Podstupim (dpa/SN). Dokelž je w Braniborskej wjele wučerjow a šulerjow chorych, su wučbu na šulach wobmjezowali. Na cyłkownje 25 kubłanišćach móžachu minjeny pjatk jenož wobmjezowanu ­prezencnu wučbu podawać, zdźěli bra­niborske kubłanske ministerstwo.

W januaru je zwjazkowy kraj schodźenkowy plan wobzamknył. Tole bě w zwisku z koronapandemiju trěbne. Tak maja so we wotpowědnych schodźenkach wěste naprawy přesadźić. Wučba ma so potom na ćežišća koncentrować. Po cyłej Braniborskej je tuchwilu něhdźe 920 šulow. Hladajo na tuchwilny chorobny staw ma so w kraju po schodźenku 3 postupować. Tak so na potrjechenych ­šulach minimalna ličba hodźin podawa. Na zakładnych šulach a w sekundarnym schodźenku koncentruja so při tym na matematiku a rěče. We wyšich lětnikach je indiwidualne rjadowanje móžne.

Wot wobmjezowaneje wučby potrjechene su šulskozarjadniske wobwody Branibor nad Habolu, Neuruppin, Frankfurt nad Wódru a Choćebuz. Předewšěm w zakładnych šulach tam wjele wučerjow chorosće dla pobrachuje.

Berlin (dpa/SN). Sobudźěłaćerjo zarjadow abo předewzaćow, kotřiž pokazki wobšudnistwow, korupcije abo druhich njewšědnosćow dale dadźa, maja so lěpje škitać. Tak mjenowany „Whistleblower“-zakoń je zwjazkowy sejm dźensa wobzamknył. Zarjady a předewzaća maja so wo wotpowědne městna starać, kotrymž móža potrjecheni pady anonymnje přizjewić. Zakonjej dyrbi hišće Zwjazkowa rada přihłosować.

Přetrjebaja jasnje wjace wuhla

Paris (dpa/SN). Po wšěm swěće je pře­trjeba wuhla přiběrała a budźe prawdźepodobnje lětsa tak wysoka kaž nihdy do toho. Wo tym informowaše dźensa mjezynarodna energijowa agentura IEA ze sydłom w Parisu. Fachowcy wuchadźeja z toho, zo budźe přetrjeba fosilneho paliwa prěni raz nad wosom miliardami tonow ležeć, štož je něhdźe 1,2 procentaj wjace hač loni. Přiwšěm fachowcy měnja, zo budźe naprašowanje přichodne lěta sylnje woteběrać.

Wjelču populaciju regulować?

Drježdźany (dpa/SN). Medicinske zastaranje w Sakskej ma so polěpšić. Sakski krajny sejm je wčera wotpowědny zakoń wotzamknył. W nim rjaduje so přede­wšěm planowanje a financowanje chorownjow. Tak měli so strowotniske centrumy zarjadować, w kotrychž fachowi lěkarjo, apoteka a dalše strowotniske posłužby na jednym stejnišću hromadźe dźěłaja. Centrumy zmóžnjeja dobre zastaranje tež w kónčinach na wsach. „Naš zaměr je, tež w lěće 2030 eficientne, wukonliwe a atraktiwne medicinske zastaranje zaručić“, wuzběhny sakska strowotniska ministerka Petra Köpping (SPD). Ambulantne a stacionarne zastaranje měło so lěpje zwjazać. „Ludźi trjebaja fachowcow z dobrymi poskitkami w bliskosći. Tole móžemy mjez druhim w strowotniskich centrumach zaručić“, zapósłanča krajneho sejma Kathleen Kuhfuß (Zeleni) wčera zwurazni.

Nimo strowotnistwa zaběrachu so zapósłancy sakskeho krajneho sejma tež z nowelu šulskeho zakonja. Předewšěm ma so inkluzija w kubłanišćach polěpšić.