcemy, zo wšitcy šulerjo začuwaja, zo je projekt za nich wužitny“. To sej šulske ­nawodnistwo Worklečanskeje Serbskeje wyšeje šule „Michał Hórnik“ kóžde lěto znowa praji. K zahajenju šulskeho lěta 2023/2024 je poměrnje spěšnje rozsudźiło, zo so na šuli do jutrow z Michałom Hórnikom zaběraja. Snadź tón abo tamny praji: To njeje runjewon spektakularne! Dwě­lowacym móžu rjec: myla so! W swojich rozmołwach ze šulerjemi wot 5. do 10. lětnika zwěsćich, zo njeje jich tema ani kuska wostudźiła. Wšako wužadachu dźěłarnički kreatiwitu kaž tež ćělne a duchowne zamóžnosće dźěći a młodostnych. Tež swoju dotalnu wědu wo Hórniku, kotruž jim ­wučerjo lěto wob lěto sposrědkuja, su w projekće zašłe tři dny trjebali. A što šulerjow bóle pohonjuje hač to, zo móža swoju wědu nałožować, sej nowu wědu zdo­bywać a – nic naposledk – měć produkt, kotryž so zjawnje prezentuje: internetnu stronu. Milenka Rječcyna

Powołanske wiki „JobRegional 2024“ su minjeny kónc tydźenja tójšto, wosebje młodych zajimcow, do Choćebuskeje měšćanskeje hale přiwabili. Hłowny zaměr wikow bě, předstajić powołanja a móžnosće dalekubłanja w Choćebuzu a južnej Braniborskej. Wot prěnjeje mjeńšiny bě zajim wopytowarjow jara wulki. Wiki organizowała bě Agentura za dźěło zhromadnje z Choćebuskim dźěłowym zarjadom. Akcija ­měrješe so na za dźěłom pytacych, dojězdźowarjow, wotchadnikow wysokich šulow a ludźi, kotřiž so prosće za nowym dźěłom rozhladuja. Pod hesłom „Wšitko je móžno“ móžachu wopytowarjo w lóštnej atmosferje styki nawjazać. Foto: Michael Helbig

Wojerecy (AK/SN). Město Wojerecy wotewrěje wutoru po jutrach wosebity labor k temje „změna strukturow“: „Labor čiń sobu!“. „Je to platforma, kotraž informuje wo wědomosći a kotraž přisporja kubłanje a schadźowanje mjez wobydlerjemi. Chcemy tu wo wjacorych projektach slědźenja do přichoda informować“, podšmórny Sebastian Schindler, sobudźěłaćer projektneje skupiny změna strukturow a koordinator labora, wutoru na posedźenju Wojerowskeje měšćanskeje rady.

Město je labor w něhdyšej korčmje „Wódny muž“ na dróze Dietricha Bonhoeffera blisko domu Martina Luthera Kinga zaměstniło. Projektny partner je Drježdźanska Techniska uniwersita, łužiski centrum technologije Lautech tzwr kaž tež Astrocentrum Łužica. W laborje předstaja zamołwići mjez druhim: Smart Mobility Lab w Čornym Chołmcu, kotryž informuje wo swojim wobchadnym projekće SIVAS (wěstota splećeneho a awtomatizowaneho wobchada), astronomiski podzemski labor „Low Seismic“ Astrocentruma Łužica w Konjecach, kaž tež přichodny Centrum za twarjenje a bydlenje we Wojerecach.

Z čestnym rjadom wuznamjenił je georgiski knježerstwowy šef Irakli Kobachidse hrajerjow narodneho koparskeho mustwa po prěnjej kwalifikaciji za europske koparske mišterstwo. „To je wulke zbožo, kotrež nas jednoći. Naši hólcy su rjekojo“, rjekny wón na Naměsće republiki w georgiskej stolicy Tiflisu, hdźež mustwo z fanami swjećeše. Do toho běchu so Georgičanjow w napjatym třělenju jědnatkow 4:2 přećiwo Grjekskej přesadźili.

Cannabis na Oktoberskim swjedźenju? Tute prašenje zamołwitych najwjetšeho ludoweho swjedźenja swěta zaběra, po tym zo su konop wot 1. apryla dźělnje legalizowali. Wobchadźenje z tutym wopojnym jědom chcedźa we wosebitym wukazu rjadować, hospodarski referat bayerskeje stolicy zdźěla. Hižo nětko strowotniske ministerstwo před tym warnuje, cannabis a alkohol měšeć.