Wothłosowanje trěbne
Berlin (dpa/SN). W debaće wo dalšich brónjach za Ukrainu je předsydka SPD Saskia Esken wothłosowanje z mjezynarodnymi partnerami wuzběhnyła. Dźe hłownje wo to, zo měli so tute dodawanja zhromadnje z mjezynarodnymi partnerami wotrěčeć, wona dźensa wuzběhny. „Dobre wothłosowanje skruća Ukrainje rjap“, Esken měni. Němska je zwólniła, 40 pancerow do Ukrainy dowjezć. Hižo měsacy bě knježerstwo wo tym diskutowało a so skónčnje za to rozsudźiło.
Wobrěča ćežišća lěta
Berlin (dpa/SN). Zwjazkowe předsydstwo Zelenych schadźuje so wot dźensnišeho w Berlinje na dwudnjowsku klawsuru. Gremij ze cyłkownje šěsć čłonami chce wo „ćežišćach a směrnicach“ strony za nowe lěto wuradźować. Nimo toho chcychu wo wólbach krajnych sejmow w Berlinje, Bremenje, Hessenskej a Bayerskej wuradźować. Temy klawsury su tohorunja hospodarska a industrijowa politika, kaž tež njewotwisnosć w energijowej politice.
Loni wjele sadu žnjeli
Tysacy přiwisnicy bywšeho brazilskeho prezidenta Jaira Bolsonara su ...
Bjezstrašnostnu radu zarjadować
„Smy koalicija a žana fuzija“
Situacija we wsy so přiwótřiła
Aachen/Erkelenz (dpa/SN). Aachenska policija hlada „starosćiwje“ na přichodne dny a tydźenje, w kotrychž móhło k rozestajenjam z klimowymi aktiwistami dóńć. Tak ma so tuchwilu wobsadźena wjeska Lützerath přesydlić. Tamniši wobydlerjo su sydlišćo hižo dlěje wopušćili. „To budźe wužadace zasadźenje z wjele rizikami“, rozkładźe policajski prezident Dirk Weinspach dźensa rano we wusyłanju WDR. Minjeny tydźeń je tam přewažnje měrnje wostało. Wčera pak je so situacija přiwótřiła. Mjez druhim aktiwisća kamjenje na policistow mjetachu. „To njeje dobre znamjo“, Weinspach měni. „Nadźijam so, zo njebudźe so to wospjetować.“
Energijowy koncern RWE chce porynsku wjes Lützerath na zapadźe Sewjerorynsko-Westfalskeje spotorhać, zo móhli tam brunicu wudobywać. Póda a domy mjeztym energijowemu koncernej słušeja. W zbywacych rumnosćach bydla nětko aktiwisća, kotřiž su spjećowanje připowědźili. Přichodne dny je wobšěrna akcija policije předwidźana.
Dyrbja mnohe ćeže rozrisać
Sakska krajna direkcija zaběra so dźeń a sylnišo ze sćěhami změny klimy
Drježdźany (dpa/SN). Sakska krajna direkcija ma so dźeń a bóle ze sćěhami klimoweje změny rozestajeć. „Suchota zašłych lět so tež na dnownu wodu wuskutkuje“, rozłoži jeje prezidentka Regina Kraushaar w rozmołwje z powěsćernju dpa w Drježdźanach. Projektowa skupina w režiji direkcije so tohodla z dołhodobnym zastaranjom Łužicy z wodu zaběra. Při tym su potrjechene komuny runje tak zapřijate kaž zastaraćeljo a mnohe zarjady. „To je poprawom dźělny projekt strukturneje změny.“
Po słowach Kraushaar zwisuje nuza pobrachowaceje wody tež z brunicowymi jamami. „Najebać suchotu dyrbja ludźo we Łužicy spušćomnje z wodu zastarani być.“ Nysa a Sprjewja zastarujetej Błóta a město Berlin z wodu. „Za to je jara wjele dźělnych projektow a naprawow trěbnych, zo móhli to dale zaručić.“
Redmannjenički kandidat
Podstupim (dpa/SN). Šef frakcije CDU w Krajnym sejmje Braniborskeje Jan Redmann je jenički kandidat za naslědnistwo Michaela Stübgena, kiž nochce hižo zastojnstwo krajneho předsydy wukonjeć. „Redmann je jenički kandidat“, zwurazni minjeny pjatk generalny sekretar CDU Gordon Hoffmann. Pjatk bě so požadanski čas skónčił. We wobłuku naprašowanja maja čłonojo wot 31. januara hač do 3. měrca chwile wo nowym předsydźe wothłosować. CDU chce wuslědk 5. měrca wozjewić. Na krajnym stronskim zjězdźe 25. měrca předsydstwo potom oficialnje wola.
Redmann je w decembru připowědźił, zo chce so z naslědnikom Michaela Stübgena stać. Jeho wokrjesny zwjazk Ostprignitz-Ruppin kaž tež wokrjesne zwjazki Łobjo-Halštrow, Frankfurt nad Wódru, Oberhavel, Hornje Błóta-Łužica, Wódra-Sprjewja a Prignitz a Sprjewja-Nysa běchu jeho nominowali. 43lětny chce, zo stanje so CDU při wólbach krajneho sejma w lěće 2024 najsylniša strona w Braniborskej.
Wón chce stronu wobsahowje a personelnje přetworić.
Sakska skulptura wobohaća arenu
Prěnja raketaz britiskeje zemje
London (dpa/SN). Prěni raz ma dźensa z Wulkeje Britaniskeje raketa do swětnišća startować. Kaž partnerske předewzaće britiskeho swětnišćoweho zarjada, Virgin Orbit, minjeny pjatk wobkrući, ma so misija z mjenom „Start Me Up“ dźensa w 23.16 hodź. započeć. Wšitke testy běchu dotal wuspěšne. Hač hodźi so planowany termin dodźeržeć, pak wot wšelakich faktorow, kaž na přikład wjedra, wotwisuje. Poprawom dyrbješe raketa hižo do hód startować, štož pak bu techniskich problemow dla přestorčene.
Raketa, kotraž najprjedy z lětadłom při Spacetransport Cornwall wotzběhnje, ma hakle pozdźišo sama dale lećeć a wjacore statne kaž tež komercielne mjeńše satelity do swětnišća dowjezć.
Z prěnim satelitowym startom z Wulkeje Britaniskeje zahaji kraj nowu swětnišćowu dobu, wuzběhny zastupowacy šef tamnišeje Space agency Ian Annett. Tak skića so ludźom nowe móžnosće karjery a wyšeje produktiwity. A snano so tola hišće tón abo tamny za swětnišćo zajimuje a chce w tymle zajimawym wobłuku dźěłać. Wobłuk ma dźě tójšto potenciala do potenciala.
To a tamne (09.01.23)
Pjany šofer je sej na křižowanišću w Šwikawje za wodźidłom wusnył. Policisća su 35lětneho na pózdnim pjatku wječor wubudźili, policija zawčerawšim zdźěli. Dokelž w awće za alkoholom wonješe, zastojnicy šofera dokładnišo přepytachu. Prěni test pokaza 1,76 promilow. 35lětny dyrbješe hišće samsny wječor swoju jězbnu dowolnosć wotedać.
W lódzymnej wodźe pod hołym njebjom wosrjedź japanskeho milionoweho města Tokija su dźesatki ludźi Bohow wo strowotu prosyli. Něhdźe štyrceći muži we wosebitych falach a běłych pasach wokoło čoła kaž tež žony w běłym płašću su do wody zalězli a swoje próstwy wótře wołajo přednjesli.
